Nga Nani Kielela Oyalanga E Nza?

Engi balenda vutula mvutu za kiuvu kiaki mu mvovo umosi kaka wa sia vo​—Nzambi. Kansi kadi diamfunu dia zaya vo, ke vena fulu kana kimosi ko omu Nkand’a Nzambi kiyikanga vo Yesu Kristu yovo eS’andi i ayadi a nza yayi. Kansi, o Yesu edi kavova vo: “S’evaikiswa kuna mbazi, o nkuluntu [o nyadi NM] a nza yayi.” Wavova mpe diaka vo: “Kwiza kekwiz’o nkuluntu [nyadi NM] a nza yayi: omu mono kena mo ya uma ko.”​—Yoane 12:31; 14:30; 16:11.

I sia vo, o nyadi a nza yayi ntantu a Yesu. Nga nani i nyadi ndioyo?

Oma Mevangamanga Mu Nza Mevananga Mvutu

Kufwila ngolo zawonso bevangang’o wantu akw’etima diambote, e nza yakinu mona kaka e mpasi muna lusansu lwandi lwawonso. Ediadi i difilanga akwa ntona yo kuyiyuvula nze i una kavova David Lawrence wa nsoneki: “‘Luvuvamu ova Nza’​—e nza yawonso bezolanga lo. ‘Luzolo lwambote kwa wantu’​—nkangu miawonso mia nza bena y’etima diadi yau yo yau. Ozevo, adieyi dina dia mbi? Ekuma bezolelang’e vita vo tala o luzolo lwa wantu lua kala yo luvuvamu?”

Dia mpasi mu kwikila, ke wau ko? Nana vo o luzolo lwa wantu lua zinga mu luvuvamu, kansi besauziananga yo vondaziana yau yo yau​—yo kuyimwesa mpasi! Se badiki e mpila nsoki bevangaziananga ye mbungula za menga ma kinse. Besadilanga nwaninwa ya mpila mu mpila nze câmara de gás, campos de concentração, lanças-chamas, bombas napalm ye miakaka mpe muna mwes’e mpasi yo vondana kondwa nkenda.

Ng’o kwikila dio vo, wantu aya bena y’etima dia luvuvamu ye kiese, bavangang’o mambi ma mpasi za mpil’eyayi kwa  akaka muna luzolo lwa yau kibeni? Nkia wisa kinungunanga yovo filakes’o wantu mu mpanga zazi za ngemi, yo kubafila vo bavangang’aka e mbi? Nga wakiyuvula kala kana vo vena ye wisa kia mbi, kia kimwanda, kifilakesang’o wantu muna vang’o mavangu mama ma nsoki?

Ayadi a Nza Yayi Basengomweno

Kukatikisa dio ko, ekuma vo, o Nkand’a Nzambi usonganga empenza vo vena yo nkwa ngangu, on’olembi moneka, ofilanga wantu ye zula. Uvovele vo: “E nza yawonso muna mbi ilele.” Oyikilwanga muna Nkand’a Nzambi vo: “Nkadi ampemba, wa Satana, . . . on’otungianisang’e nza yawonso.”​—1 Yoane 5:19; Lusengomono 12:9.

Vava “katontua kwa Nkadi ampemba,” o Yesu kakatikisa dio ko vo o Satana i nyadi a nza yayi. O Nkand’a Nzambi usonganga oma mabwa: “O Nkadi ampemba untombwele vana mongo anda kikilu, unsongele yintinu yawonso ya nza, yo nkembo au; umvovese vo, ‘Eyayi yawonso ikuvana yo, ovo ofukama, wankunda.’ O Yesu umvovese vo, ‘Katuka, e Satana!’—Matai 4:1, 8-10.

Banza ediadi. Satana watonta Yesu mu kumvana “yintinu yawonso ya nza.” O Satana kele vo kakadi se nyadi a yintinu yayi ko o nkailu andi nga wadi kala se luntoto? Ve, ke wadi kala ko. Zaya dio vo o Yesu ka sa dio vunisa ko vo o tuyalu twatuna tuawonso ke tua Satana ko, kieleka wadi dio vunisa kele vo Satana kakadi ye wisa mu yau ko. Ozevo, Satana, wa Nkadi ampemba yandi kieleka i nyadi a nza on’olembi monekanga! I kuma, o Nkand’a Nzambi ukunyikilanga vo “nzambi a tandu kiaki.” (2 Korinto 4:4) Kansi, aweyi o mbendomoki ndioyo kabakila e fulu kiokio kianene?

O mbasi ndiona wayikitula se Satana wateka kala se mbasi yavangwa kwa Nzambi, kansi wabantik’o lokokela fulu kia Nzambi. Yandi watelamena e wisa kia luyalu lua Nzambi. Muna diadi wasadila nioka mu vuna o nkento antete, Eva, ye walenda kubafila yo yakala diandi Adami, mu vanga oma  kazola, ke mu lemvokela Nzambi ko. (Etuku 3:1-6; 2 Korinto 11:3) Yandi wayivama oku vo ovengomona mbongo yawonso bewutuka muna Adami yo Eva muna nzila Nzambi. I mpana kavan’o Nzambi e ntangwa kwa Satana kinumana vo kavanga mana kavova, kansi o Satana kasidi lunga ko.​—Yobi 1:6-12; 2:1-10.

