Tini kia 8

Ekani Dia Nzambi Difinamene o Lungana

1, 2. Nkia nkubika kevanganga Nzambi muna manisa e mpasi?

TUKA kolo o luyalu lua wantu y’olu lua nkwiya lutwese mpasi zayingi kwa kanda dia wantu. Kansi kadi, e mpasi zeto ke zivilakeno ko kwa Nzambi. Elo, e kolo kiokio kiawonso, okubikanga una kavevolwel’o wantu muna wisa kia mbi ye mpasi.

² Vava ntelameno yakota muna Edeni, o Nzambi wayantika sengomona ekani diandi dia sikidisa luyalu luna lukitula o ntoto wau se paradiso mu kuma kia wantu. (Etuku 3:15) I bosi, o Yesu wa nkunzi a Nzambi wakitula o luyalu lualu lwa Nzambi lwa kusentu se ntu elongi diandi. Wavova vo luau kaka i vuvu kia kanda dia wantu.—Daniele 2:44; Matai 6:9, 10; 12:21.

3. O Yesu nkia nkumbu kayikil’o luyalu lua nza lwa kusentu, ye mu nkia kuma?

³ Yesu wayikila o luyalu lolo lua Nzambi vo “kintinu ki’ezulu,” ekuma kadi e kunda kiandi kun’ezulu i kikala. (Matai 4:17) Wayikila kio mpe vo “kintinu kia Nzambi,” ekuma kadi o Nzambi i Tuku dia luyalu lolo. (Luka 17:20) E tandu yawonso yavioka, o Nzambi wavumunwina asoneki andi basoneka ungunza wasonganga awana bekala mu luyalu lolo ye salu luvanga.

Ntinu a Mpa wa Nza

4, 5. Aweyi kasongela Nzambi vo Yesu i Ntinu andi ona keyangalelanga e?

⁴ Se vioka mazunda mole ma mvu, Yesu i walungisa o ulolo wa unguza wavovanga mu kuma kia ndiona okala se Ntinu mu Kintinu kia Nzambi. Wasonga vo yandi i wasolwa kwa Nzambi mu kala se Nyadi a wantu mu luyalu lolo lu’ezulu. Una kafwa, o Nzambi wafula Yesu yo kumvana moyo kun’ezulu se vangwa kia nkuma kia mwanda, ulembi fwanga. Vakala ye mbangi zayingi za lufuluku lw’andi.—Mavangu 4:10; 9:1-9; Roma 1:1-4; 1 Korinto 15:3-8.

⁵ Tuka kina, Yesu “ovwende kuna koko kwalunene kwa Nzambi.” (Ayibere 10:12) Kwakuna kavingila e ntangwa ina kadi yadikwa kwa Nzambi nze Ntinu muna Kintinu kia Nzambi kie’zulu. Ediadi dia lunganisa ungunza wa Nkunga 110:1, una kavoveswa kwa Nzambi vo: “Vwand’oku koko kwame kwalunene yavana nsi mbeni zaku se nsikinw’a tambi yaku.”

6. Aweyi kasongela o Yesu vo wafwana mu kala Ntinu a Kintinu kia Nzambi?

⁶ Vava kakal’ova ntoto, Yesu wasonga vo wafwana va fulu kiokio. Kanele vo wabangikwa, osongele ziku kiandi kwa Nzambi. I kasongela wuwu vo o Satana nkwa luvunu wau kavova vo, ke vena muntu ko olenda sadila Nzambi muna ntangwa mpasi. O Yesu, wa muntu alunga, o ‘Adami wa nzole,’ wasonga vo o Nzambi kavanga vilwa ko muna mpanga kavang’o wantu alunga.—1 Korinto 15:22, 45; Matai 4:1-11.

7, 8. Nkia mambu mambote kavang’o Yesu vava kakal’ova ntoto, muna diadi nki kasonga?

⁷ Nkia nyadi wavenge kala o wete nze i una kavanga o Yesu muna mvu miakete mia uselo wandi? Muna ngolo za mwand’avelela a Nzambi, Yesu wawuka akwa mayela, avanguki, mpofo, afwa matu, yo mababa. Wafula nkutu o mafwa! I kasongela wuwu fiakete owu kevangila mawonso kwa wantu vava keyadikwa se Ntinu a Kintinu.—Matai 15:30, 31; Luka 7:11-16.

