E Nkubilwa ya Nz’ampa Musiwa se Ina
Tini kia 11
E Nkubilwa ya Nz’ampa Musiwa se Ina
1, 2. Ameyi tumonanga o unu mevangamanga, yo lungisa ungunza wa Nkand’a Nzambi?
EDIAK’E sivi i diadi, ekolo e nza yankulu ya Satana iyivanga, e nkubilw’a nz’ampa ya Nzambi musiwa ina. Muna meso meto mu mona tuna empila in’o Nzambi kekutikilanga wantu a zula yawonso, yo kubakitula se nkubilwa a kintwadi kiampa ova ntoto kivingila fulu kia nza yayi ya mana vambana. Muna Nkand’a Nzambi, muna 2 Petelo 3:13 e kintwadi kiaki kiampa kiyikilwanga vo, “nz’ampa.”
2 O ungunza wa Nkand’a Nzambi uvovanga mpe vo: ‘Muna lumbu yambaninu [omu lumbu yayi tuzinganga], . . . Nkangu miayingi mikwenda vova vo, Nwiza twatomboka kuna mongo a Yave, [nsambil’andi ya kieleka] . . . katulonga nzila zandi, twakangala muna mayendelo mandi.’—Yesaya 2:2-3.
3. (a) O ungunza wa Yesaya kw’akinani ulunganenanga? (b) O Nkand’a nsuka wa Nkand’a Nzambi aweyi uvovele muna kuma kiaki?
3 O ungunza wau ulungananga muna awana besakalelanga ‘nzila za Nzambi yo kangalela muna mayendelo mandi.’ Muna nkand’ansuka wa Nkand’a Nzambi e kintwadi kia wantu awaya azodi a luvuvamu kiyikilwanga vo “ndong’ayingi . . . yatuka muna zula yawonso, yo makanda, ye nsi, ye ndinga,” kintwadi kia nzolani a ungudi kiatoma yikana yo sadilanga Nzambi kumosi. O Nkand’a Nzambi uvovele mpe vo: “I yau yana batuka muna mpasi zayingi.” I sia vo bevuluka kuna mbaninu a nkubika mavangu mama mambi.—Lusengomono 7:9, 14; Matai 24:3.
Ungudi Wa Kieleka Wa Zula
4, 5. E kintwadi kia ungudi wa Ambangi za Yave munz’amvimba aweyi kilendakenanga?
4 Mazunda ma Mbangi za Yave bevavanga kala e nkala ifwen’e longi dia Nzambi. Bena ye vuvu kia moyo a mvu ya mvu muna nz’ampa ya Nzambi. Wau belemvokelanga nsiku mia Nzambi, lumbu ke lumbu ibesongelanga wuwu kwa Nzambi o luzolo luau luasakalela luyalu luandi tuka unu yamuna nz’ampa. Mwawonso, muna konso zula yovo konso kanda, nsiku miau amimosi belemvokelanga—mina kasikidisa o Nzambi muna Diambu diandi. I diau bavwididi kikilu e kintwadi kia ungudi wa kieleka muna zula yawonso, kintwadi kia nz’ampa, kisemwanga kwa Nzambi.—Yesaya 54:13; Matai 22:37, 38; Yoane 15:9, 14.
5 A Mbangi za Yave ke bekuyisananga ko mu kuma kia kintwadi kia ungudi wau bavwidi muna nz’amvimba. Bazeye wo vo ediadi dilendakananga muna ngolo za mwand’a Nzambi usalanga muna awonso besakalelanga nsiku miandi. (Mavangu 5:29, 32; Ngalatia 5:22, 23) I salu kia Nzambi. Nze i kavov’o Yesu, “oma ke malendakana kwa wantu ko, malendakana kwa Nzambi.” (Luka 18:27) Ozevo, o Nzambi ndiona wasikidisa nsema anzingi, olenda sikidisa mpe e nkala a kintwadi kiaki kia nz’ampa yanzingi.
