Ekum’o Nzambi Kayambulwil’e Mpasi
Tini kia 6
Ekum’o Nzambi Kayambulwil’e Mpasi
1, 2. Amase meto mantete aweyi bayivisila lubantiku luambote kabavan’o Nzambi?
ADIEYI dia yiva? Adieyi dia bwa dia fwasa lubantiku luambote luna kavan’o Nzambi kwa mase meto mantete muna Paradiso a Edeni? Ekuma venena mambi ye mpasi ke mu Paradiso ya ungudi yo luvuvamu ko?
2 Ekuma kadi Adami yo Eva basadila o nsw’au a kuyisolela mu mpila yambi. Bavilakana edi dia sia vo ke bavangwa mu zinga ye kiese kondwa kwa Nzambi ye nsiku miandi ko. Bazola kuyifila yau kibeni ke mu Nzambi ko, yo banza vo i badi zingila kiambote. Muna diadi, balutakana tezo kina kabasila o Nzambi kia nswa a kuyisolela.—Etuku Kapu kia 3.
Diambu dia Kimfumu kia Nza Yawonso
3-5. Ekum’o Nzambi kalembi fwasila Adami yo Eva yo vanga akaka?
3 Ekum’o Nzambi kalembi fwasila Adami yo Eva yo vanga yakala yo nkento akaka? Mu kuma kia kimfumu kiandi i sia vo wisa kiandi kia yala kiafidisw’e mpaka.
4 E diambu diakala vo i diadi: Nani ofwene yala, ye luyalu lua nani i lua nsongi? Wau kina vo o yandi i mpungu-ngolo ye Mvangi a yawonso ozevo o Nzambi wina yo nswa a yala. Wau vo wazala ye ngangu, o luyalu luandi i luambote muna yal’evangwa yawonso. Kansi o luyalu lua Nzambi lua fidisw’empaka. Nga mwakala ye konso fu yovo twangu muna vangwa kiandi—muntu? Ibosi tufimpa dio kuntwala yo zaya kana dina ye kuma muna ziku kia muntu.
5 O muntu wau kayivaula muna wisa kia Nzambi dia twasa diaka kiuvu kia kaka: Nga wantu balenda kuau kala kiambote lembi yalwa kwa Nzambi? Kieleka o Mvangi wayizayil’e mvutu, kansi kinumana vo o wantu bayibakwila yau kibeni, i kabavanina luvevoko muna mawonso una bazola. Bayisolela e nzila yayi mu luzolo lwa yau kibeni, i ngyambula kabayambul’o Nzambi.
6, 7. O Nzambi nkia kuma kayambulwila mvimba o wantu yo luvevoko lwa kolo kiayingi?
6 Muna van’e ntangwa yafwana kwa wantu ya vwa luvevoko lwawonso, i kemanin’o Nzambi yakwele mvu e diambu diadi yo songa kana vo o wantu bafwete yalwa kwa Nzambi yovo kuyiyala yau kibeni. Vafwana vewa ntangwa yanda kinumana o wantu bavanga mawonso balenda yakuna nsuka muna nsala zau za mambu ma luyalu, y’oma ma lunungunuku lua zayi, y’oma ma zayi wau wa unganga wa wuka yimbevo.
7 Muna diadi i kayambulwil’o Nzambi o muntu yamu unu, muna songa kana valenda kala ye ndandu muna luyalu lua muntu kondwa kwa Nzambi. Ozevo, o muntu olendanga sola unsongi yovo kondwa nkenda, zola yovo menga, ndungidi yovo vilwa. Kansi o muntu otambulanga mpe o nsendo a nsol’andi: unsongi yo luvuvamu yovo mbi ye mpasi.
Ntelamena ya Vangwa ya Mianda
8, 9. (a) O telamena Nzambi aweyi kwa yantikila muna nza a kimwanda? (b) Vana ntandu Adami yo Eva nani diaka kafilakes’o Satana mu telamena?
8 Vena ye diakaka difwete zayakana. Mase meto mantete ke yau kaka ko batelamena luyalu lwa Nzambi. Nga nani diaka wazinganga muna ntangwa yayina? Vangwa ya mianda. Una kavangidi o wantu ko, o Nzambi wavanga vangwa ya moyo isundidi o muntu, ulolo wa mbasi mu zingila muna nza ya kimwanda. Yau mpe bavwidi o nswa a kuyisolela ye bafwete yalwa mpe kwa Nzambi.—Yobi 38:7; Nkunga 104:4; Lusengomono 5:11.