⁸ Vava kakal’ova ntoto o Yesu, mambu mayingi mambote kavanga mena vo o Yoane wa ntumw’andi wavova vo: “Vena mpe yo mambu mengi makaka, mana mavanga Yesu, mana mena vo, ovo masonama mawonso edi mbenze vo e nza kibeni ke ifwani nkanda miasonama ko.”—Yoane 21:25. *

9. Ekuma o wantu akwa ntima mia ziku bayendelanga kwa Yesu?

 ⁹ Yesu wakala nkwa unsongi ye nkenda, wazolanga kikilu o wantu. Wasadisa asukami y’abangami, kansi kavezele amvwama ngatu a mfumu ko. Akwa ntima mia ziku batambulwil’e mbok’anzolwa ya Yesu una kavova vo: “Nwiz’oku ngina, yeno awonso nufuntukanga yo bimuka yo mazitu, ikunuvundisa. Nuvwata vangu kiame, nwalongwa kwa mono; kadi i nlembami yo ntim’anleka: nwasolola vundu kia mioyo mieno. Kadi vangu kiame kiambote, enatu diame diampevo.” (Matai 11:28-30) Amimpumina Nzambi bayizanga kwa yandi yo sia vuvu muna luyalu luandi.—Yoane 12:19.

Ana Beyal’eNtwadi

10, 11. Nani okal’entwadi yo Yesu mu yal’o ntoto?

¹⁰ Nze wauna tuyalu tua wantu tukalanga yo wantu besalanga kumosi, i una mpe muna Kintinu kia Nzambi ki’ezulu. Vena y’akaka beyal’e nza kumosi yo Yesu, kadi o Yesu, wasia o nsilu kw’akw’andi vo beyala yandi kumosi s’atinu.—Yoane 14:2, 3; Lusengomono 5:10; 20:6.

¹¹ Ozevo, kumosi ye Yesu, lutangu luandwelo lwa wantu befulwa mu vwil’o moyo kun’ezulu. Awaya i bekala muna Kintinu kia Nzambi eki kitwas’e nsambu zakwele mvu kwa wantu. (2 Korinto 4:14; Lusengomono 14:1-3) Ozevo se tuka kolo, o Yave okubanga nkubilwa ya luyalu lutwasa nsambu zakwele mvu kwa kanda dia wantu.

 Mfoko ya Luyalu lua Vaudi

12, 13. E Kintinu kia Nzambi nki kikubamen’o vanga?

¹² Omu tandu kiaki, Nzambi osalanga muna mambu ma nza. Nze una usonga Tini kia 9 kia finkanda fiafi, o ungunza wa Nkand’a Nzambi usonganga vo Kristu wayadikwa muna Kintinu kia Nzambi mu mvu wa 1914 o wau wakubama kena mu fukisa nkubika yawonso ya Satana. E Kintinu kiaki kiakubama kina mu “yala muna mwina mbeni” za Kristu.—Nkunga 110:2.

¹³ O ungunza wa Daniele 2:44 uvovele muna kuma kiaki: “Muna lumbu y’atinu awana [ayalang’o unu], o Nzambi ezulu otongeka kintinu [kun’ezulu], kina ke kibangalakeswa ko yakwele mvu, ngatu vingilwa untinu wandi kwa nkangu akaka [ke veyala diaka luyalu lua muntu ko]; kansi [e Kintinu kia Nzambi] kikosomona yo sukisa yintinu yayi yawonso, kitongama mpe yakwele mvu.”

14. E mfukisw’a luyalu lua muntu nkia ndandu itwasa?

¹⁴ Vava kimana fukiswa o tuyalu tuawonso tun’evaudi ye Nzambi, o luyalu lua Kintinu kia Nzambi luyal’e nza ibosi lusikila. Wau vo o lumbu lwa Kintinu ku’zulu lwina, ke kiyiviswa nkutu kwa wantu ko. E wisa kia luyalu kikala kun’ezulu, kuna kiateka kala, kwa Nzambi. Wau vo o luyalu lua Nzambi luyala o ntoto wawonso, ke vekala diaka muntu ovunginikwa kwa mabundu ma luvunu ko, yovo ndongota za wantu ngatu mambu ma tuyalu twa nza. Mambu mama ke meyambulwilwa diaka ko.—Matai 7:15-23; Lusengomono, kapu kia 17 yaku 19.

[Mvovo ku yanda dia lukaya]

[Yuvu ja longokela]

[Foto ina muna lukaya 18]

Una kakal’ova ntoto Yesu wawuka e mbevo, wafula mafwa muna songa oma kevanga muna nz’ampa

[Foto ina muna lukaya 19]

E Kintinu ki’ezulu kia Nzambi kifukis’o tuyalu tuawonso tun’evaudi yo yandi