Fiauzi Kwa Akwa Ntima mia Wonga

“O nsema wawonso ubuminanga yo kala yo nsongo kumosi yamu wau.” (Roma 8:22) E mpasi za wantu zayingi zakala vava kiasonekwa o mambu mama se vioka 1.900 za mvu. Engi bakalanga ye ntima mia wonga. Idianu, diavovelwa kwa Akristu: “Nukasakes’akwa ntima mia wonga.”​—1 Tesalonika 5:14.

O unu e mpasi za wantu zasaka, ndong’a wantu bena ye ntima mia wonga. Nga diadi difwana kutusivikisa? Ve, ekuma kadi Nkand’a Nzambi uvovele vo mu “lumbu ya mbaninu” se tuna oyikilanga yo vo “nsungi za tema.” (2 Timoteo 3:1-5) Yesu Kristu wavova vo muna lumbu ya mbaninu vekala ye “wonga”.​—Luka 21:7-11; Matai 24:3-14.

Ke dia nzenza ko kwa wantu dia kala ye ntima mia wonga musungula vava beviangalua o moyo, yo wonga, ntantu yovo yindula ngindu zambi. Mfwilu a mwan’angudi, mpamban’a yakala yo nkento, katulwa mu salu, yovo yela kwayingi dilenda kala s’etuku dia ntima mia wonga. O wantu bekalanga mpe yo wonga muna ntima ovo bayimini e ngindu za sia vo ke bena mfunu ko, yo kuyibadikila vo akwa mfwilu, akw’au kaka beyoyesanga. Konso muntu olenda kala yo ntima a wonga, kansi ovo odimbula vuvu yo lembi vav’owu kavanga mu vaika mu vonza, e mfoko olenda kuyisia mu wonga wayingi wa ntima.

Kuna nkulu o wantu i wau mpe babazanga. O Yobi wabangama mu mpasi za mayela yo usukami. Edi kabanza vo Nzambi wambembola, i mbenga kameng’o zinga. (Yobi 10:1; 29:4, 5) O Yakobo kakendelek’o moyo una kabanzanga vo  mwan’andi ofwidi, kamenga nkutu o fiaulwiswa wazola vo kafwa kwandi. (Etuku 37:33-35) O Davidi wa ntinu vava kazaya e mbi yina kavanga wakendalala: “Lumbu ke lumbu nkalanga ye kimvindu [nkalanga ye kinkenda NW]. Nlembangani ngina.”​—Nkunga 38:6, 8; 2 Korinto 7:5, 6.

O unu ndonga bena ye ntima mia wonga mu kuma kia zolela mambu masundidi e tezo, belakukilanga oma masundi efuka diau mana ke bena y’owu bavwila mo ko. I una, ntima a nkenda, yo banza kwayingi ye ndimbula vuvu iyoyesang’e nitu ye tomfo yo twasa wonga mu ntima.​—Tezanisa yo Ngana 14:30.

Lusadisu olu Bavwidi o Mfunu

Epaferodito wa mukristu akwa Filipi, muna tandu kiantete, ‘kakala yo wonga wa ntima ekuma vo ampangi zandi mu lukwikilu ba wa vo yela kayela.’ Wau kayelela kuna Roma katumwa kw’ampangi zandi kenda vana lusadisu kwa Paulu wa ntumwa edi kabanza vo yoyesa kabayoyesa, ye mpe vo mpavala kaka bambadikilanga. (Filipi 2:25-27; 4:18) O Paulu wa ntumwa nkia lusadisu kavana?

Wavana nkanda kwa Epaferodito kanata kwa ampangi kuna Filipi, oma kasoneka: “Nuntambwila [Epaferodito] muna Mfumu kuna kiese kiawonso; numwen’ana bena wau o zitu.” (Filipi 2:28-30) Wau vo Paulu katoma vovela wete muna yandi ampangi mpe kuna Filipi bantambula kuna ngemba ye nzola ina bansonga, kieleka ediadi diakala se lufiaulwisu kwa Epaferodito yo kunkulul’o moyo.

