Selo ya Ntangwa ke Ntangwa Bevitang’o ntu mu Salu kia Samun’e Nsangu

Dilenda kala vo o Mbangi antete a Yave wayiza kutala, selo kia ntangwa ke ntangwa kakala yovo missionário. Wau kina vo a Mbangi za Yave ke befutwanga ko muna salu kiau, nanga olenda kukiyuvula kana vo o wantu awaya aweyi belendelang’o kuyivana muna salu kia uselo wa ntangwa ke ntangwa.

A Mbangi za Yave awonso, bayiyekola kwa Nzambi yo vubwa, aselo, kansi engi muna yau basompa ye bavwidi wana yovo bena ye mbebe zakaka zilembi kubayambulanga mu sala mu ola zayingi muna uselo wau ova kati kwa lumingu. Kansi kadi, mazunda ma Mbangi, muna nza yawonso, bakulul’e tezo kia zingu kiau yo tambulwil’o vang’e salu kia ndambu a lumbu kinumana balenda vwa e ntangwa a vana 1.000 dia ola, yovo lutila muna salu kia uselo muna konso mvu.

Dialudi vo asadi a ntangwa ke ntangwa ke bena ye nzimbu zayingi ko muna sumba e ma ina balenda vwa o mfunu, kansi, kuna kwa yau, eyayi i mpil’a tombel’ekulu e Kintinu kia Nzambi. Nsambu zayingi betambulanga. Muna lenda mokena kwandi kaka e Diambu dia Nzambi y’akaka mu 90 lwa ola yovo vioka konso ngonde, ntona zayingi divananga. E selo kia ntangwa ke ntangwa onungunukang’e ngangu muna salu ovwidi mpe ntangwa ya toma sadis’akwa luzolo lwambote. Kivananga ndandu ambote kikilu. Bena y’eyi bavwidi o mfunu muna lekwa ya nitu yo yangalela eyi bena yau.​—Matai 6:33.

Muna ngonde a Fevelelo ya mvu a 1943, e Sociedade Torre de Vigia (EUA) wakubika Sikola a Ngiladi y’Eyingidilu dia Nkand’a Nzambi. O mfunu andi wa longa aselo ya ntangwa ke ntangwa kinumana basala e salu kia missionários muna nsi zakaka. Elongi dia ngonde tanu diatoma longok’o Nkand’a Nzambi, yo lusansu lwandi, ye nkubik’a Yave yo mambu makaka ma nkubama za salu muna nsi za nzenza.

E Sociedade ofutang’e nzimbu za nkangalu a missionário muna kwenda kuna kafidilu yo vana madia mamfunu ye nzo za leka ezi zafwana kwa yau. Konso missionário ovutulwilwanga finzimbu mu konso kina kasumbidi. Lumbu muna lumbu  konso missionário ovewang’e kiyekwa mu salu kia nzo, kwenda ku zandu, lamba madia, yo kubik’e nzo. E nkubika yoyo ikubasadisanga mu lenda sal’e salu kia uselo wa nzo ke nzo yo longoka o Nkand’a Nzambi yo wantu akwa luzolo lwambote yo lungisa e tezo kia 140 ma ola konso ngonde.

Engi muna missionário awaya befilwanga muna nsi za nda tezo kia mazunda ma kilometa ye nsi zau z’ewutukilu ye yitu yau. Bafwete soba e nkal’a zingu kiau mun’eki kia konso nsi yina bele, bafwete vava kulukil’e fu ya nsi, yo madia ma mpila zakaka, yo vov’e ndinga zakaka. Bekuyivananga mu salu kiokio kadi bena yo zola kuna kwa wantu ye mpe bena ye luzolo lwa kubasadisa bazaya oma ma Kintinu kia Nzambi.

Tuka muna mvu a 1943 yaku mvu a 1993, e Sikola a Ngiladi y’Eyingidilu dia Nkand’a Nzambi nkumbu 96 yakoteswa ye vioka 6.500 za missionário bafidilu kala. Muna mfil’a Sociedade oyau besalanga se asongedi a nzila muna yandanges’e salu kia long’o Nkand’a Nzambi kuna Afrika, kuna Amerika Central y’eyi ya Sul, kuna Oriente, yo kuna Pacífico Sul, ye salu kiayingi besalanga kuna Europa.

A Mbangi za Yave tuka awana besalanga e salu kia uselo wa ntangwa ke ntangwa nze mviti anzila yovo missionário, y’awana besalanga ndambu a ntangwa, ke besadilanga nluta mia nzimbu ko. Bevanang’e ntangwa ye nzimbu zau yo kuyivana yau kibeni, muna sadisa akaka kinumana bavwa o zayi ufilanga ku moyo a mvu ya mvu.​—Yoane 17:3.

• Ezak’e Mbangi za Yave aweyi belendelanga kuyivana mu salu kia uselo wa ntangwa ke ntangwa, ekuma bevangilanga wo?

• Aweyi belongelwanga aselo muna sal’e salu kia missionário?

• Nkia lusadisu betambulanga missionário mu sal’e salu kiau muna nsi za nzenza zina befilwanga?

[Mafoto zina muna lukaya 22]

Kuna koko kwalumonso: Eseka dia longela dia Sikola ya Ngiladi kuna Brooklyn, Nova Iorque, E.U.A.

Kuna koko kwalunene: Missionário olonganga e Diambu dia Nzambi kuna Papua Nova Guiné

[Mafoto zina muna lukaya 23]

Asadi a ntangwa ke ntangwa ye missionários belongang’e Diambu dia Nzambi muna nsi za mpila mu mpila

Brasil

República Dominicana

Espanha

Serra Leoa, Afrika