6. Ekuma kintwadi kia ungudi wa Mbangi za Yave kilenda yikilwa vo s’esivi omu lumbu yayi?
6 I diau vo, tulenda mona e mpila in’o Yave keyadila muna nz’ampa muna monanga una kesilang’e nkubilwa ya nz’ampa. Oma mpe kevanganga kwa Mbangi zandi o unu m’esivi kikilu. Ekuma e? Ekuma kadi omene sia Mbangi za Yave muna kintwadi kia ungudi wa kieleka omu nz’amvimba, eki kina vo kana nkutu mambu ma mpambani za zula, ye nswaswani za makanda, yovo za mabundu ke malenda kubavambula ko. Kanele vo a mazunda ma Mbangi se bena yo zingilanga muna tezo kisundidi e 200 za nsi, batoma yikana muna kangu kia nzolani ya siama. E kintwadi kiaki kia ungudi wau wa nz’amvimba, ke kisidi moneka ko muna lusansu luawonso, i kuma vo se masivi omu tandu kiaki—i salu kia Nzambi.—Yesaya 43:10, 11, 21; Mavangu 10:34, 35; Ngalatia 3:28.
Nzayilwa ya Nkangu a Nzambi
7. Mun’owu wa mvovo mia Yesu, aweyi bezayilwa alandi andi a kieleka?
7 Nkia mpila yakaka ilenda zayilwa o nkangu una kekutikang’o Nzambi se nkubilwa ya nz’andi ampa? Akinani belungisanga e mvovo mia Yesu mina muna Yoane 13:34, 35? Yandi oku vo: “Nkanikinu ampa ikunusia, nuzolaziana; e nzola inuzolele, i nuzolaziananga. Muna wau i bezayil’o wantu awonso vo nu alongoki ame, ovo nzolani nuna yau.” A Mbangi za Yave bekwikilanga muna mvovo mia Yesu yo sadilanga mio. ‘Besiamininang’o zolana,’ nze i una ulongele Diambu dia Nzambi. (1 Petelo 4:8) “Nuvwata zola, kwina vo i kangwa kia zikuka.” (Kolosai 3:14) Ozevo, e nzolani a ungudi i “dimbu” dikubayikanesanga muna nz’amvimba.
8. O 1 Yoane 3:10-12 aweyi diaka kayika uzailwanga o nkangu a Nzambi?
8 Muna 1 Yoane 3:10-12 muvovanga mpe vo: “Muna wau i besengomoken’o wan’a Nzambi, yo wana a Nkadi ampemba mpe: konso on’olembi vangang’owu wansongi ke wa Nzambi ko, ngatu ndion’olembi zolanga mbunzi andi. Kadi, i wau wuwu o nsamu una nwawa tuka kuna lubantiku, ovo, tuzolaziana: ke nze Kaini ko, wina vo, wa ndiona wambi, wavonda mbunzi andi.” Muna diadi o nkangu a Nzambi bavwidi kintwadi kia ungundi omu nz’amvimba, ke akwa nsoki ko.
Mpila yakaka ya Zayila
9, 10. (a) Nkia salu kiadi swaswanisa antaudi za Nzambi omu lumbu ya mbaninu? (b) A Mbangi za Yave aweyi belunganisinanga Matai 24:14?
9 Vena ye mpila yakaka ya zayila antaudi za Nzambi. Muna ungunza wandi wa lumbu ya mbaninu, Yesu wavova mambu mebua omu tandu kiaki se sinsu kia lumbu yambaninu. (Tala Tini kia 9.) Owaka muna ungunza wau wasonama muna Matai 24:14: “E nsangu zazi zambote za kintinu zisamunwa muna nza yawonso, muna umbangi kwa zula yawonso; i bosi iluak’e mbaninu.”
