Nki Bekwikilanga a Mbangi za Yave?

“Tuzolele o kuwil’edi wina diau: kadi vo i vaudi kiaki, dizayakene kwa yeto vo mwawonso kitumbwanga.” (Mavangu 28:22) Zazin’e mbuta za mavata ma Roma ku tandu kiantete, basonga mbandu ambote. Bazola kuyiwila yau kibeni, ke mu wila kaka muna nua mia atantu ko.

Diau adimosi mpe o unu kiaki, a Mbangi za Yave ntangwa zayingi betumbwanga, ozevo dia vilwa edi dia vava zay’e ludi muna nua mia atantu au. Idianu, tuna ye kiese kia kuzayisa omaka ma lukwikilu lweto.

Nkand’a Nzambi, Yesu Kristu yo Nzambi

Tukwikilanga vo “e Sono yawonso yavumunwinwa kwa Nzambi, ina yo mfunu.” (2 Timoteo 3:16) Kanele vo akaka bevovanga vo ke tu Akristu ko, e diadi ke dia ludi ko. Tutoma kwikilanga e kimbangi kia Petelo wa ntumw’a mu kuma kia Yesu Kristu: “Ke vena nkutu luvuluzu mun’akaka ko: kadi ke vena nkumbu akak’okunsi ezulu ko, iveno muna wantu, ina tufwete vuluzilwa.”​—Mavangu 4:12.

Kansi tu, wau vo Yesu wavova vo yandi i “Mwan’a Nzambi” ye mpe vo o ‘Se wantuma,’ a Mbangi za Yave bekwikilanga vo Nzambi osundidi Yesu. (Yoane 10:36; 6:57) O Yesu yandi kibeni wayizaila wo: “O Se unsundidi.” (Yoane 14:28; 8:28) Muna diadi, ke tukwikilanga ko vo Yesu wafwanana yo Se, ne i una ulonganga elongi dia  Nzambi mu Ntatu. Kansi, tukwikilanga vo yandi wavangwa kwa Nzambi ye mpe Okunsakalelanga.​—Kolosai 1:15; 1 Korinto 11:3.

Muna ndinga Kikongo, e nkumbu a Nzambi Yave. Nkand’a Nzambi uvovanga vo: “Nge kaka wina ye nkumbu a YAVE, umpungu omu nza yawonso.” (Nkunga 83:18) Muna kuma kiaki o Yesu watoma sanisina e nkumbu a Nzambi, walonga alongoki andi ba samba: “E S’eto koko’zulu, Yambula nkumbu aku yazitiswa.” Yandi kibeni wasamba kwa Nzambi: “Yasengomona nkumbu aku kwa wantu ana wampan’omu nza.”​—Matai 6:9; Yoane 17:6.

A Mbangi za Yave bekwikilanga vo bafwete tanginina Yesu mu samuna e nkumbu yo makani ma Nzambi. Muna diadi, tutambulwilang’e nkumbu a Mbangi za Yave ekuma vo tutangininanga Yesu, “wa mbangi a kwikizi.” (Lusengomono 1:5; 3:14) O Yesaya 43:10 ikatoma vovela kwa nkangu besunzulanga Nzambi vo: “Oyeno nu mbangi zame, i Yave wau, yo ntaudi ame ona nsolele.”

Kintinu kia Nzambi

Yesu walonga alandi andi ba samba, “Kintinu kiaku kiza,” osidi e Kintinu kiaki se ntu a malongi mandi mawonso. (Matai 6:10; Luka 4:43) A Mbangi za Yave bekwikilanga vo e Kintinu luyalu lwa ludi lukala kun’ezulu, lusinga yala nza, vo Yesu Kristu i Ntinu olembi moneka wasolwa. “O luyalu lukala van’evembo diandi,” i uvovel’o Nkand’a Nzambi. “Muna wokela kwa luyalu luandi yo luvuvamu ke mukala nsuka ko.”​—Yesaya 9:6, 7.

Kansi kadi, Yesu Kristu ke yandi amosi ko okala ntinu a luyalu lwa Nzambi. Okala yo ulolo wa ayadi y’akw’andi kun’ezulu. “Ovo tuzindalala” i kasoneka o Paulo wa ntumwa, “tuyala yandi e kintinu.” (2 Timoteo 2:12) Nkand’a Nzambi usongele vo o lutangu lwa wantu befulwa kimana  bayala yo Kristu kun’ezulu lwandwelo “elundu ye yazi yà yo mazundu maya awana basumbuk’ova nza.”​—Lusengomono 14:1, 3.

Dia ludi mpe vo, tuyalu twawonso tuna yo mfunu a vwa nkangu, ye a Mbangi za Yave bekwikilanga vo, lembi yik’ayadi awaya ezulu, mazunda ma wantu akaka bevwil’o moyo akwele mvu. Kuna mfoko, e nza yikitulwa se paradiso yambote, yo zala kikilu kwa nkangu wau wafwana mo kala uyalwa kwa Kintinu kia Nzambi, awonso besakalela o luyalu lua Kristu y’awana keyala yau entwadi. Ikuma vo, a Mbangi za Yave betoma dio kwikilanga vo e nza ke ilendi fwaswa nkutu ko, vo o nsilu a Nkand’a Nzambi ulungana: “Asongi bevwa nza, besikila vo yakwele mvu.”​—Nkunga 37:29; 104:5.

