Akweyi Tufwete Vwil’e Mvutu
Akweyi Tufwete Vwil’e Mvutu
“Elongi dia lubangamu lwa mvu ya mvu diaswaswana yo lukwikilu lwa sia vo muna zola o Nzambi i kasemena e lekwa. . . . Okwikila muna lubangamu lwa mvu ya mvu mu kuma kia mpilakanu za mvu miakete, lembi vanw’elau dia singika wo, ke dina betela ko ye ndungidi.”—NIKHILANANDA, WA NDONGOTA HINDU.
1, 2. Muna kuma kia tukwikilu twayingi mu diambu dia Zingu Kunima Lufwa, nkia yuvu ivewanga?
NZE Nikhilananda wa ndongota Hindu, o unu ndonga ke belendanga bakula ko elongi dia lubangamu lwa mvu ya mvu. Diau adimosi, akaka bavwidi o lukatikisu lwa kwikil’elongi dia sia vo o moyo wenda ku Nirvana mu kwenda kala yo Tao.
2 Muna kuma kia ngindu za sia vo o moyo ke ufwanga ko, o mabundu ma Oriente ye Ocidente i batoma wokesela e mvwanga ya sia vo vena ye Zingu Kunima Lufwa. Nga tulenda zaya e ziku kia edi dikutubwilanga vava tufwanga? Nga o moyo ke ufwanga kikilu ko? Akweyi tufwete vavil’e mvutu?
Ngangu za nza ye Ndongota
3. E ngangu za nza yovo mpil’a vavil’o zayi nga zivwidi mvutu zakieleka za yuvu ya Zingu Kunima Lufwa?
3 E ngangu za nza yovo mpil’a vavil’o zayi nga ivanang’e mvutu zakieleka mu diambu dia Zingu Kunima Lufwa? Akaka avavi betezanga yika vo ekimpovela kikalanga yo muntu vava kefinamang’o fwa, yovo ‘ke muna to ko’ disonganga vo vena ye zingu kunima lufwa. Kansi muna fimpululang’e mpova zau vava katanga “Lufwa se Mwelo a Kotela mu Ntemo?,” o mfumu Hans Küng wa nlongoki a mambu ma unzambi wa mwisi Katolika edi kavova vo: “E nona ya mpila yayi ke isonganga ko vo vena ye zingu kia moyo kunima lufwa: e yimpovela yayi ina kevovang’o muntu se fwa, miniti ntanu vitila fwa ke isonganga moyo akwele mvu kunima lufwa ko.” Oyandi wakudikila vo: “E diambu dia lenda zinga kunima lufwa mfunu kikilu dikalanga kuna kwa ndiona se fwa. E diambu diadi mvutu divavanga ye zifwete vavilwa konso fulu kele vo e nganga wuka kalendele zo vana ko.”
4. O undongota nga ulenda kutusadisa mu vwa e mvutu za diambu diadi nze una zivewanga kwa mabundu mu kuma kia lufwa?
4 E kindongota aweyi? Nga kilenda kutusadisa mu vwa e mvutu za diambu diadi una divanwanga kwa mabundu mu kuma kia lufwa? E nsatulula za ndongota “mbalu zantima,” i kavova o Bertrand Russell wa ndongota Grã-Bretanha omu tandu kia 20 ma nkama za mvu. Muna nkanda uyikilwanga vo The World Book Encyclopedia, e kindongota i “nzil’a vavila—mbadika, asasila, yo fimpa.” O lufimpu lwa kindongota mpila zayingi luyikilanga e diambu dia Zingu Kunima Lufwa, tuka kuna yika vo o moyo ke ufwanga ko luzolo lwa mbalu za ntima kwandi, yaku ngindu za sia vo konso muntu owutukanga wau.
Nto Imosi Kaka Yavwil’e Mvutu
5. Aweyi i nkand’ankulu wasonekwa?
5 Kansi, vena yo nkanda una ye mvutu zakieleka za yuvu yayi yamfunu mu kuma kia zingu yo lufwa. I nkand’ankulu wasonekwa, una vo eyaka tini yafokolw’o sonekwa se vioka tezo kia 3.500 za mvu. E ndambu antete ya nkanda wau nkama za mvu wavitila e sono ya nkung’a Hindu, uyikilwanga vo Veda, ye mazunda ma mvu wavitila Maavira wa Buda, yo Cofúncio ova ntoto. O nkanda wau wafokolw’o sonekwa muna mvu wa 98 T.K., vioka 500 za mvu vitila Maomé kasoka e bundu dia Islão. E nto yayi imosi ya ngangu zisundidi i Nkand’a Nzambi. a
6. Ekuma tufwete yambulwila o nkand’a Nzambi watuzaisa kana nki i moyo?
6 O Nkand’a Nzambi uvwidi o lusansu lwankulu lwakieleka luna vo ke vena nkanda akaka ko una lwau. O lusansu lwasonekwa omu Nkand’a Nzambi lwa tuka kuna lubantiku lwa kanda dia wantu ye lusasilanga una twayizila ova nza. Tuka nkutu e ntangwa ina vo o wantu ke basemwa ko. I sia vo o nkanda wau ulenda kutuzayisa una kavangilwa o muntu ye kana nki i moyo.
7, 8. Ekuma tufwete bundil’o Nkand’a Nzambi e vuvu mu kutuzaisa e ludi ye mvutu zasikila mu kuma kia dina dikutubwilanga vava tufwanga?
7 E diakaka mpe, o Nkand’a Nzambi i nkanda mosi a ungunza ulunganang’aka. Kasikil’owu, uyikanga e ntomboka ye nkuluka a luyalu lwa Madai ye Aparasi yo Ngerekia bena vo tuyalu twampwena. O mambu mama malungana kikilu kana una vo akaka akwa luvezo, muna nkatu batezang’osokela vo kunima masonekenwa vava mateka bwa. (Daniele 8:1-7, 20-22) Owaka ungunza wasonekwa omu Nkand’a Nzambi ulungananga omu tandu kieto. b—Matai kapu kia 24; Maku kapu kia 13; Luka kapu kia 21; 2 Timoteo 3:1-5, 13.
8 Ke vena muntu ko, kana nkwa ngangu olenda sakula mana maludi kia kusentu. O Nsemi a nza wa mpungu-ngolo una ye ngangu zisundidi yandi kaka olenda wo vanga. (2 Timoteo 3:16, 17; 2 Petelo 1:20, 21) Nkand’a Nzambi aka i nkanda watuka kwa Nzambi. Ke lukatikisu ko, o nkanda wau ulenda kutuzayis’e ludi ye mvutu zasikila mun’owu wa dina dikutubwilanga vava tufwanga. Tubadika ntete edi divovwanga mu kuma kia moyo.
[Mvovo ku yanda dia lukaya]
a Tala e finkanda Um Livro Para Todas as Pessoas, fiamwangwa kwa Watchtower Bible and Tract Society of New York, Inc.
b Tala A Bíblia—Palavra de Deus ou de Homem?, wamwangwa kwa Watchtower Bible and Tract Society of New York, Inc.
[Yuvu ja Longokela]
[Foto ina muna lukaya 18]
O nkand’ankulu wasonekwa
[Foto ina muna lukaya 18]
Nkanda uzayisang’e ludi ye mvutu zasikila
