Nkutakani Zakubikwa mu Samun’e Kintinu kia Nzambi

Vava o Yesu Kristu kakal’ova ntoto, wasamunang’e Kintinu kia Nzambi, muna kwenda kangala muna mavata ye mpata-vata. Walonganga yo tuma mpe alongoki andi kinumana bavanga e salu kiau akimosi. Una katombokele ko kun’ezulu, wakanikina kwa alandi andi vo bakitula o wantu azula yawonso se alongoki. Tuka kuna lubantiku, e nkutakani antete y’Akristu yakubikwa mu kuma kia samuna e nsangu zambote. Konso kuna bayendanga alongoki, basamunang’e Kintinu kia Nzambi.—Matai 4:17, 23; 10:1-16; 28:19, 20; Luka 4:43, 44; 8:1; 10:1-9; Mavangu 1:8; 4:31; 5:42; 8:12; 19:8; 28:23, 30, 31; Roma 10:9, 10, 14.

Muna ungunza wandi wa mbaninu a tandu Yesu wavova vo: “E nsangu zazi zambote za kintinu zisamunwa muna nza yawonso, muna umbangi kwa zula yawonso; i bosi iluak’e mbaninu.” E salu kiaki kia samun’e nsangu o unu i mfunu antete wa nkutakani y’Akristu.—Matai 24:14; Maku 13:10.

E nkutakani zawonso za Mbangi za Yave, muna nza yawonso, zakubikwa mu lunganesa e nsamun’a nsangu zambote za Kintinu kia Nzambi muna fulu yawonso ya zunga yau. Muna toma diatisa e salu una ufwene, evula dia sina dia Sociedade Torre de Vigia (EUA) muna konso nsi oyekekanga tini kia zunga kwa konso nkutakani kuna bafwete sila o umbangi. E nkutakani okayanisang’e zunga kiaki mu tini yakete, ina ivewanga kwa awana bena ye mbebe, muna vwa o lusikidisu vo wantu mu kingulwa bena.—1 Korinto 14:33, 40.

A Mbangi bemokenanga yo wantu muna kwenda nzo ke nzo. Muna tukutakanu twau, a Mbangi za Yave belongwanga una balenda sadil’o Nkand’a Nzambi mu samun’e nsangu za Kintinu muna mielo, mu mvovo miakete. A Mbangi benatang’e nkanda mia Sociedade mu sisa kwa esi nzo ana bezolang’owokesa o zayi wa Diambu dia Nzambi.

 Muna van’elau kw’awonso bena muna zunga kinumana vo bawa o nsamu wau wamfunu wa nsangu za Kintinu, a Mbangi besonekang’e nkumbu za wantu vava bekwendanga nzo ke nzo, muna zaya avo vena ye nzo ilembi wanuka wantu yovo nzo ina isamunwinu e diambu kansi ke una ufwene ko. E nzo yoyo yikingulwanga mu ntangwa yakaka. Avo muntu oyangalelel’e diambu vesiwang’e sinsu, kinumana a Mbangi bavutuka mu kunsonga maka mambu ma Nkand’a Nzambi. O muntu avo ozolele, oyantikang’o vewa elongi dia ngovo dia Nkand’a Nzambi dia ntangwa ke ntangwa. E salu kiaki kiawonso kisalwanga e ngovo kondwa mfutu.

A Mbangi za Yave yinkanda-nkanda mpe bekayanga kw’awana bekangalanga muna nzila. Muna diadi belendang’o mokena ye ndonga y’awana bena vo ke bewanukanga mu nzo ko. Besiang’e sungididi mu mokena yo wantu awonso ana bazolele o wa.—Mavangu 17:17; Lusengomono 14:6, 7; 22:17.

Ekuma a Mbangi bekwamanenang’ak’o kingula o wantu, wau vo ndonga ke bezolanga kwau ko? Edi dimonekanga e zingu kia wantu ezak’e ntangwa soba kisobanga yo lenda tambulwila o wá muna nkingulwa yakaka, yovo mokena yo wantu akaka muna nzo balenda yangalel’o wa.

Yesu wavova kwa alongoki andi vo: “Nutombel’ekulu e kintinu kiandi, ye ndungidi andi.” E nsamun’a Kintinu kia Nzambi yamfunu kikilu muna tombel’ekulu e kintinu, a Mbangi za Yave bebadikilanga kio kiamfunu kikilu muna zingu kiau.—Matai 6:33; 2 Timoteo 4:2.

• Nkia salu kiavangwa kwa Yesu ye kw’Akristu antete kia sakulwa kina kifwete vangama omu lumbu yeto?

• E salu kia samun’e nsangu kia Mbangi za Yave aweyi kikubikilwanga?

• Ekuma a Mbangi bekwamanenang’ak’o kingula o wantu, wau vo ndonga ke bezolanga wa ko?

[Mafoto zina muna lukaya 16]

Mbangi za Yave besamunang’e nsangu za Kintinu kia Nzambi muna nsi za mpila mu mpila

Tailândia

México

Países-Baixos

Coréia

Curaçau

Gana

Grã-Bretanha

Austrália