Longi dia 10

Mavangu oma Kemengang’o Nzambi

Aweyi ofwete badikila o mambu mana keyikang’o Nzambi vo mambi? (1)

Nkia mpila mvukana za kiyakala ye kikento zina zambi? (2)

O nkristu aweyi kafwete badikila o luvunu (3), o tá e mpanza (jogatina) (3), o wivi (3), o umpumbulu (4), e mpandu (5) e nkolwa malavu? (6)

Aweyi olenda kuyikolela muna mavangu mama mambi? (7)

1. Aselo ya Nzambi bezolanga oma mambote. Kansi bafwete longoka mpe o menga o bi. (Nkunga 97:⁠10) Ediadi disongele vo bafwete venga o mavangu kemengang’o Nzambi. Ameyi i maka muna mavangu momo?

2. Ngyambila: Mvukana za yakala yo nkento ekolo kebakazalele ko, zumba, leka ye bulu, leka yo mosi una vo yitu kiaku ye yakala olekanga yo yakala wa nkw’andi mama mawonso i masumu manene kuna kwa Nzambi. (Fuka 18:6; Roma 1:26, 27; 1 Tusansu 6:9, 10) Kele vo yakala yo nkento ke bakazala ko, kansi bezingilanga kumosi, bafwete vambana yovo bafwete kazala mun’owu wa nsiku miawonso.—Ayibere 13:4.

3. Luvunu, tá e mpanza, wivi: O Yave wa Nzambi kalendi vuna ko. (Tito 1:2) Awana bazolele yangalelwa kwa yandi bafwete yambula o luvunu. (Ngana 6:16-19; Kolosai 3:9, 10) E mpila zawonso za tá e mpanza kintwadi zina y’eloko. I kuma vo akristu ke betanga konso mpila a mpanza ko, nze i loterias, lundumuka muna  mvalu ye bingo. (Efeso 5:3-5) Akristu ke beyiyanga ko. Kebesumbanga lekwa ko ina bazeye vo ya wivi, ngatu vwaminina e lekwa kiangani kondwa nswa.—Luvaiku 20:15; Efeso 4:28.

4. Makasi mayingi, umpumbulu: Ekasi dialembi songa dilenda fila muntu mu vangu dia nsoki. (Etuku 4:5-8) O nkwa nsoki kalendi kala nkundi a Nzambi ko. (Nkunga 11:5; Ngana 22:24, 25) Diambi dia landa e kunda yovo vutula mbi muna mbi muna dina batuvangidi akaka.—Ngana 24:29; Roma 12:17-21.

5. Nkisi ye mpandu: Wantu akaka bevavanga lusadisu lwa mianda muna wuka o mayela. Akaka akwau belokang’e nkisi kinumana babak’o mayela yovo mpe kubavonda. O Satana i nkuma kuna nima mavangu mama mawonso. I kuma vo akristu kebafwete vanga konso edi din’entwadi yo yau ko. (Nsiku 18:9-13) Finama kwa Yave i tininu disundidi o wete kele vo wantu akaka batulokele e nkisi.—Ngana 18:10.

6. Nkolwa: Ke diambi ko dia nua fivinyo, cerveja yovo konso malavu mankolwa. (Nkunga 104:15; 1 Timoteo 5:23) Kansi o nw’o malavu mayingi yo kolwa diambi vana meso ma Nzambi. (1 Korinto 5:11-13; 1 Timoteo 3:8) O nua kwayingi kulenda yivisa o vimpi yo vambanisa e nzo aku. Ye mpe, kulenda bwisa muntu e sazu muna ntonta zakaka.—Ngana 23:20, 21, 29-35.

7. Awana bevangang’o mambu mana kavovele o Yave vo mambi “e kintinu kia Nzambi ke bevwila kio ko.” (Ngalatia 5:19-21) Ongeye ovo ozolanga kieleka Nzambi yo zola kunyangidika, olenda kuyivevola muna mavangu mama. (1 Yoane 5:3) Longoka wamenganga mana kavovele o Nzambi vo mambi. (Roma 12:9) Lungananga yo wantu bena ye fu yambote. (Ngana 13:20) Akundi akristu, azikuka, balenda sadisa. (Yakobo 5:14) Vana ntandu a mawonso, si’evuvu muna lusadisu lwa Nzambi, yo lombela lo muna sambu.—Filipi 4:6, 7, 13.

[Foto muna lukaya 20, 21]

Nzambi omenganga e nkolwa, o wivi, tá e mpanza yo mavangu ma nsoki