Kansi aweyi kikwizila e Kintinu kia Nzambi? Muna nsakalala ya luzolo lwa ntima mia wantu awonso kwa luyalu lwa Nzambi? Ke wau ko, o Nkand’a Nzambi usongele mu ludi kiawonso vo e ngiz’a Kintinu ifila Nzambi yandi kibeni kabaka e nzengo za mambu ma nza: “O Nzambi ezulu otongeka kintinu, kina ke kibangalakeswa ko yakwele mvu . . . kansi kikosomona yo sukisa yintinu yayi yawonso, kitongama mpe yakwele mvu.”​—Daniele 2:44.

Nkia ntangwa kikwiz’e Kintinu kia Nzambi? Muna ndungana a ungunza wa Nkand’a Nzambi omu lumbu yayi, a Mbangi za Yave bekwikilanga vo kifinamene okwiza. Tuvukulwidi wa fimpa o maka mambu ma ungunza mateka vova owu wa “lumbu yambaninu” ya tandu kiaki kia mbi. Masonama muna Matai 24:3-14; Luka 21:7-13, 25-31; yo 2 Timoteo 3:1-5.

 Wau vo ‘tuzolanga Yave wa Nzambi eto yamuna nsi a ntim’eto yawonso, yo muna fulumwinu kieto kiawonso, yo muna nyindu eto wawonso, yo mun’efuka dieto diawonso ye akweto konso una tukuyizolelanga,’ ke tuna twavambana mu zula, yovo mu nkand’a nitu ngatu mu yintwadi ko. (Maku 12:30, 31) Tutomene zayakana kikilu muna kuma kia zola kumonekanga vana kati kwa ampangi zeto Akristu, bena muna zula yawonso. (Yoane 13:35; 1 Yoane 3:10-12) Ikuma tukiyivaulanga mu mambu ma zula ya nza yayi. Tutezanga tanginina una wakala alongoki a Yesu, ana kavovela vo: “Ke ba nza ko, nze mono kia nza ko.” (Yoane 17:16) Tukwikilanga vo o kuyivaula ye nza i sia vo venga mavangu mambi malutidi vangam’o unu, luvunu, wivi, zumba, akwa ngyambila, akala bekupitakesanga y’akala, nsafula za menga, sambu ya teke yo maka mambu mampila yayi, metumbwanga muna Nkand’a Nzambi.—1 Korinto 6:9-11; Efeso 5:3-5; Mavangu 15:28, 29.

Vuvu kia Kusentu

A Mbangi za Yave bekwikilanga vo ezingu kieto o unu mu nza yayi ke kiau kaka kina ko. Tukwikilanga vo Yave watuma Kristu mu nza muna bungula menga ma moyo andi se lukulu, kinumana o wantu balenda kala enkal’a nsongi vana ndose a Nzambi yo tambul’o moyo akwele mvu muna nkubika ya mpa. Ne i wavova mosi mu ntumwa za Yesu: “Wau tulungisilu muna menga mandi.” (Roma 5:9; Matai 20:28) A Mbangi za Yave betoma vutulanga matondo kwa Nzambi yo kwa Mwan’andi muna nkubika yayi ya lukulu luvana e nzila a bakil’o moyo wa kusentu.

A Mbangi za Yave bebundanga kikilu vuvu kia moyo wa kusentu, kina ye nkubilwa muna lufuluku, lukwiza kuna nsi a Kintinu kia Nzambi. Tukwikilanga, una ulonganga Nkand’a Nzambi, wa siavo o muntu ovo ofwidi e zingu kiandi kimene, vo “muna lumbu kiakina o makani  mandi mavididi.” (Nkunga 146:3, 4; Yezekele 18:4; Kimpovi 9:5) Elo, o moyo wa kusentu wa mafwa kwa Nzambi kaka una muna kubayindula kuna lufuluku.​—Yoane 5:28, 29.

Kansi kadi, a Mbangi za Yave betoma wo kwikilanga vo wantu ayingi ben’omoyo unu kiaki besinga vuluka vava Kintinu kia Nzambi kifwasa o tuyalu twatu twawonso ye, ne i una Noa ye nzo andi bavuluka mu Kizalu, o yau mpe besikila yo zinga yakwele mvu muna nza yavelela. (Matai 24:36-39; 2 Petelo 3:5-7, 13) Kansi, tukwikilanga vo o muntu muna vuluka nanga kalungisa ensiku mia Yave, ne i una uvovele Nkand’a Nzambi: “E nza mpe vempoka ivempoka . . . vo i ndion’ovangang’o luzolo lua Nzambi, zing’aka kezinganga yakwele mvu.”—1 Yoane 2:17; Nkunga 37:11; Lusengomono 7:9, 13-15; 21:1-5.

Kieleka, ka dilendakana ko dia soneka ovava mawonso mekwikilanga a Mbangi za Yave, kansi tuvukulwidi wa vava diaka zaya maka mambu.

[Mvovo mia sina muna lukaya lwa 4]

Tutambulwilang’e nkumbu a Mbangi za Yave ekuma kadi tutangininanga Yesu