Longi dia 6

Nki I Kintinu kia Nzambi?

Akweyi kikalanga e Kintinu kia Nzambi? (1) Nani i Ntinu andi? (2)

Nga vena ye akaka bekala entwadi mu yala yo Ntinu? Ovo i wau, ekwa bena? (3)

Adieyi disonganga vo mu lumbu yambaninu tuzingilanga? (4)

E Kintinu kia Nzambi, nki kivanga oku sentu, mu kuma kia wantu? (5-⁠7)

1. Vava kakal’ova ntoto o Yesu, walonga alandi andi mu sambanga mu kuma kia Kintinu kia Nzambi. E kintinu i luyalu muna mfila a ntinu. E Kintinu kia Nzambi i luyalu luamfunu. Kiasikidiswa kun’ezulu, kiyala e nza yayi. Kivaulwisa e nkumbu a Nzambi. Kivangisa o luzolo lwa Nzambi ova nza nze kun’ezulu.—Matai 6:9, 10.

2. O Nzambi wasia nsilu vo o Yesu okituka se Ntinu a Kintinu Kiandi. (Luka 1:30-33) Una kakal’ova ntoto o Yesu, wasonga vo okala Nyadi ambote, wansongi ye walunga. Vava kavutuka kun’ezulu, kayadikwa vana vau ko se Ntinu a Kintinu kia Nzambi. (Ayibere 10:12, 13) Muna mvu wa 1914, o Yave wavana Yesu e wisa kina kansil’o nsilu. Tuka kiakina, o Yesu oyalanga kun’ezulu se Ntinu wasolwa kwa Yave.—Daniele 7:13, 14.

3. O Yave wasola mpe akala ye akento akaka akwikizi ova ntoto mu kwenda kun’ezulu. Kumosi yo Yesu, yau beyal’o wantu se atinu, afundisi ye nganga. (Luka 22:28-30; Lusengomono 5:9, 10) O Yesu wayikila ayadi awaya akwandi muna Kintinu kiandi vo “finkambi-kambi.” O lutangu lwau 144.000.—Luka 12:32; Lusengomono 14:1-3.

4. Vava o Yesu kakituka se Ntinu, waveta Satana ye mbasi zandi zambi tuka kun’ezulu, yavava ntoto. Ekiaki i kuma o mambi mewokelelang’aka ova ntoto tuka muna mvu wa 1914. (Lusengomono 12:9, 12) Vita, nzala, vuku, wokela kwa umpumbulu—mawonso mama i “sinsu” kisonganga vo o Yesu mu yala se kena, vo e tandu kiaki mu  lumbu yandi yambaninu se kina.—Matai 24:3, 7, 8, 12; Luka 21:10, 11; 2 Timoteo 3:1-5.

5. Ke kolo ko, o Yesu ofundisa wantu, yo kubavambanisa nga mvungudi ovambanisa mameme ye nkombo. A “mameme” i awana bena vo nkangu andi akwikizi. Bevwa moyo a mvu ya mvu ova ntoto. A “nkombo” i awana bevezanga e Kintinu kia Nzambi. (Matai 25:31-34, 46) Oku sentu, o Yesu ofwasa awonso bena vo nkombo. (2 Tesalonika 1:6-9) Kele vo ozolele kala mosi muna “mameme” ma Yesu, ofwete wila o nsamu wa Kintinu yo vanga mana olongokanga.—Matai 24:14.

6. Owau e nza yabulana ina mu nsi zayingi. Konso nsi ivwidi luyalu lwa yau kibeni. E zula yayi benwananga yau yo yau. Kansi o luyalu lwa Nzambi lusinga vingila o tuyalu twawonso twa wantu. Luyal’e nz’amvimba se luyalu lumosi kaka. (Daniele 2:44) Ozevo, ke vekala diaka vita ko, ngatu nsoki, yovo umpumbulu. Awonso bezingila kumosi mu luvuvamu ye ngwizani.—Mika 4:3, 4.

7. Muna kolo kia Luyalu lw’Ezunda dia mvu lwa Yesu, wantu akwikizi bekituka se alunga e nza yawonso ikituka se paradiso. Kuna mfoko ezunda dia mvu, mawonso man’o Nzambi katumina Yesu mevangama. I bosi ketambik’e Kintinu kw’Es’andi. (1 Korinto 15:24) Ekuma olembi samunwina kwa akundi ye azodi aku oma mesinga vanga e Kintinu kia Nzambi?

[Foto muna lukaya 13]

O mengana ke kukala diaka ko muna luyalu lwa Yesu, ngatu vo mpambani mu kuma kia nswaswani za makanda ma nitu