Nza Yakondwa Mpasi
Tini kia 2
Nza Yakondwa Mpasi
1, 2. Nkia ngindu zina ye ndong’a wantu?
KANSI kadi, muna nza yawonso mazunda ma wantu mbadika yaswaswana se bebadikanga. Bena ye vuvu kia vwa nsambu z’esivi za kusentu. Bevovanga vo ke kolo kianda ko kisidi, vekala nza yakondwa mpasi ye mbi, vava ntoto kibeni. Bena ye vuvu vo ke kolo ko o mambi mesuka, ye vesikidiswa nz’ampa. Bevovanga nkutu vo e nkubilw’a nz’ampa yoyo mu siwa se ina!
2 Wantu awaya bekwikilanga vo, e nz’ampa ke ikala vita ko, ngatu nsoki, umpumbulu, vilwa, yo usukami. Ikala nza yakondwa mayela, yakondwa nkenda, yakondwa dilu, ngatu lufwa. Muna ntangwa yayina o wantu bekala balunga yo zingila muna kiese yakwele mvu mu paradiso ova ntoto. Awana mpe bafwa befulwa yo vew’elau dia zinga yakwele mvu!
3, 4. Ekuma wantu awaya bavwididi lusikidisu lua ziku muna ngindu zau?
3 Nga ndozi kwandi yovo kuyivuna o mambu mama ma kusentu? Ve, ke ndozi ko. Dia lukwikilu lwa kieleka luna ye nkubilwa ya sikila ya sia vo e Paradiso isikidiswa. (Ayibere 11:1) Ekuma benena ye ziku kia mpila yayi? Ekuma kadi mpungu-ngolo wa Mvangi a nsema okanini wo.
4 Mu kuma kia nsilu mia Nzambi, o Nkand’a Nzambi uvovele vo: “Ke vakulukidi diambu ko muna mawonso mambote kavova Yave wa Nzambi eno muna diambu dieno; mawonso malunganini oko nwina, ke vakulukidi diambu ko.” “O Nzambi ke muntu ko kavuna; . . . Ovo ovovele, kevanga wo ko e? Ovo osungwidi, kesikidisa wo ko e?” “O Yave a vu odidi ndofi, oku vo, Kieleka una mbadikidi, i una ukala; una nkanini, i una usikila.”—Yosua 23:14; Ntalu 23:19; Yesaya 14:24.
5. Nkia ngyuvu ifwete vaninw’e mvuntu?
5 Kansi, wau vo ekani dia Nzambi dia sikidisa e paradiso ova ntoto yakondw’e mpasi, ozevo nkia kuma se kayambulwil’o mambi mavangamanga? Ekuma kavingidi mazunda sambanu ma mvu muna singik’edi dia mbi? O ulolo wa mvu miami mia mpasi, nga ke misonganga ko vo o Nzambi katuvwidi kweto mfunu ko yovo kena kwandi ko?
[Yuvu ja longokela]
