Nga Nzambi Utuvwidi Kielek’o Mfunu?
Tini kia 1
Nga Nzambi Utuvwidi Kielek’o Mfunu?
1, 2. Nkia ngyuvu beyuvulang’o wantu mu kuma kia Nzambi, mu nkia kuma?
NANGA wakiyuvula kala muna zingu kiaku: ‘Vo vena ye Nzambi ona utuvwidi kielek’o mfunu, ekuma kayambulwil’e mpasi?’ Yeto awonso twamona kal’e mpasi yovo tuzeye mosi ona wamon’e mpasi.
2 Dia ludi, tuka kolo wantu bemonang’e mpasi ye kinkenda mu kuma kia vita, nsoki, umpumbulu, vilwa, usukami, mayela, ye mfwa z’azolwa au. Mu tandu kieto kia 20, e vita yavondele vioka 100 za mazunda ma wantu. Zak’e nkama za mazunda bavanguka yovo vidisa nzo yo mavwa mau. Mambu mayingi ma mpasi mevangamang’omu lumbu yeto, metwasanga ntantu zayingi, dilu, yo dimbul’e vuvu kia wantu ayingi.
3, 4. Adieyi bebadikanga akaka, wau vo Nzambi wayambula vo e mpasi zakala?
3 Ndonga bekendalalanga yo badika, vo Nzambi una, katuvwidi kweto mfunu ko. Akaka mpe bebadikanga vo o Nzambi kena ko. Kasikil’owu, muntu mosi wabangikwa yo fwilw’e yitu y’akundi andi mu ntantani za makanda mu Vita Antete ya Nz’amvimba, wayuvula: “Akweyi kakal’o Nzambi vava twamvw’o mfunu?” Mosi mpe wavuluka muna mpondwa ya mazunda ma wantu kwa esi Nazista mu Vita ya Zole ya Nz’amvimba, wakendalala mu kuma kia mpasi ye wavova vo: “Konso on’ofiata o ntim’ame, kafwete yela.”
4 I wau, ndonga ke bevisanga ko ekum’o Nzambi ambote kayambulwila mambi mavangamanga. Bekatikisanga kana yandi una, ye kana utuvwidi kielek’o mfunu. Ndonga bebanzanga vo o mambi kala kaka mekala.
[Yuvu ja longokela]