10 Nga mu monanga yo tuna e ndungana a ungunza wau? Elo. Tuka kiayantikil’e lumbu yambaninu muna 1914, a Mbangi za Yave besamunang’e nsangu zambote za Kintinu kia Nzambi muna nza yawonso, muna nzo ke nzo nze i una kakanikin’o Yesu. (Matai 10:7, 12; Mavangu 20:20) Muna zula yawonso, mazunda ma Mbangi bekingulanga wantu muna nzo zau yo kubazayisa oma ma nz’ampa. I kuma kiaki otambuluidi e finkanda fiafi, kadi e salu kia a Mbangi za Yave i nieteka mpe yo mwanga mazunda ma nkanda mivovanga oma ma Kintinu kia Nzambi. Ng’ozeye akaka besamunanga e Kintinu kia Nzambi mu nzo ke nzo mu nza yawonso? Maku 13:10 osonganga vo e nsangu zambote “zateka” samunwinw’ekulu, i bosi mbaninu ikwiza.
Mvutu za Kiuvu Kiampwena ki’Ezole
11. Muna sakalelanga luyalu lua Nzambi nki diaka bevanganga a Mbangi za Yave?
11 Muna sakalelanga e nsiku mia Nzambi, vena diaka ye diakaka bevanganga a Mbangi za Yave. Besonganga vo Satana nkwa luvunu, wau kavova vo o wantu ke balendi songa kwikizi kwa Nzambi ko kele vo batontelo, muna tezo kiaki bevananga e mvutu za kiuvu kiampwena eki ki’ezole kia kwikizi kia wantu. (Yobi 2:1-5) Wau vo kintwadi kia mazunda ma wantu se bena, muna zula yawonso, a Mbangi besonganga e kwikizi kiau muna luyalu lua Nzambi nze to kimosi. Kanele vo wantu kwau alembi lunga, bayisidi kuna sambu dia kimfumu kia Nzambi, kana una vo bebangikwanga kwa Satana.
12. Nani betangininanga a Mbangi, muna lukwikilu luau?
12 O unu o mazunda momo ma Mbangi za Yave beyikanesanga umbangi wau kumosi y’owu wa mbangi za nz’ankulu awana basonga e kwikizi kiau kwa Nzambi. Aki Abele, Noa, Yobi, Abarayama, Sara, Isaki, Yakobo, Debora, Rutu, Davidi yo Daniele muna yika kaka akete. (Ayibere, kapu kia 11) Nze i una uvovele Nkand’a Nzambi, bena se “ntuti a mbangi” za kwikizi. (Ayibere 12:1) Awaya ye akaka, kumosi y’alandi a Yesu, basonga kwikizi kiau kwa Nzambi. O Yesu yandi kibeni i mbandu isundidi muna songa kwikizi walunga.
13. Nkia mvovo mia Yesu mu kuma kia Satana mimonekanga vo mia ludi?
13 Ediadi disonganga vo dia ludi kavov’o Yesu kwa afidi a mabundu mu kuma kia Satana: “Kansi owau nuvav’o kumponda, mono wa muntu inusamunwini e ludi kina yawa vana vena Nzambi . . . Oyeno nu es’eno, wa nkadi ampemba, o maketo m’es’eno, nuzolele mo vanga. Oyandi, mumponda-muntu tuka kuna lubantiku, katelamena muna ludi ko, e kuma kadi, muna yandi ke muna ludi ko. Ovo luvunu kavovele, una wa yandi kibeni i kavovele: kadi nkwa luvunu kwandi, ese mpe dia luvunu.”—Yoane 8:40, 44.
Adieyi o Sola?
14. Adieyi divangamang’o wau mu kuma kia nkubilwa ya nz’ampa?
14 E nkubilwa ya nz’ampa kekubang’o Nzambi muna kintwadi kia zula yawonso kia Mbangi za Yave mu kumama kaka yina lumbu ke lumbu. Konso mvu, nkama za mazunda ma wantu besadilanga o lukau luau lwa nswa a kuyisolela, kuna zayi wawonso, mu tambul’o luyalu lua Nzambi. Bekitukanga akwa kintwadi kia nz’ampa, bekuyisianga kun’esambu dia Nzambi muna diambu dia kimfumu kia nsema wawonso yo songa vo o Satana nkwa luvunu.
