Tini kia 5

Nswa a Kuyisolela Lukau Lw’esivi

1, 2. Nkia lukau lu’esivi tuvwidi muna nkal’eto?

MUNA bakula ekuma kayambulwil’e mpasi o Nzambi yo zaya owu kevanga muna diambu diadi, tufwete teka zaya e mpila katuvangila. Nzambi katuvana kaka nitu yo tomfo ko. Kansi watuvana mpe nyindu ye ntona.

² Tuvwidi ntona ye nyindu mu kuma kia nswa a kuyisolela. Elo, Nzambi watuvana o luvevoko lwa kuyisolela. Lukau lu’esivi katuvana.

Aweyi Twavangilwa

3-5. Ekuma tuzolelanga o nswa a kuyisolela?

³ Tutala ekuma o luvevoko lualu lulenda kutusadisila mu bakula ekuma kayambulwil’e mpasi o Nzambi. Teka yindul’edi: Nga ozolanga kuyisolela edi ovanga, y’edi ovova, nki odia yovo nki ovwata, nkia salu osala, akweyi ye aweyi ozingila? Yovo ozolanga vo bavovesanga kaka din’ofwete vova, yo din’ofwete vanga muna zingu kiaku kiawonso?

⁴ Ke vena muntu ko ozolanga vo katuminwanga muna mawonso kevanga muna zingu kiandi. Mu nkia kuma? Mu kuma kia mpila twavangilwa kwa Nzambi. Nkand’a Nzambi ukutusonganga vo Nzambi wavanga muntu muna ‘mpwa ye fwaniswa’ kiandi, o Nzambi ovwidi e wisa kia kuyisolela. (Etuku 1:26; Nsiku 7:6) Una kavang’o wantu, wabavana mpe elau diadi di’esivi—nswa a kuyisolela. E kiaki i kuma ka tuyangalelanga bundunwa kwa ayadi a abangiki ko.

⁵ Ozevo o luzolo lwa vevoka ke lwa nkatu ko, kansi i mu kuma kia sia vo o Nzambi i Nzambi a luvevoko. O Nkand’a Nzambi uvovele vo: “Kuna kwin’o Mwand’a Mfumu [Yave, Tradução do Novo Mundo das Escrituras Sagradas], i kwin’o vevoka.” (2 Korinto 3:17) Ozevo, muna nkal’eto Nzambi watuvana o nswa a kuyisolela. Wau vo yandi wazaya owu usadila e nyindu ye ntona zeto, wazaya mpe  vo okala ye nswa a kuyisolela kutoma kutuyangidika.

6. Nkia mpila kavangil’o tomfo tweto o Nzambi mu lungisa ezolela kia kuyisolela?

⁶ Kumosi yo lukau lua vwa nswa a kuyisolela, o Nzambi watuvana mpe e ngangu za yindula, za mik’o mambu, yo kuyibakil’e nzengo, yo swaswanisa o wete yo bi. (Ayibere 5:14) Ozevo, o nswa a kuyisolela se ufwete sadilwa mu ngangu. Ke twavangwa nze teke ko yafwanana yo muntu yakondw’o nyindu yo kondwa zolela. Ngatu vangwa nze bulu yakondw’o zayi. Kansi, o tomfo tweto tw’esivi twavangwa mu sal’entwadi yo luvevoko lueto lua kuyisolela.

Lubantiku Lwa Mbote

7, 8. Nkia lubantiku luambote kavan’o Nzambi kwa mase meto mantete?

⁷ Muna songa vo Nzambi wavw’o wantu o mfunu ka vana kaka lukau lua nswa a kuyisolela ko, kansi wavana mpe kwa mase meto mantete Adami yo Eva, yawonso in’o mfunu kwa muntu. Basiwa muna paradiso yampwena, nze mpatu. Bakala yo madia mayingi. Bavwa nyindu yo nitu zalunga, i sia vo ke badi nuna ko, yovo yela ngatu fwa—badi zinga yakwele mvu. Badi wuta wana alunga, aya badi vwila mpe e zingu kia kiese kia kwele mvu. O nkangu wawonso wadi sadila kuna kiese, yo kitula ntoto yawonso se paradiso.—Etuku 1:26-30; 2:15.

⁸ Muna yina bavewa, o Nkand’a Nzambi usonganga vo: “O Nzambi omwene yawonso kavangidi, yambote kikilu.” (Etuku 1:31) Mu kuma kia Nzambi o Nkand’a Nzambi uvovele mpe vo: “O mavangu mandi malunga.” (Nsiku 32:4) Elo, o Mvangi lubantiku lwalunga kavana kwa kanda dia wantu. Ke vena wete disundidi e diadina ko. I kasongela wuwu o Nzambi vo utuvwidi kielek’o mfunu!

Luvevoko Muna Tezo

9, 10. O nswa a kuyisolela nkia kuma ufwete kadila kunsi a nsiku?

