Longi dia 2

Nani I Nzambi?

Nani i Nzambi aludi e nkumbu andi nani? (1, 2)

Nkia mpila nitu kavwidi? (3)

E fu yandi isundidi ayeyi? (4)

Nga tufwete sadila e fwaniswa ye sinsu muna kunsambila e? (5)

Nkia mpila zole tulenda longokela diambu mu kuma kia Nzambi? (6)

1. O wantu besambilanga ulolo wa lekwa. Kansi o Nkand’a Nzambi okutuvovesanga vo vena ye Nzambi mosi kaka ALUDI. Yandi wavang’e lekwa yawonso kun’ezulu y’ova ntoto. Wau vo yandi watuvan’o moyo, yandi Kaka i tufwete sambila.—1 Korinto 8:5, 6; Lusengomono 4:11.

2. O Nzambi mazina mayingi keyikilwanga, kansi nkumbu mosi kaka kena yau. E nkumbu yoyo i YAVE. E nkumbu a Nzambi yakatulwa muna zak’e nsekola za Nkand’a Nzambi yo vingiswa o mazina nze MFUMU yovo NZAMBI. Kansi vava kiateka sonekw’o Nkand’a Nzambi, e nkumbu a Yave yakala muna 7.000 ma fulu yandi!—Luvaiku 3:1; Nkunga 83:18.

3. Yave una ye nitu, kansi ka ina nze eyi ya yeto ko. “Nzambi i Mwanda,”  ukavovele o Nkand’a Nzambi. (Yoane 4:24) O mwanda i mpila zingu kisundidi eki kia yeto wantu. Kavena muntu wamona Nzambi ko. Yave ku’zulu kekalanga, kansi olenda mona e lekwa yawonso. (Nkunga 11:4, 5; Yoane 1:18) Kansi, nga nki i mwand’avelela? Ka muntu ko nze i Nzambi. Kansi, ngolo za Nzambi ezi zikumikanga.—Nkunga 104:30.

4. O Nkand’a Nzambi ukutusengomwenanga e kiwuntu kia Nzambi. Osonganga vo e fu ya Nzambi eyi isundidi i zola, ndungidi, zayi yo nkuma. (Nsiku 32:4; Yobi 12:13; Yesaya 40:26; 1 Yoane 4:8) O Nkand’a Nzambi okutuvovesanga mpe vo yandi nkwa nkenda, yo walakazi, nloloki, nkwa mvevo a ntima, yo luzindalalu. Oyeto, nze wan’anzolwa, tufwete tezang’o kuntanginina.—Efeso 5:1, 2.

5. Nga tufwana kunda e fwaniswa, yovo sinsu ngatu samba kwa yau muna nsambil’eto? Ve! (Luvaiku 20:4, 5) Yave ovovanga vo yandi kaka tufwete sambila. Kadi kezolanga kayana nkembo andi ye wankaka ko ngatu vo lekwa kiakaka. E teke ke ina yo nkuma ko muna kutusadisa.—Nkunga 115:4-8; Yesaya 42:8.

6. Aweyi tulenda toma zayila Nzambi? Ediantete i mu talanga e lekwa kavanga yo toma badika edi ikutusonganga. E vangwa ya Nzambi ikutusonganga vo oyandi nkwa nkuma ye ngangu. Tumonanga o zola kwandi muna yawonso kavanga. (Nkunga 19:1-6; Roma 1:20) E nzila yankaka tulenda zayila Nzambi i longoka o Nkand’a Nzambi. Muna nkanda wowo okutuvovesanga mayingi ma mpila in a ken’o Nzambi. Okutuzayisanga mpe ekani diandi ye una kazolele vo twavanga.—Amose 3:7; 2 Timoteo 3:16, 17.

[Foto muna lukaya 5]

Muna nsema yo muna Nkand’a Nzambi i tulongokela oma ma Nzambi