15. Nkia mpambula kevangang’o Yesu omu lumbu yeto?
15 Muna solanga luyalu lua Nzambi, mu siwa bena kuna ‘koko kwalunene’ kwa Kristu ekolo kevambanisanga “mameme” ye “nkombo.” Muna ungunza wandi wa lumbu ya mbaninu, o Yesu wavova vo: “Vana kena valungalakena zula yawonsono: kakubavambanisa nga mvungudi ovambanisa mameme ye nkombo: kasia mameme kuna koko kwandi kwalunene, kansi nkombo kuna lumonso.” Mameme i wantu alembama, beyikamanga abunzi a Kristu, muna kubasadisa yo sakalela luyalu lua Nzambi. E nkombo i wantu akwa ntima mia mbadi bebembolanga abunzi a Kristu ye ke bavwidi luyalu lwa Nzambi mfunu ko. Nkia mfutu betambula? Yesu wavova vo: “Awana [a nkombo] bakatuka, benda muna tumbu kia mvu ya mvu: vo i alungi [a mameme], muna moyo a mvu ya mvu.”—Matai 25:31-46.
16. Adieyi ofwete vang’o ngeye mu zingila muna Paradiso ya ku sentu?
16 Kieleka vo, Nzambi utuvwidi o mfunu! Ke kolo kia nda ko, ovanga paradiso ya kiese ova nza. Ozolele zinga muna Paradiso yayi? Ov’ozolele, ofwete yangalela e nkubika zawonso za Yave, yo longoka oma mandi yo vangila mun’owu wawonso olongokanga. “Nutomba Yave wuwu kafwete soloka, numbokela wuwu ken’omu ngenga: mbula kimpumbulu kasisa fu yandi, yo mumpanga-mayi e ngindu zandi: kavutuka kwa Yave, okumfw’e nkenda.”—Yesaya 55:6, 7.
17. Ekuma kufwete sakisil’e ntangwa ko muna sola on’osadila?
17 Ke tusakis’e ntangwa ko. E mbaninu a tandu kiaki ifinamene. E Diambu dia Nzambi dilonganga vo: “Ke nuzodi nza ko, ngatu eyi in’omu nza. Ovo muntu ozol’e nza, o zola kw’Ese ke kwina mu yandi ko. . . . E nza mpe vempoka ivempoka, y’eketo diandi: vo i ndion’ovangang’o luzolo lua Nzambi, zing’aka kezinganga yakwele mvu.”—1 Yoane 2:15-17.
18. Adieyi dikusadisa mu zizila ye vuvu kia zinga muna nz’ampa ya Nzambi?
18 O nkangu a Nzambi mu longwa se bena oma ma moyo a mvu ya mvu muna nz’ampa. Muzikuka bena muna zayi wa mwanda yo maka mambu ma mfunu ma lunungunuku lua paradiso. Tuwondelele wasola Nzambi se Nyadi aku yo sal’e salu kivuluza mioyo kina kesadisang’o unu omu nza yawonso. Longoka Nkand’a Nzambi y’Ambangi za Yave, wazaya Nzambi ona uvwidi kielek’o mfunu on’osinga manisa e mpasi. Ozevo olenda kala mpe se mosi muna nkubilw’a nz’ampa. Olenda si’evuvu kia lungiswa kwa Nzambi, yo zinga yakwele mvu muna nza yayina yampa y’esivi.
[Yuvu ja longokela]
[Foto ina muna lukaya 31]
A Mbangi za Yave bavwidi kintwadi kia wan’angudi mu nza yawonso
[Foto ina muna lukaya 32]
E nkubilwa ya nz’ampa ya Nzambi musiwa se ina
