Longi dia 4

Nani I Nkadi ampemba?

O Satana wa Nkadi ampemba—akweyi katuka? (1, 2)

O Satana aweyi ketungianisinang’o wantu? (3-7)

Ekuma ofwete siamanen’o sia Nkadi ampemba e kitantu? (7)

1. O mvovo wau “nkadi ampemba” usonganga ndiona ovovelanga o muntu akaka o luvunu. “Satana” i sia vo ntantu yovo ntelameni. I mazina mavanwa kwa ntantu antete a Nzambi. Kuna lubantiku, mbasi alunga kakala kun’ezulu, kumosi yo Nzambi. Kansi kadi, oku kwakwiziwa wayimona vo wafwana kwandi ye wazola vo kakundwa vana fulu kia Nzambi.—Matai 4:8-10.

2. O mbasi ndioyo, wa Satana, wavova kwa Eva kunima nioka. Wamfilakesa mu kolamena Nzambi, muna kumvoves’o luvunu. O Satana i ntelamena katelamena eki kiyikilwanga vo “umfumu” yovo fulu kia Nzambi, nze Mpungu. O Satana wafil’e mpaka za mpila ngyala keyalang’o Nzambi, kana vo yafwana kwandi ye ilenda sadisa o nkangu Andi. Satana wasia mpe o lukatikisu kuna kwa muntu kana vo olenda song’e kwikizi kuna kwa Nzambi. O Satana i wau wuwu kakitukila se ntantu a Nzambi. I kuma kiaki kayantikilw’o yikilwa vo Satana wa Nkadi ampemba.—Etuku 3:1-5; Yobi 1:8-11; Lusengomono 12:9.

3. Satana ovavanga vunginik’o wantu kinumana vo basambilanga yandi. (2 Korinto 11:3, 14) E mpila ketungianisinang’o wantu i sadila e nsambila luvunu. Vava e nsambila ilongang’o luvunu mu kuma kia Nzambi, i kieleka vo Satana kikilu yisadilanga. (Yoane 8:44) Ana bena muna nsambila zaluvunu nanga balenda kwikila muna ziku kiawonso vo Nzambi aludi besambilanga. Kansi, kieleka vo Satana kwau besadilanga. Yandi i ‘nzambi a nza yayi.’—2 Korinto 4:4.

4. E mpandu i mpila yakaka diaka kesadilang’o Satana muna filakes’o wantu. Wantu awaya nanga bevovelelanga a mianda muna kuyitanina, yovo mu bangika akaka, yovo vava zay’oma mekwiza oku sentu yovo muna vanga masivi. O Satana i nkuma wambi kunima mavangu mama mawonso. Muna yangidika Nzambi, katufwete nkutu kuyisia mu konso vangu dia mpandu ko.—Nsiku 18:10-12; Mavangu 19:18, 19.

5. O Satana otungianisanga mpe wantu muna sadila o umvwania wa kanda dia nitu ye nkunda za nkubika za tuyalu.  Akaka edi beyindulanga vo e zula kiau yovo kanda diau disundidi edi dia wantu akaka. Kansi ediadi ke dialudi ko. (Mavangu 10:34, 35) Akaka bevingilanga vo e nkubika za tuyalu zasikidisa mambu ma wantu. I wau wuwu bevezelanga e Kintinu kia Nzambi. Kina vo i kiau kaka kilenda singik’o mambu meto.—Daniele 2:44.

6. E mpila yakaka ketungianisinang’o wantu o Satana i muna kubatonta mu zolela y’esumu. O Yave ovovanga vo tufwete tin’o mavangu m’esumu, e kuma kadi ozeye wo vo mpasi mekututwasila. (Ngalatia 6:7, 8) Akaka nanga bezola vo wakala yau entwadi muna mavangu mama. Kansi, sungamena dio vo i Satana kikilu ozolele vo wavang’o mambu mama.—1 Korinto 6:9, 10; 15:33.

7. O Satana nanga olenda sadila lutonto yovo kitantu muna ku vaula yo Yave. Akaka azolw’aku nanga balenda funga kikilu o makasi wau olongokanga o Nkand’a Nzambi. Akaka nanga balenda kuveza. Kansi nga nani okuvan’o moyo? Satana ozolele kumwes’o wonga kinumana vo wayambula longoka oma ma Yave. Kuyambudi ko vo o Satana kasunda! (Matai 10:34-39; 1 Petelo 5:8, 9) Muna siamanana osia Nkadi ampemba e kitantu ongeye olenda yangidika Yave yo songa vo uyisidi vana sambu dia umfumu Wandi.—Ngana 27:11.

[Foto muna lukaya 9]

E nsambila ya luvunu, ye mpandu ye mpambula za zula wantu zitungianisanga

[Foto muna lukaya 9]

Siamanana osia Satana e kitantu muna longokanga oma ma Yave.