Longi dia 3

Nani I Yesu Kristu?

O Yesu nkia kuma keyikilwanga vo “Mwan’antente” a Nzambi? (1)

Ekuma keyikilwanga vo “Diambu”? (1)

O Yesu nkia kuma kayizila ova ntoto nze muntu? (2-4)

Ekuma kavangil’o masivi? (5)

O Yesu adieyi kevanga oku sentu? (6)

1. O Yesu wateka zingila kun’ezulu nze vangwa kia mwanda una kayizidi ko ova ntoto. Yandi i vangwa kiantete kia Nzambi muna kuma kiaki i keyikilwanga vo ‘Mwan’antete’ a Nzambi. (Kolosai 1:15; Lusengomono 3:14) O Yesu i Mwana amosi kaka ona kavanga o Yave wa Nzambi yandi kibeni. Wasadila Yesu ona wateka zinga kala una kakedi ko se muntu se “mbuta mbangu” andi muna vanga e lekwa yawonso kun’ezulu y’ova ntoto. (Ngana 8:22-31; Kolosai 1:16, 17) O Nzambi wansadila mpe se nkunzi Andi antente. I kuma kiaki keyikilwang’o Yesu vo “Diambu.”—Yoane 1:1-3; Lusengomono 19:13.

2. O Nzambi wafila Mwan’andi ova ntoto muna fila o moyo andi muna vumu kia Maria. Muna kuma kiokio o Yesu kakala ye se dia kimuntu ko. Muna kuma kiaki kavwil’efwa di’esumu dia Adami ko ngatu vo lembi lunga. O Nzambi kuma tatu katumina Yesu ova ntoto: (1) Katulonga e ludi mu kuma kia Nzambi (Yoane 18:37), (2) muna song’e ziku kialunga, yo kutusisil’e mbandu twalanda (1 Pedro 2:21), ye (3) muna tambik’o moyo andi se kimenga, muna kutukôla mun’esumu yo lufwa. E diambu diadi nkia kuma diakadil’o mfunu?—Matai 20:28.

3. Muna kolamena o nkanikinu a Nzambi, o Adami wa muntu antete, wavanga edi diyikilwanga muna Nkand’a Nzambi vo “esumu.” Muna kuma kiaki o Nzambi wansila e nzengo ya lufwa. (Etuku 3:17-19) Kakala diaka wafwana ko muna nkanikinu mia Nzambi, i kuma vo kakala diaka walunga ko. Oku kwakwiziwa wanuna i bosi wafwa. O Adami wasambukis’esumu kwa wan’andi awonso. I kuma kiaki mpe tununinanga, tuyelelanga ye tufwilanga.  O wantu aweyi balenda vuluzilwa?—Roma 3:23; 5:12.

4. O Yesu wakala muntu alunga, nze wauna wakala Adami. Kansi, o Yesu waswaswana yo Adami, kadi walemvokela kikilu Nzambi muna mawonso, kana nkutu muna lutonto lusundidi e mpasi. Muna kuma kiaki wafwana tambika o moyo andi a muntu alunga se kimenga mun’esumu dia Adami. Ediadi i diyikilwanga muna Nkand’a Nzambi vo “lukulu.” O wan’a Adami i balenda vuluzilwa wuwu muna tumbu kia lufwa. Awonso bekwikilanga muna Yesu balenda yambulwilw’o masumu mau mawonso yo vwa moyo a mvu ya mvu.—1 Timoteo 2:5, 6; Yoane 3:16; Roma 5:18, 19.

5. O Yesu una kakal’ova ntoto, wawuk’e mbevo, wadikila mimfwe mia nzala, yo ningika e tembwa. Wafula nkutu amafwa. Ekuma kavangil’o masivi mama? (1) Wantu kafwilanga e nkenda ana babangamanga ye wazola kubasadisa. (2) O masivi mandi masonganga vo yandi i Mwan’a Nzambi. (3) Masonga oma kesinga vanga mu kuma kia wantu alemvoka vava kekala se Ntinu ova ntoto.—Matai 14:14; Maku 2:10-12; Yoane 5:28, 29.

6. O Yesu wafwa yo fulwa kwa Nzambi se vangwa kia mwanda, wavutuka kun’ezulu. (1 Petelo 3:18) Tuka kiakina, o Nzambi wanyadika se Ntinu. Ke kolo ko, o Yesu osukisa o mambi ye mpasi zawonso ova ntoto.—Nkunga 37:9-11; Ngana 2:21, 22.

[Foto muna lukaya 7]

O uselo wa Yesu i longa, vanga masivi yo vana mpe o moyo andi mu kuma kieto