⁹ Nga ukakan’o Nzambi vo o nswa a kuyisolela wakondwa nsuka? Se badiki vo una muna mbanza yazala yo makalu kondwa kwa nsiku mia nzila, konso ekalu dia kangala mu nswalu yo landa konso nzila eyi kazolele. Nga lenda tonda okangala y’ekalu diaku mu tezo kiaki? Ve, ekuma vo i dia mvwangalakani, ye mpe dilenda twasa vonza yanene.

¹⁰ Diau adimosi mpe yo lukau lwa Nzambi lwa nswa a kuyisolela. O luvevoko luakondw’o nsiku i vonza kianene vana kati kwa wantu. Vafwete kala yo nsiku mifwete fila e salu ya wantu. E Diambu dia Nzambi divovele vo: “Nze ana bavevoka, ke mu kala yo vevoka nze fukwa kia umpumbulu.” (1 Petelo 2:16) Nzambi ozolele vo o nswa a kuyisolela wakala kunsi a nsiku mu kuma kia wete di’awonso. Yandi katuvana luvevoko lwamvimba ko kansi muna tezo, twasakalel’o nsiku.

 Nsiku Mia Nani?

11. Twavangwa mu lemvokela nsiku mia nani?

¹¹ Twavangwa muna lemvokela nsiku mia nani? E yak’e ndambu a tini kia 1 Petelo 2:16 ivovele vo: “Nze ntaudi [abundu, NM] za Nzambi kaka.” Ediadi ke disongele ko vo umbundu wa bangikwa, kansi twavangwa mu vwila kiese avo tulemvokela nsiku mia Nzambi. (Matai 22:35-40) Nsiku miandi, mivananga luludiku lua nsongi, ke mu konso nsiku miavangwa kwa wantu ko. “Omono i Yave wa Nzambi aku, on’okulong’oma ma mfunu, yo kufila muna nzila in’ofwete kwenda.”—Yesaya 48:17.

12. Nkia luvevoko lua sola tuvwidi muna nsiku mia Nzambi?

¹² E nsiku mia Nzambi, mivananga luvevoko lua kuyisolela kansi muna tezo. Ediadi ditwasanga wete wa mpila zayingi yo yangidika kanda dia wantu. Yindula o ulolo wa madia ma mpila mu mpila mena mu nza yawonso, mvwantu, nkunga, salu ye nzo. Kieleka vo muna mawonso mama tuzolanga kuyisolela konso eki tuzolele ke mu solelwa kwa muntu akaka ko.

13. Nkia nsiku mia nsema tufwete lemvokela muna wete dieto?

¹³ Ozevo twavangwa mu kala ye kiese kiafwana ovo tusakalelele e nsiku mia Nzambi mu kuma kia wantu. Diau adimosi ye ndemvokela tufwete lemvokela nsiku mia nsema mina kasia o Nzambi. Kasikil’owu, ovo olembi lemvokela nsiku mia gravidade, wayituba ova nsi, luala oluala yovo olenda fwa. Ovo mpe tulembi lemvokela nsiku mia nitu eto yo lembi dia, yovo nua, yovo fulumuna, fwa tufwa.

14. Aweyi tuzayidi vo wantu ke bavangwa muna kuyifila kondwa kwa Nzambi ko?

¹⁴ Wauna twavangilwa mu lemvokela nsiku mia Nzambi emi mia zingu kieto, twavangilwa mpe mu lemvokela e nsiku mia Nzambi emi mia kiwuntu ye mina mia nkal’eto ye akw’eto. (Matai 4:4) O wantu ka bavangwa mu kuyifila ko yo kala kiambote kondwa kwa Mvangi au. O Yeremiya wa ngunza wavova dio vo: “E nzil’a muntu ke ina muna yandi ko: ngatu singikila ntambi zandi o munduti-a-nzila. E Yave, undonga.” (Yeremiya 10:23, 24) Ozevo, muna mawonso o wantu bavangwa kimana bayalwa kwa luyalu lua Nzambi ke lua yau kibeni ko.

15. E nsiku mia Nzambi nga zitu diadi kala kuna kwa Adami yo Eva?

¹⁵ O lemvokela nsiku mia Nzambi ke diakala dia mpasi ko kwa mase meto mantete. Kansi, wete diadi twasa kwa yau ye kwa kanda diawonso dia wantu. Kele vo o yakala yo nkento antete bavangila mawonso muna tezo kia nsiku mia Nzambi, mawonso mambote madi kala. Kieleka, nga tuna ye zingu kia mawete ye kiese, muna paradiso yo kal’ekintwadi nze wan’a ngundi! Ke kwadi kala mambi ko, ngatu mpasi yovo lufwa.

[Yuvu ja longokela]

[Foto ina muna lukaya 11]

O Mvangi wavana lubantiku lwalunga kwa wantu

[Foto ina muna lukaya 12]

Nga otonda kangala ye kalu diaku muna nzila y’evwanga yakondwa nsiku?