Tini kia 4

Nzambi Okutuzayisang’ekani Diandi

1, 2. Aweyi tuzayidi vo Nzambi ovanang’emvutu za yuvu y’akwa ziku?

O NZAMBI anzolwa osengomonang’ekani diandi kw’awana bekuntombanga mu ziku kiawonso. Ovananga mvutu za ngyuvu za wantu nze i zazi, ekuma kayambulwil’e mpasi.

² O Nkand’a Nzambi uvovanga vo: “Ovo okuntomba [Nzambi], osolok’oko wina.” “Vena yo Nzambi kun’ezulu, on’ofukula mbumba.” “O Mfumu Yave kevanga uma ko, kansi osengomon’aka mbumb’andi kwa ntaudi zandi angunza.”—1 Tusansu 28:9; Daniele 2:28; Amose 3:7.

Akweyi Zina E Mvutu?

3. Akweyi tulenda bakila e mvutu za kuma kin’o Nzambi kayambulwil’e mpasi?

³ E mvutu za ngyuvu nze i zazi za kuma kayambulwil’e mpasi o Nzambi ye aweyi kevanga mu kuma kiokio, zasonama muna nkanda una kavumunwina mu kuma kia wete dieto. O lusansu lolo i Diambu diandi, Nkand’a Nzambi. “E sono yawonso yavumunwinwa kwa Nzambi, ina yo mfunu mpe muna longa, muna tumba, muna ludika, yo muna nsansa ina ya nsongi: o muntu a Nzambi kakunkuka, katoma kubamena muna salu yawonso yambote.”—2 Timoteo 3:16, 17.

4, 5. Nki kiswaswanisang’o Nkand’a Nzambi?

⁴ O Nkand’a Nzambi i nkanda ulembi tezaniswa. Usamunanga oma ma kieleka ma lusansu lua muntu, yo samuna oma mantete una nkutu ke kivangilu o muntu ko. Usamunanga mpe oma ma unu, ekuma ungunza wandi ulungananga muna mambu mevangamang’o unu, y’oma ma kusentu.

⁵ Ke vena nkanda akaka ko usamunanga o lusansu lua kieleka nze i wau. Kasikil’owu, e nkanda mia asoneki a tusansu twa nza mina miankulu miasonamena mu moko ke miasala diaka miayingi ko. Kansi vena yo ulolo wa sono ya moko ya Nkand’a Nzambi, yakaka ndambu, eyaka yamvimba: Tezo kia 6.000 mia Sono mu Kiyebere (39 ma nkanda mia “Luwawanu Luankulu”) ye tezo kia 13.000 mia Sono ya Kikristu mu Kingerekia (27 ya nkanda mia “Luwawanu Luampa”).

6. Ekuma tufwete kwikidila vo Nkand’a Nzambi wa unu kiaki ufwananene yo una wakala vava kavumunwina wo Nzambi?

⁶ O Nzambi a Mpungu ngolo, wavumunwin’o Nkand’a Nzambi, wavanga mpe vo o mambu mandi ma kieleka malundwa muna sono yoyo ya moko. Ozevo, e Nkand’a mieto mia Nzambi mia unu mia toma fwanana ye sono yantete ina yavumunwinwa. Ekiak’e kuma muna kwikila dio i kia sia vo eyak’ebabu ya sono yamu moko ya Sono ya Kikristu mu Kingerekia yasonama vioka kaka nkama mvu ku nima sono yantete. Efi nsadiswa fia sono y’asoneki a tusansu twa nza eyi ya moko ke yasonekwa tandu kifinamene sono yantete ko.

Lukau Lwa Nzambi

7. Nkia tezo wamwanganina o Nkand’a Nzambi?

⁷ O Nkand’a Nzambi i nkanda usundidi mwangwa muna lusansu lwawonso. Tezo kia mafuku matatu ma nkanda mianietekwa. Ke vena nkanda akaka wavangwa mu ntalu nze i yayi ko. O Nkand’a Nzambi yovo etini yandi yasekolwa mu 2.000 ma ndinga. Ozevo, tezo kia 98 muna nkama a nkangu miawonso mia nza balenda vwa o Nkand’a Nzambi.

8-10. Nkia kuma isonganga vo o Nkand’a Nzambi ufwana fimpwa?

 ⁸ Dia ludi vo o nkanda owu uyikidi vo kwa Nzambi utuka una ye umbangi wa ziku muna kati kwandi yo kumbazi, wafwan’ofimpwa. * O nkand’a wau usasilanga o mfunu a zingu, usongang’e nsasa za mambu mebwanga omu nza, y’oma mebwa kuna sentu. Ke vena nkanda akaka ulenda wo vanga ko.

⁹ Elo, o Nkand’a Nzambi i luzayisu lua Nzambi kwa kanda dia wantu. Muna ngolo zandi, yovo mwand’andi, wafila tezo kia 40 ma wantu mu soneka Nkand’a Nzambi. Ozevo o Nzambi okutuvoveselanga muna Diambu diandi Diavauka, Nkand’a Nzambi. O Paulu wa ntumwa wasoneka: “Una nwatambula kwa yeto diambu dia lutumu, dina vo dia Nzambi, nwatambula dio, ke nze diambu dia wantu ko, una din’e kieleka, diambu dia Nzambi kaka.”—1 Tesalonika 2:13.

¹⁰ O Abraão Lincoln, wa nyadi 16.° waku Estados Unidos, wayikila Nkand’a Nzambi vo “i lukau lusundidi o wete kavan’o Nzambi kwa wantu . . . Kondwa kwa wau ke twadi zaya swaswanisa edi dia singama yedi dia vilwa ko.” Ozevo aweyi luvovanga o lukau lualu lwampwena mu kuma ki’etuku dia mpasi y’ekuma o Nzambi kayambulwila zo vo zakala ye aweyi kevanga mu kuma kiokio?

[Mvovo ku yanda dia lukaya]

[Yuvu ja longokela]

[Foto ina muna lukaya 10]

Nkand’a Nzambi wavumunwinwa kwa Nzambi, i luzayisu luandi kwa kanda dia wantu