Lusadisu lwa Nzimbu Tuka Muna Tukau twa Mvevo

E salu yawonso tuvovele kala yisalwanga kwa wantu akwa luzolo, ediadi dikululang’e ntalu a nzimbu. E salu kia kwenda nzo ke nzo yo kay’e nkanda kisalwanga kwa Mbangi za Yave kuna mvevo a ntima. Yau kibeni bekuyisansanga. Akuluntu ana befilang’e nkutakani, y’aselo bekubasadisanga ke bebakanga mfutu ko muna salu yau. Yau awonso mu nzimbu za yau kibeni bezingilanga.

Kana nkutu i yikwa ya Buka kia Selo Yambuta, y’awana bevangang’e salu kia ntangwa ke ntangwa muna kubika yo nieteka o Nkand’a Nzambi, ye nkanda mia Sociedade, nzo zaleka kaka bevewanga, yo madia yo vutulwilw’e finzimbu muna sumba yina bena yau o mfunu. Diau adimosi divangamanga kwa akengi a zunga ya ntangwa ke ntangwa.

E nkanda mieto minietekwanga muna sadisa o wantu ana besongang’o luzolo muna Nkand’a Nzambi. E nzimbu zisumbilwang’e sadilwa ya nietekena e nkanda, ye mfila za nkanda muna nsi zakaka zitukanga muna lukau lwa mvevo luvanwanga kwa wantu akwa luzolo lwambote yo kudikilwa kwa tukau twa Mbangi za Yave, ye muna nsilu mia ana bezolanga vana tukau.

Muna tukutakanu twawonso twa Mbangi za Yave, diakala vo twa nkutakani mun’evata yovo tukutakanu twa zunga, mu siwanga nkela zakete za tukau mu kuma kia awana bazolele vana tukau. Ke mulombwanga nkub’a nzimbu kwa wantu ko. Ke bezengelwanga ntalu ko ngatu futiswa tini ki’ekumi. Wauna wasonama muna Nkand’a Nzambi, konso muntu kavanga una kakanini muna ntim’andi.​—2 Korinto 8:12; 9:7.

• E salu kia Mbangi za Yave aweyi kisimbilwanga mun’owu wa nzimbu?