Longi dia 15

Aweyi Olenda Sadisila Akaka Kinumana Bavanga o Luzolo lwa Nzambi

Ekuma ofwete zaisila man’olongokanga kwa akaka? (1)

Kwa nani ofwete samun’e nsangu zazi? (2)

E nkal’aku adieyi ilenda vanga kuna kwa akaka? (2)

Nkia ntangwa olenda sal’entwadi mu samun’e nsangu kumosi ye nkutakani? (3)

1. Wau ongeye olongokele mambu mayingi mambote muna Nkand’a Nzambi. O zayi wau ufwete kufila mu yima o uwuntu wa kikristu. (Efeso 4:22-24) O zayi wau wamfunu kwa muntu kinumana kavw’o moyo a mvu ya mvu. (Yoane 17:3) Kansi kadi, wantu akaka mpe bafwete wa e nsangu zambote kinumana vo yau mpe bavuluka. Akristu akieleka awonso bafwete telekang’e kimbangi kwa wantu akaka. Owau i nkanikinu a Nzambi.—Roma 10:10; 1 Korinto 9:16; 1 Timoteo 4:16.

2. Olenda yantika samun’e nsangu zambote zina olongokanga kwa wantu akaka ana omokenanga yau. Samuna zo kwa yitu yaku, kwa akundi, akundi a sikola ye kuna osadilanga. Vangila wo kuna unsongi yo luzindalalu. (2 Timoteo 2:24, 25) Sungamena dio vo ntangwa zayingi wantu beluta badikanga e nkal’a muntu ke mu mana kevovanga ko. Ozevo, e nkal’aku ambote ilenda fila akaka mu wunikina o nsamu okubasamunwina.—Matai 5:16; 1 Petelo 3:1, 2, 16.

3. Oku sentu, olenda kuyifwanisa mu yantik’o samun’e nsangu kumosi ye nkutakani in’okalanga ya Mbangi za Yave. Ediadi diamfunu kikilu muna lunungunuku luaku. (Matai 24:14) Nkia mpila kiese dikuvana dia lenda sadisa o nkw’aku kakituka se selo kia Yave yo vwa moyo a mvu ya mvu!—1 Tesalonika 2:19, 20.