Kondwa lukatikisu, elongi dia Nkand’a Nzambi dia ‘kasakes’akwa ntima mia wonga.’ dia mfunu kikilu. O nkento mosi nkwa wonga wa ntima wavova, “dia mfunu dia zaya vo akaka ba vwidi o mfunu.” “Dia mfunu dia wa mvovo mia akaka nze i wau: ‘nzeye wo; sasuk’o sasuka.’”

Dia mfunu kwa nkwa ntima a wonga kavava mokena yo nkwa umbakuzi ndiona kalenda song’e diambu diandi. O ndioyo ofwete kala nwe ambote ye nkwa ntim’a nlemvo.  Kafwete vova mayingi ko ngatu bazila nkwa ntima a wonga ye mvovo nze i miami: ‘Kufwete yindulanga ko,’ yovo vova vo: ‘E kiaki fu kia mbi.’ E ngindu za nkwa ntima a wonga za lutovoko, okumbazila mpasi kaka kusakisa.

Nkwa ntima a wonga olenda banza vo kena mfunu ko. (Yona 4:3) Kansi, o muntu kafwete sungamena vo edi din’o mfunu i mpila in’o Nzambi kekunyinduluilanga. O Yesu ‘kavezwa kwa wantu,’ kansi ke diankevesa ko vana ndose a Nzambi. (Yesaya 53:3) Kala ye ziku vo, o Nzambi okuzolanga mpe nze i una kezolelang’o Mwan’andi anzolwa.​—Yoane 3:16.

O Yesu wafwilanga abangami e nkenda yo kubasadisa mu zaya vo mfunu bena. (Matai 9:36; 11:28-30; 14:14) Wabasasila vo e ma yakete ye inuninuni nkutu o Nzambi ovwanga yo mfunu. “ke vena imosi nkutu ivilakanwa kwa Nzambi ko.” ikavova. Kuna kwa nzola kelut’ozola o wantu bevavanga vang’o luzolo Lwandi! Kwa awaya Yesu wavova: “musungul’e nsuki za ntu mieno zavwa tangwa.”​—Luka 12:6, 7.

Dia ludi vo dilenda kala dia mpasi kwa nkwa ntima wa toma kendalala, mu kuma kia lutovoko luandi, dia kwikila vo Nzambi umvwidi o mfunu. Nanga lenda banza vo kafwana zolwa yovo sadiswa kwa Nzambi ko. E Diambu dia Nzambi ditomene wo zaya vo ‘zak’e ntangwa o ntim’eto ukutu tumbanga.’ Kansi ediadi nga i sina kia diambu? Ve, ke diau ko. Nzambi otomene dio zaya vo asumuki a wantu nanga i wau bekuyibanzila yo kuyitumba. I diau vo e Diambu diandi dikutukasakesanga: “Kadi, Nzambi osundidi ntima mieto, o mambu mawonso ozeye mo.”​—1 Yoane 3:19, 20.

Elo, o S’eto anzolwa w’ezulu kemonanga kaka masumu yo mambi meto ko. Yandi ozeye o tutovoko tweto, e zingu kieto kiawonso, etima yo makani meto. Ozeye wo vo tu’avingidi efwa di’esumu, yela yo lufwa, vo muna kum’eki ke twafwana ko. Vava tukendalalanga yo kuyisaula yeto kibeni i sinsu kia sia vo ketuzolele sumuka ko ye mpe ketwele vala ko. Nkand’a Nzambi uvovanga vo ‘twasakidikwa muna fûka’ ke mu luzolo  lweto ko. Ozevo, Nzambi okutufwilang’e nkenda kadi ozeye e nkal’eto a mpasi yo lutovoko lweto.​—Roma 2:12; 8:20.

