Ke Kolo Ko e Mpasi Zawonso se Zifokoka!

 Ezak’e ntangwa muna zingu kiaku, nanga wayuvula kala, ‘Ekuma venena ulolo wa mpasi?’ Tuka mafunda ma mvu, o wantu bemonanga e mpasi mu kuma kia vita, usukami, sumbula, umpumbulu, kondwa unsongi, mayela ye lufwa. E tandu kiviokele kialutidi kikilu e mpasi ke mu tandu yakaka ko. O mama mawonso nga mefokoka?

Elo, ke kolo ko e mpasi zawonso zifokoka emvimba! Muna Nkand’a Nzambi tutanganga vo: ‘Fikolo-kolo kaka, e kimpumbulu, ladi . . . Kansi alembami bevwa nza; beyangalela muna mawete mayingi.’ Mu mvu nkwa? “Asongi bevwa nza, besikila vo yakwele mvu.”​—Nkunga 37:10, 11, 29.

Vava Nzambi ke sukisa mbi yawonso ye mpasi, o ntoto ukituka se paradiso. O wantu bezinga yakwele mvu mu kiese yo mavimpi mambote. O Nkand’a Nzambi uzayisanga vo: ‘[O Nzambi] okunguna mansanga mawonso muna meso mau; o lufwa, ke lukala diaka ko; musungula kala diaka dilu, yovo kazu, ngatu mpasi.’​—Lusengomono 21:4.

Muna nza yayina yampa, amafwa nkutu befuluka mu vwa e nsambu zazi. ‘Vekala lufuluku lu’asongi y’ana balembi songa.’ (Mavangu 24:15) Kiaki i kuma o Yesu kavovesela kimpumbulu ona waviluk’o ntima yo songa lukwikilu muna Yandi vo: “Okala yame muna Paradiso.”​—Luka 23:43.

 E Mpasi Aweyi Zayantikila?

Wau vo Nzambi zingu kiaki kiambote kakana mu kuma kia wantu, ekuma kayambulwila vo vakala e mpasi? Ekuma kayambulwila zo mu kolo kiaki kiawonso?

Vava Nzambi kavanga Adami yo Eva, wabavanga ye nitu ye ngindu zalunga. Wabasia muna paradiso yo kubavana e salu kiambote. O Nkand’a Nzambi uvovanga vo: “O Nzambi omwene yawonso kavangidi, yambote kikilu.” (Etuku 1:31) Kele vo balemvokela Nzambi, badi wuta wana alunga, o ntoto wawonso wadi kituka se paradiso, o wantu badi zinga yakwele mvu mu luvuvamu ye kiese.

O Nzambi lukau lwambote kavana kwa Adami yo Eva, nswa wa kuyisolela. Ke bakala nze masini ko mesalanga kaka mu mpila ina makubikilu. Kansi, muna zinga ye kiese diavavanga vo basadila o nswa wakuyisolela mu mpila yambote​—lemvokela nsiku mia Nzambi. O Nzambi wavova vo: “Omono i Yave wa Nzambi aku, on’okulong’oma ma mfunu, yo kufila muna nzila in’ofwete kwenda.” Osadila nswa a kuyisolela mu mpila yambi mfwilu diadi twasa, kadi o wantu ke balendi kala ye zingu kiasikila ko kondwa Nzambi. O Nkand’a Nzambi uvovanga vo: “E nzil’a muntu ke ina muna yandi ko: ngatu singikila ntambi zandi o munduti-a-nzila.”​—Yeremiya 10:23.

 Diankenda kikilu, kadi amase meto mantete bayindula vo badi kala ye zingu kiasikila muna kuyiyala kondwa Nzambi. Wau bayikatula muna wisa kia Nzambi, bavidisa kiwuntu kialunga. Bayantika e zingu kia mpasi yavana banuna yo fwa. Wau vo tu mbongo au, twasambukila usumuki wau yo lufwa.​—Roma 5:12.

Nani Una ye Nswa wa Yala?

