Longi dia 5

Adieyi I Kani dia Nzambi mu kuma kia Ntoto?

Ekuma o Yave kasemen’o ntoto? (1, 2)

Ekum’o unu e nza ke ina nze paradiso ko? (3)

Adieyi dibwila amimpanga-mayi? (4)

Adieyi kevang’o Yesu kuna sentu kwa mbevo, kwa anunu ye kwa amafwa? (5, 6)

Nki ofwete vanga ongeye muna vwila e nsambu za kusentu? (7)

1. O Yave wasema e nza yayi kinumana vo wantu bazingila vo yakwele mvu. Wazola vo e nza yazingilwa kwa wantu ansongi ye kiese. (Nkunga 115:16; Yesaya 45:18) O ntoto ke ufwaswa nkutu ko; uzing’aka yakwele mvu.—Nkunga 104:5; Kimpovi 1:4.

2. O Nzambi una kavangidi ko o muntu, wasola e fulu kiakete yo kitula kio se paradiso yambote. Wayikila kio vo mpatu a Edene. I muna kasia o yakala yo nkento antete, Adami yo Eva. I kani dia Nzambi vo bawut’o wana yo zadisa o ntoto wawonso. Oku kwakwiziwa, badi kitula o ntoto wawonso se paradiso.—Etuku 1:28; 2:8, 15.

3. Adami yo Eva basumuka wau bakulula o nsiku a Nzambi muna lukanu. Muna diadi, o Yave wabavaikisa muna mpatu ya Edene. E paradiso yavila. (Etuku 3:1-6, 23) Kansi o Yave kasidi vilakana ekani diandi mu kuma kia ntoto wau ko. Wasil’o nsilu vo okitula wo se paradiso, muna o wantu bezingila yakwele mvu. Aweyi kevangila wo?—Nkunga 37:29.

4. E nza yayi muna lenda kituka se paradiso, o wantu ambi bafwete teka vempolwa. (Nkunga 37:38) Ediadi disinga vangama muna Armangedo, e vita a Nzambi muna fokola o mambi. Edi dilanda, o Satana okangwa muna 1.000 dia mvu. I sia vo kevesala konso muntu ambi ko muna yivisa diak’o ntoto. Nkangu a Nzambi kaka besala yo moyo.—Lusengomono 16:14, 16; 20:1-3.

 5. I bosi, o Kristu Yesu oyala ova ntoto se Ntinu muna 1.000 dia mvu. (Lusengomono 20:6) Malembe malembe, ofokola masumu muna nyindu ye muna nitu zeto. Tukituka se wantu alunga, ne i una bakala Adami yo Eva una kebasumukini ko. Ozevo kevekala diaka mayela ko, yovo ununu ngatu vo lufwa. Ambevo bewukwa ye anunu bevutuka nze aleke.—Yobi 33:25; Yesaya 33:24; Lusengomono 21:3, 4.

6. Muna kolo kia Luyalu lw’Ezunda dia mvu lwa Yesu, wantu akwikizi besala muna kitula o ntoto se paradiso. (Luka 23:43) Ye mpe, mazunda ye mazunda ma mafwa befulwa muna vwil’e zingu ova ntoto. (Mavangu 24:15) Avo bavangidi oma kevavanga o Nzambi kuna kwa yau, bezingila ova ntoto yakwele mvu. Ovo ke wau ko, befwaswa yakwele mvu.—Yoane 5:28, 29; Lusengomono 20:11-15.

7. I wau wuwu ulungisilwa ekani diantete dia Nzambi mu kuma kia ntoto. Nga ozolele vwa e nsambu zazi za kusentu? Ovo i wau, ofwete longokang’e diambu mu kuma kia Yave yo lemvokela oma kelombanga. O lungana muna tukutakanu kun’Eseka dia Kintinu fulu kia Mbangi za Yave dikusadisa muna vanga dio.—Yesaya 11:9; Ayibere 10:24, 25.

[Foto muna lukaya 10]

E paradiso yavila

[Foto muna lukaya 11]

Kunima Armangedo, o ntoto ukitulwa se paradiso