Tukutakanu twa Palanina Muna Zola yo Mavangu Mambote

Akristu antete bakutakananga, muna nzo za yau kibeni mu tambul’elongi yo kala entwadi muna luvangameso. O unu mpe, e nkutakani za Mbangi za Yave, nkumbu ntatu bekutakananga muna konso lumingu. Tususumwini walungana yau mu konso lukutakanu. O tukutakanu twatu ka tukalanga ye konso fuka wonso ko; kansi elongi dia Unzambi divewanga mo. O tukutakanu tuyantikilanga yo fokokela muna nkunga ye sambu. Kebefutanga ko muna kota ye ke mu lombwanga nkub’a nzimbu ko.​—Mavangu 4:23-31; 14:22; 15:32, 35; Roma 16:5; Kolosai 4:15.

Nanga o lukutakanu lwantete okota lw’elongi kwa wantu awonso lwa miniti 45, olu luvovanga malongi ma Nkand’a Nzambi, ma ungunza yovo tuludiku twa zingu kia Akristu. I bosi velandanga elongi dia Nkand’a Nzambi, mu longoka A Sentinela yakubikwa mu kuma kia longoka muna nkutakani. Se wunikina owu difidilwanga: O mfidi otangisang’e tini kimosi kia Sentinela kwa ntangi, i bosi keyuvulang’e yuvu ya tini kitangilu, konso ndiona ozolel’o van’e mvutu o zangul’o koko. Muna konso tini nanga vevanwang’e mvutu za swaswana. O lukutakanu lwalu ola mosi lunanganga.

Vana kati kwa lumingu, vevangamanga mpe tukutakanu tole twa miniti 45 muna konso lukutakanu. Lumosi lwa Sikola ya Salu kia Kimfumu. O lukutakanu lwalu lulonganga una tulenda kubikila elongi dia Nkand’a Nzambi yo toma dio longa. Una kimene elongi dia miniti 21, alongoki ana bateka solwanga besunzulang’e mbokena zau za nkufi. Kuna mfoko a konso nsunzula, o nlongi a sikola ovanang’elongi dia mpila ina o nlongoki kafwana nungunukina. Nkanda mia mpila mu mpila mianietekwa mu kuma kia sikola yayi. Awonso belungananga muna tukutakanu twatu balenda kwau sonekesa e nkumbu muna sikola avo bena ye nkal’ambote eyi yin’e ngwizani ye nsiku mia Nkand’a Nzambi.

O lukutakanu lulandanga luna ye nkumbu a Lukutakanu lwa Salu. Lwakayaniswa mu tini tatu yovo i yá konso tini kisonganga e nsunzul’a nsangu zambote mu nzo ke nzo, yovo mpila akaka ya salu. E nsunzula zazi zisongelwanga mu nsamuna za diambu, mu yuvu ye mvutu yovo nsonga nsongesela, ezak’e ntangwa mu mbokena  y’awana bakutakene. O malongi mesadilwanga makubikwa kala, mena muna finkanda-nkanda fin’e nkumbu a Salu Kieto kia Kintinu fipapela fi’elongi fia makaya mayá fianietekwa fivaikiswanga konso ngonde kwa Sociedade Torre de Vigia.

Lukutakanu lwakaka lwa konso lumingu lwa longokela mu buka kiakete, luvangilwanga mu nzo zasolwa mu fulu yayingi muna zunga kia nkutakani. Elongi dia Nkand’a Nzambi ye konso nkanda wampa uvayikisu kwa Sociedade. Wau vo e buka kiandwelo kikilu, konso muntu olenda kwandi vana e mvutu, ye mpe divananga elau kw’alungalakani batoma zayana.

Nkutakani zayingi bevangilang’o tukutakanu twau mun’Eseka dia Kintinu (Salão do Reino) diatungwa kwa Mbangi za Yave. Zitungilwanga muna lusadisu lwa tukau twamvevo twa Mbangi, ntangu zayingi e salu kisalwanga e ngovo kw’asadi bayivana muna luzolo ke bevavanga mfutu ko. Muna tukutakanu twawonso muna ye nkela za tukau twamvevo tuvanwanga kwa kons’oyu ozolele van’o lukau.

O tukutakanu twa nkutakani tusadisanga a Mbangi za Yave muna landa o luludiku lwasonama muna Ayibere 10:24, 25: “Mbula twabadikaziana mpe, twapalanina muna zola yo mavangu mambote; ke tuvunz’o lungana ko, nze fu kia wantu akaka, tuwonzaziana kaka; yo siamisa wo o vanga, wau tumwene vo e lumbu se kifinamene.”

• Nkia tezo kiakalanga muna tukutakanu twa tandu kiantete kimonekanga muna tukutakanu twa Mbangi za Yave?

• Vova oma mevangamanga muna tukutakanu tutanu tuvangwanga kwa Mbangi.

• Aweyi belendelang’o tunga o Maseka ma Kintinu?

[Mafoto zina muna lukaya 14]

Nkuluntu ofilang’elongi dia A Sentinela kuna Estados Unidos

Fuka muna Sikola ya Uselo wa Kintinu, kuna sanga kia Faroé

Buka kia alongoki muna nzo a muntu, kuna Yap

Eseka dia Kintinu, kuna New Braunfels, Texas, EUA, diatungwa mu lumbu yole kaka kwa Mbangi za Yave

[Mafoto zina muna lukaya 15]

Maseka ma Kintinu muna nsi za mpila mu mpila

Japão

Austrália

Áustria

Espanha