Nkutakani mu Kasakesa Muna Zola yo Ungudi

Nanga walungana kala mu tukutakanu twa nkutakani za Mbangi za Yave lukufi ye nzo aku. Wawana ko o wantu a mpila zawonso—esi nzo, ampumpa, anunu, y’aleke. Yau awonso ntwadi bakala muna nsambil’au yo luzolo lwa sadisa akaka.

Konso fulu kin’e ndonga a wantu bazolele sal’entwadi vekalanga yo mfunu a mfidi. O Nzambi i Nzambi ankubiki; ozevo, e nkubik’eyayi ifwete moneka mpe muna nkutakani a nkangu andi. Wauna wakala muna tandu kiantete, i una mpe o unu, Akristu akwa umwanda, azikuka, akwa zayi muna longa, besiwang’e kiyekwa se akuluntu, yovo akengi. Bediatisanga e nkutakani yo lunganis’e nzala za mwanda za nkutakani. Besadiswanga kwa akala akaka akwikizi bena vo aselo. Wantu awaya ke betambulanga mfutu ko, ngatu konso nluta wakaka wa nzimbu, kansi besadilanga muna mvevo, yo kuyiyundula muna salu kia yau kibeni.—1 Korinto 14:33, 40; Filipi 1:1; 1 Timoteo 3:8, 9.

Aweyi besolelwanga? Bafwete kala ntaudi za kwikizi za Nzambi, yo songa vo bena ye nkala a umwanda ifwene mun’owu wa Nkand’a Nzambi. Eyaka fu i yayi: kala ‘nkwa volo, nkwa lulungalalu ye kingwedi, munzola-nzenza, mfuzi a longa, munkondwa-nzekani, ke nkwa luzolo lua nzimbu ko, on’otoma ludikanga nzo a yandi kibeni, ke ndiona wansakila ko, ofwete silw’o umbangi wambote kw’awana bena kuna mbazi’; bafwete ‘tatidilang’e diambu dia kwikizi dina dina mun’elongi.’—1 Timoteo 3:1-15; Tito 1:7-9.

Muna salu kiaki o wantu awaya ke besolwanga kwa nkutakani ina bekalanga ko, eyi ilenda kala vo ebidi vana bena Akristu ampa. Kansi, besolwanga kwa wantu azikuka, bena yo zayi awana betatidilang’e diambu diakwikizi, bena vo akuluntu bena yo umbakuzi wa zaya kana vo awana besolwa balungis’e nkala ivavwanga muna Nkand’a Nzambi. I bosi betumbikwa e kimbuta yo uselo kwa Buka kia Selo  Yambuta kia Mbangi za Yave, ana belandang’e mbandu a nkutakani y’Akristu ya tandu kiantete.

Akuluntu awaya, yovo akengi, ke bena nze buka ki’anganga za mabundu ko; ke beyalanga akaka ko. Wauna kavov’o Yesu, awana basilw’ekiyekwa bafwete kala ntaudi z’awonso. Muna nkutakani a Mbangi za Yave, akuluntu bena se asadi y’akwau muna salu kia Kintinu kia Nzambi.—Matai 20:26, 27; 23:8-11; Roma 12:8; 1 Korinto 3:5; 4:1, 2; Kolosai 4:11; 1 Tesalonika 5:12-14.

Wau vo akengi, bediatisang’elongi divewanga muna nkutakani, bevitang’o ntu muna salu kia samun’e nsangu. O samun’e nsangu zambote za Kintinu muna zunga kina bavewa i mfunu antete a nkutakani. Akengi besalanga mpe nze avungudi, bekingulanga e yikwa ya nkutakani mu kubakasakesa una ufwene.—Matai 24:14; Mavangu 1:8; 1 Tesalonika 2:11,12; 5:14, 15; 2 Timoteo 2:24-26; Ayibere 13:17; Yakobo 5:13-16; 1 Petelo 5:1-4.

Akuluntu bena diaka ye mbebe a tumba yo ludika awana bebakamanga mun’ekuzuka dilenda twas’e vonza, yo yivis’e nkal’avelela ye fu yambote ya nkutakani, ye kintwadi kiau.— 1 Korinto 5:4, 5, 7, 11-13; Tito 1:9; 2:15; 3:10, 11.

Muna lungananga ye nkutakani ntangwa zawonso ovwa e kikundi kiambote, ye nluta miayingi muna mwanda.—Nkunga 35:18; 84:10.

• Nani otalang’e salu muna konso nkutakani?

• Akengi aweyi besolelwanga?

• E mbebe au ayeyi?

[Mafoto zina muna lukaya 13]

Akengi belongang’e nkutakani, bevitang’o ntu muna salu kia samuna e nsangu mu nzo ke nzo, bekasakesanga akaka muna kubakingula yo kubavungula bevanang’o tuludiku yo tumba una ufwene