I kieleka vo, o Satana ke yandi amosi ko oyalanga e nza. Wavunginika mbasi zakaka bayikana yo yandi mu telamena Nzambi. Awaya bakituka se nkwiya, akwandi a kimwanda. O Nkand’a Nzambi uvovanga mu kuma kiau muna wondelela akristu: “Nutelamena tumpeso twa Nkadi ampemba. Kadi ndwan’eto ke ya nitu yo  menga ko, kansi ye mingyala-nza mia tombe kiaki, ye vu ya umwanda ya bi muna mwezulu.”​—Efeso 6:11, 12.

Sia e Mianda Mia Mbi e Kitantu

Ayadi awaya ambi alembi moneka a nza yayi basiama kikilu mu tungianis’o wantu, yo kubavengomona mu sambila Nzambi. Bevangilanga wo muna yimisa e ngindu za sia vo o moyo uzinganga ku nima lufwa, avo tala e Diambu dia Nzambi disonganga muna ziku kiawonso vo amafwa ke bazeye diambu ko. (Etuku 2:17; 3:19; Yezekele 18:4; Nkunga 146:3, 4; Kimpovi 9:5, 10) O mwand’ambi, ovo otanginini nding’a muntu afwa, nanga lenda vova kwa yitu yovo akundi andi, a moyo, kunima nganga matombola, yovo kunima “ndinga” ituka ku nsi ilembi moneka. E “ndinga” ikuvunina vo ya ndiona wafwa kala, kansi i nkwiya kwandi!

Ozevo, ovo lumbu owidi e “ndinga” a mpila yayi, kuyivukiki ko. Kuwila konso edi ivova ko, vova nze owu kavov’o Yesu: “katuka, e Satana!” (Matai 4:10; Yakobo 4:7) Ku yambula ko vo ezolela kia zay’oma ma nza a kimwanda kiafila mu kuyisi’entwadi ye mianda mia mbi. O mavangu momo meyikilwanga vo mpandu, o Nzambi olukisanga asambidi andi muna konso’vangu dia mpandu. O Nkand’a Nzambi utumbanga ‘konso on’ovanda mpandu . . . yovo ngang’a ntombodi, yovo ngang’a moko yovo ngang’a mafwa.’—Nsiku 18:10-12; Ngalatia 5:19-21; Lusengomono 21:8.

Wau vo e mpandu isiang’o muntu ku nsi a wisa kia nkwiya, uyikenga muna mavangu mama mawonso e kana nkia wete nkutu mamoneka. O maka mu mavangu mama i bola de cristal ye pranchetas ouija, PES percepção (estra-sensorial) mfimpa za mbanzala za moko. (Quiromancia) astrologia. E nkwiya mambu mayingi bevanganga yo siang’o mazu muna nzo zina bekitulanga se fulu kiau. Vana ntandu, e mianda miambi bazeye ezolela kia usumuki wa wantu Muna diadi besadilanga kio yo filakesanga wantu mu vanga nkanda, filmes ye songa muna televisão mambu melonganga ntelo za zumba ye maka mavangu mambi.  A nkwiya bazeye mpe vo e ngindu za mbi ovo zilembi katulwa muna ntima zifilanga wantu mu vangang’embi​—nze yau kibeni a nkwiya.​—Etuku 6:1, 2; 1 Tesalonika 4:3-8; Yuda 6.

Dia ludi vo ndonga ke bekwikilanga ko vo e nza yayi iyalwanga kwa mianda mia mbi. Kansi, ka tu salukwa dio ko ekuma vo o Nkand’a Nzambi uvovanga vo: “O Satana yandi kibeni, okukitulanga se mbasi a ntemo.” (2 Korinto 11:14) Ovondanga meso ma wantu muna kubavunginika bakwikilanga vo yani ye nkwiya miandi ke bena ko. Kansi kuvunginikwa ko! O Nkadi ampemba ye nkwiya miandi bena kieleka, o ngeye fwete kubasianga kak’e kitantu.​—1 Petelo 5:8, 9.

Dia kiese vo, kifinamene e lumbu kina o Satana ye buka kiandi ke bekala vo diaka ko! ‘e nza [ye nyadi miandi mia nkwiya] mpe vempoka ivempoka,’ ukavovele Nkand’a Nzambi, “vo i ndion’ovangang’o luzolo lua Nzambi, zing’aka kezinganga yakwele mvu.” (1 Yoane 2:17) Ekwe vevoka kukala vava e wisa kia mbi kivengomonwa! Ozevo mbula tuakala vana vena awana bevangang’o luzolo lwa Nzambi bevwil’o moyo akwele mvu muna nz’ampa ya nsongi ya Nzambi.​—Nkunga 37:9-11, 29; 2 Petelo 3:13; Lusengomono 21:3, 4.

[Foto muna lukaya lwa 4]

Nga Satana wadi lenda kaila e yintinu ya nza kwa Yesu kele vo ka ikadi yandi ko?