Longi dia 9

Aselo ya Nzambi Bafwete Kala Bavauka yo velela

Ekuma tufwete kadila twavauka yo velela muna mpila zawonso? (1)

Kala wavauka yo velela muna mwanda aweyi disongele (2),

muna fu (3), muna ngindu (4) ye muna nitu? (5)

Nkia mpila móko yambi tufwete tina? (6)

1. O Yave wa Nzambi wavauka ye wavelela. Edi kevavanga vo asambidi andi bakal’avauki yo velela muna mwanda, muna fu, muna ngindu yo muna nitu. (1 Petelo 1:16) Muna kala wavelela vana meso ma Nzambi ofwete toma siamanana. Mu nza yafunzuka tuzingilanga. Tufwete nwana mpe y’ezolela kia yeto kibeni kia vanga oma mambi. Kansi ka tufwete yoya ko.

2. Velela kwa mwanda: Ovo tuzolele sadila Yave, katufwete landa malongi ye fu ya nsambila za luvunu ko. Tufwete vaika muna nsambila za luvunu ye ka tufwete kubayikama ko. (2 Korinto 6:​14-18; Lusengomono 18:4) Wau tulongokele e ludi mu kuma kia Nzambi, tufwete kuyikenga tualembi tungianiswa kw’awana belonganga o luvunu.—2 Yoane 10, 11.

3. Velela muna fu: O Yave ovavanga vo asambidi andi bayisonga muna mambu  mawonso nze akristu akieleka. (1 Petelo 2:12) Yandi omonanga mawonso tuvanganga, kana nkutu mavangamene kuna sweki. (Ayibere 4:13) Tufwete venga e fu ya nsoni ye yaka fu ya nsafu ya nza yayi.—1 Korinto 6:9-11.

4. Velela kwa ngindu: Ovo tuzadisi e ngindu zeto yo mambu mavelela, e fu yeto mpe yikala yavelela. (Filipi 4:8) Kansi ovo tuyindulanga o mambu ma nsafu mekutufila muna vanga o mambi. (Matai 15:18-20) Tufwete yambula e nsaka zina zilenda yivisa e ngindu zeto. Tulenda zadisa e ngindu zeto yo mambu mavauka muna longokang’e Diambu dia Nzambi.

5. Velela kwa nitu: Wau vo akristu Nzambi besunzulanga, bafwete kala bavelela muna nitu ye muna mvwatu. Tufwete sukulang’o moko ovo tutukidi muna nzo yakete tufwete mpe sukulang’o moko ovo se tudia yovo lamba o madia. Ovo e nzo aku ke ivwidi nzo akete ko, ozevo e mvindu ifwete zikwanga. (Nsiku 23:12, 13) Ovelela kwa nitu vimpi wambote kutwasanga. E nzo ya nkristu ifwete kala yakubama yo velela, tuka muna kati yaku mbazi. Ofwete kala se mbandu ambote vana zunga kiandi.

6. Mpova zavelela: Aselo ya Nzambi bafwete vovanga kaka e ludi. Akwa luvunu kebekota mu Kintinu kia Nzambi ko. (Efeso 4:25; Lusengomono 21:8) Akristu ke besadilanga mpova zambi ko. Ke bewunikinanga ngatu vova mpova za nsoni ngatu móko kia nsafu ko. Mu kuma kia móko yau yavelela kuna salu yovo kuna sikola, ye muna mfinangani za nzo zau, bekuyiswaswanisanga.—Efeso 4:29, 31; 5:3.

[Foto muna lukaya 18, 19]

Aselo ya Nzambi bafwete kala bavelela muna mpila zawonso