Longi dia 14

A Mbangi za Yave Aweyi Bakubamena

A Mbangi za Yave nkia ntangwa bayantika e salu kiau omu tandu kiaki? (1)

O tukutakanu twa Mbangi za Yave aweyi tuna? (2)

Aweyi bevwilang’e nzimbu besadilang’e salu kiau? (3)

Nani okalanga se ntu muna konso nkutakani? (4)

Nkia tukutakanu twampwena tuvangamanga muna konso mvu? (5)

Nkia salu kivangwanga kuna vula dia sina ye muna mavula makaka? (6)

1. Omu tandu kiaki a Mbangi za Yave bayantika e salu kiau muna mvu mia 1870. Kuna lubantiku, bayikilwanga vo Alongoki a Nkand’a Nzambi. Kansi muna mvu wa 1931 bayiyikila e nkumbu ina muna Nkand’a Nzambi ya Mbangi za Yave. (Yesaya 43:⁠10) Tuka lubantiku luakete, e nkubika yawokela se mazunda ma mazunda ma Mbangi, bazala ye salu kia telek’e nsangu mu tezo kiviokele 230 ma nsi.

2. O ulolo wa nkutakani za Mbangi za Yave nkumbu ntatu belungananga muna lumingu. Tususumwini wiza lungana mu imosi muna nkutakani zazi. (Ayibere 10:24, 25) Oma melongwanga mu Nkand’a Nzambi metukanga. O tukutakanu tuyantikilanga yo fokokela muna sambu. Beyimbilanga mpe e “ngimbila za kimwanda” muna tukutakanu twayingi. (Efeso 5:18, 19) Konso muntu olenda kota kwandi kemulombwanga nzimbu ko.—Matai 10:8.

3. Nkutakani zayingi belunganenanga mun’Eseka dia Kintinu. E nzo yoyo yasakalala, itungwanga kwa Mbangi za Yave ana bekuyivananga mu sala kuna mvevo. Mun’Eseka dia Kintinu ke mwina teke ko yovo fwaniswa yovo ekuluzu ngatu konso sinsu. Muna lukau luvaninwanga kuna mvevo i besumbilanga e lekwa ina ivuwangw’o  mfunu. Vena ye nkela itubwanga o tukau kwa konso ndiona ozolele vana.—2 Korinto 9:7.

4. Vena y’akuluntu, yovo akengi muna konso nkutakani. Yau bevitang’o ntu muna longa muna nkutakani. (1 Timoteo 3:1-7; 5:17) Besadiswanga kwa selo. (1 Timoteo 3:8-10, 12, 13) Wantu awaya ke bebadikilwanga ko vo basundidi akaka muna nkutakani. (2 Korinto 1:24) Ke beyikilwanga mu mazina matundidikwa ko. (Matai 23:8-10) Ke bevwatilanga mpila yaswaswana y’akaka ko. Ngatu vo tambula mfutu muna salu kiau. Akengi kuna mvevo a ntima belungisilanga e nsatu za mwanda za nkutakani. Balenda fiaulwisa yo ludika muna ntangwa mpasi.—Yakobo 5:14-16; 1 Petelo 5:2, 3.

5. A Mbangi za Yave bevanganga mpe tukutakanu yovo nkungi miampwena muna konso mvu. Muna kolo kiokio nkutakani zayingi zilungananga kumosi muna tambul’e longi diamfunu dia Nkand’a Nzambi. O luvubu lwa alongoki ampa luvangamanga muna ntangwa za konso tukutakanu toto yovo nkungi.—Matai 3:13-17; 28:19, 20.

6. Evula dia sina dia Mbangi za Yave omu nz’amvimba kuna Nova York, EUA dikalanga. Kuna i kukalanga e Buka kia Selo Yambuta, buka kia akuluntu azikuka bediatisanga e nkutakani a nz’amvimba. Vena mpe ye vioka 100 za mavula muna nza yawonso. Muna fulu yayi, mwina ye wantu akwa mvevo besadisanga muna nieteka yo mwanganisa e nkanda mia sociedade. Belongwanga mpe e mpila balenda kubamena muna samuna e nsangu. Tususumwini wenda kingula konso evula difinamene vovo okalanga.