“Yave nkwa nkenda yo ungudi,” okutukieseselanga dio vo. “Konso una wavavuzianina este ye weste, i una katuvengomwenena makuzuka meto. Kadi oyandi ozeye mpangw’eto; osungamene wo vo tu ntoto.” (Nkunga 103:8, 12, 14) Kieleka o Yave i “Nzambi a fiauzi, on’okutufiaulwisilanga muna mpasi zeto zawonso.”​—2 Korinto 1:3, 4.

O lusadisu lufwene kwa akwa ntima mia wonga i mu finama kwa Nzambi au wa nkwa nkenda yo tambulwil’e mboka a ‘yekek’ezitu diaku kwa yandi.’ Yandi olenda “vutula ntima mi’awana bakosomoka.” (Nkunga 55:22; Yesaya 57:15) I kuma, e Diambu dia Nzambi disiamisinang’o samba oku vo: “O nteleko eno a moyo awonso, nusia wo muna yandi, [Yave] e kuma kadi, yeno kasidi o moyo.” (1 Petelo 5:7) Elo, muna sambu yo ludodokelo, dilendakana ofinama kwa Nzambi yo vwa “luvuvamu lwa Nzambi, luna luviokele nyindu wawonso.”​—Filipi 4:6, 7; Nkunga 16:8, 9.

Nsoba za yak’efu muna zingu zilenda sadisa nkwa ntima a wonga. Nsins’a nitu, dia kuambote, tembwa kiavelela, vundu kiafwana yo yambula tala e TV mu kolo kiayingi mfunu ina. Kento mosi osadisanga akwa ntima mia wonga mu kwenda yau munkangalu a tini kia nda. Vava nkento akaka nkwa ntima a wonga kavova vo: “Kizolele kangala ko,” wavutula mu ngemba zawonso yo ziku vo: “Elo, kwend’okwenda.” Wasamuna vo: ‘Twakangala quilômetros sambanu. Vava twavutuka wayoya kakala, kansi wayimona se mbote. Ke vena muntu okwikila ko vo nsins’a nitu mfunu ina kele vo olembi teza.

Kansi kadi, zak’e ntangwa ke dilendakana ko dia manis’e mvimba o wonga wa ntima kana nkutu ovenge mawonso kumosi ye nlongo mia nganga wuki (madotolo). “Ntezele mu mawonso,” i kavova nkento mosi wa nsakila “kansi yakinu kaka yo ntima a wonga.” Diau adimosi, o unu mpe ke tulendi wuka a mpofo, afwa matu, ngatu avanguki ko. Kansi kadi, akendaladi  muna ntima balenda baka lukasakeso ye vuvu mu tangang’ak’e Diambu dia Nzambi, divanang’e vuvu kiasikila kia luvevoko luakwele mvu mu mpasi zawonso za wantu.​—Roma 12:12; 15:4.

Vava Ke Vekala Diak’akwa Ntima mia Wonga Ko

Vava kavova o mambu ma mpasi zikwiz’ova nza muna lumbu ya mbaninu, Yesu wavova diaka vo: “O mambu mama ova mebantik’o vangama, nusampuk’omu’zulu, nuvumbula ntu, kadi nkûk’eno ifinamene.” (Luka 21:28) O luvevoko kavov’o Yesu i lwa nkota muna nz’ampa ya Nzambi, muna vo o ‘nsema kibeni wavevoka muna kibundu kia uwolezia, yamuna vevoka kwa nkembo a wan’a Nzambi.’​—Roma 8:21.

Ekwe vevoka kukala yo wantu vava bevevolwa muna mazitu ma mpasi za nza nkulu yo sikama lumbu yawonso ye ngindu zakia y’etima dia sala e salu kia lumbu! Ke vekala diaka muntu obangama yo lukendalalu lwa ntima ko. Kadi o nsilu a ziku kwa wantu i wa sia vo o Nzambi ‘okunguna mansanga mawonso muna meso mau; o lufwa ke lukala diaka ko; musungula kala diaka dilu, yovo kazu, ngatu mpasi: oma mantete maviokele.’ (Lusengomono 21:3, 4)