Ekuma Nzambi kalembi fwasila Adami yo Eva yo vanga wantu akaka? Ekuma kadi wisa kia Nzambi kia yal’e nza kiafidiswa e mpaka. E kiuvu kiayuvulwa i kiaki: Nani una ye nswa wa yala? Luyalu lwa nani luna lwambote? Nga wantu balenda zinga kiambote kele vo ke bayadilu kwa Nzambi ko? Muna van’e ntangwa yafwana kwa wantu bavwa luvevoko lwawonso, o Nzambi ukemanisina diambu diadi yakwele mvu yo songa kana vo o wantu bafwete yalwa kwa Nzambi yovo kuyiyala yau kibeni. E ntangwa bayambulwilwa yafwana kikilu mu teza mpila zawonso za tuyalu, kimvwama ye nkubika za mabundu mayivaula yo luyalu lwa Nzambi.

Nkia nsendo diatwasa? O mafunda ma mvu mia lusansu lwa wantu misonganga vo e mpasi wokela kaka ziwokelanga. Muna tandu kiviokele, o wantu bamona mpasi zakondwa etezo. Mafunda ma wantu bavondwa muna Vit’Anzole ya Nz’amvimba. Vioka 100 za mafunda ma wantu bafwa muna vita zakaka. Umpumbulu yo nsoki uwokelanga mwawonso. Nua e diamba ye fomo zakaka za ngolo ziwokelanga. E yimbevo yisambukilanga mu zumba yikwamanananga. E mayela ye nzala yivondanga mafunda ma wantu. E zingu kia nzo ye fu yambote ke yizitiswanga diaka ko mwawonso.  Ke vena luyalu lwa wantu ko lulenda manisa mayela, lufwa ye mpasi zakaka za wantu.

E fu ya wantu yafwanana kikilu ye yina keyikanga Nkand’a Nzambi mu kuma kia lumbu yeto. Usonganga vo mu “ntangw’ampasi” tuzingilanga, i sia vo “lumbu yambaninu” a tandu kiaki. Nze una tutanganga muna Nkand’a Nzambi, ‘wantu ambi, y’akwa tungianisa, bewokela ovang’o bi.’​—2 Timoteo 3:1-5, 13.

Ke Kolo Ko e Mpasi se Zifokoka

Mambu mevangamanga o unu mesonganga vo mbaninu ya luyalu lwa wantu lwayivaula yo Nzambi ifinamene. Ditomene zayakana vo luyalu lwa wantu lwayivaula yo Nzambi ka lulendi sikila ko. Luyalu lwa Nzambi kaka lulenda twasa luvuvamu, kiese, mavimpi malunga yo moyo a mvu ya mvu. E ntangwa kayambula o Yave vo e mbi ye mpasi zakala se ilwaka kumfoko. Ke kolo ko o Nzambi ofwasa nza yayi yambi.

O ungunza wa Nkand’a Nzambi uvovanga vo: “Muna lumbu y’atinu awana [luyalu lwa wantu luna owau], o Nzambi ezulu otongeka kintinu [kun’ezulu], kina ke kibangalakeswa ko. . . . Kikosomona yo sukisa yintinu yayi yawonso [iyalanga owau], kitongama mpe yakwele mvu.” (Daniele 2:44) Tundidika kimfumu kia Yave muna Kintinu ki’ezulu i ntu a diambu wa malongi ma Nkand’a Nzambi. Vava kazayisa e sinsu ya “lumbu yambaninu,” o Yesu wavova vo: “E nsangu  zazi zambote za kintinu zisamunwa muna nza yawonso, muna umbangi kwa zula yawonso; i bosi iluak’e mbaninu.”​—Matai 24:14.

Vava mbaninu ilwaka, aki nani bevuluka? O Nkand’a Nzambi usonganga vo: ‘Asongi bekal’omu nsi, alungi besala mo. Yimpumbulu ikendonwa muna nsi, akwa maleko bevuzwa.’ (Ngana 2:21, 22) Asongi i awana belongokanga yo vanga luzolo lwa Yave. Yesu wavova vo: “I wau wuwu o moyo a mvu ya mvu, bazaya ngeye vo i Nzambi aludi, yo Yesu Kristu mpe ona watuma.” (Yoane 17:3) Kieleka, ‘e nza vioka yivioka . . . kansi ndion’ovangang’o luzolo lua Nzambi, ozinga yakwele mvu.’​—1 Yoane 2:17.