9 O Nkand’a Nzambi usonganga vo o ntelameno mu nza ya kimwanda wa yantikila. Mosi muna vangwa ya mwanda wazola luvevoko lwamvimba. Wazola nkutu vo o wantu bansambila. (Matai 4:8, 9) Evangwa kiaki kiambi kia mwanda kiafilakesa Adami yo Eva muna telamena Nzambi, wabavuna vo o Nzambi lekwa kiambote kabaswekanga. (Etuku 3:1-5) I kuma kiaki keyikiluanga vo Nkadi ampemba i sia vo (Nkumbi) yo Satana i sia vo (Ntantu). Oku kwakwiziwa wafilakesa diaka vangwa yakaka ya mianda muna telamena Nzambi. Awaya i se beyikilwanga vo nkwiya.—Nsiku 32:17; Lusengomono 12:9; 16:14.
10. E ntelameno a wantu ye ya vangwa ya mianda nkia ndandu yatwasa?
10 Wau batelamena Nzambi, o wantu bayisia muna wisa kia Satana ye nkwiya miandi. I kuma kiaki o Satana keyikilwanga muna Nkand’a Nzambi vo “nzambi a tandu kiaki,” ona ‘ovondanga meso ma ntima mia awana ba kondwa lukwikilu.’ Muna kuma kiaki e Diambu dia Nzambi i divovelanga vo “e nza yawonso muna mbi ilele.” O Yesu yandi kibeni wayikila Satana vo “nkuluntu [nyadi, NM] a nza yayi.”—2 Korinto 4:4; 1 Yoane 5:19; Yoane 12:31.
Mambu Mole
11. O Satana nkia diambu diaka kafidila e mpaka kwa Nzambi?
11 Satana watelamesa diambu diakaka muna fidisa Nzambi e mpaka. Elo, wavunisa Nzambi mu sia vo o wantu ka basemwa mu mpila yafwana ko, muna diadi ke vena muntu olenda vanga edi diansongi ko muna ntangwa mpasi. Elo, yandi oku vo muna ntangwa mpasi o wantu bebembola Nzambi. (Yobi 2:1-5) Muna diambu diadi o Satana wasia mpe e ziku kia wantu mu lukatikisu.
12-14. E mpioka kolo aweyi yadi songela e ludi kia ngyuvu zau ezole za Satana?
12 Muna kuma kiaki, Nzambi wavana ntangwa yafwana kinumana vo evangwa yawonso ya ngangu bamona una disinga fokokela e diambu diadi, ye diambu dia kimfumu kia Nzambi. (Tezanisa ye Luvaiku 9:16.) Oma madivangama kusentu muna lusansu lua zingu kia wantu i madi songa e ziku muna ngyuvu zazi zau ezole.
13 Oku ntwala, nga adieyi dimoneka mu kuma kia kimfumu kia Nzambi yo unsongi wa luyalu luandi? O wantu nga belenda kwau kukiyala kiambote ke mu yalwa kwa Nzambi ko e? Nga vena ye konso nkubika a luyalu lua muntu kondwa kwa Nzambi lulenda sikidisa nza ya kiese ya kondwa vita, kondwa umpumbulu, yo vilwa? Nga vena ye luyalu lulenda manis’o usukami yo twasa mawete kw’awonso? Yo manisa mayela, yo ununu yo lufwa? O luyalu lua Nzambi luakubama o vanga mama mawonso.—Etuku 1:26-31.
14 Muna mpioka kolo dieyi diadi moneka mu kuma kia ziku kia muntu? Nga muna ye vilwa muna mpanga kavang’o wantu o Nzambi? Nga valenda moneka oyu olenda vanga unsongi muna ntangu a lutonto? Nga vadi kala yo wantu beyangalela luyalu lua Nzambi ke mu olu lua muntu ko?
[Yuvu ja longokela]
[Foto ina muna lukaya 13]
Nzambi wavana ntangwa kwa wantu muna vanga mawonso muna nsala zau
[Avwe a Foto]
Shuttle: Based on NASA photo
