Longi dia 8

Zingu kia Nzo Eki Kiyangidikanga Nzambi

Nkia fulu kena o yakala muna zingu kia nzo? (1)

O yakala aweyi kafwete tatil’o nkaz’andi? (2)

Ayeyi i mbebe a se? (3)

Nkia mbebe kavwidi o nkento muna zingu kia nzo? (4)

Adieyi kevavang’o Nzambi kuna kwa amase ye kwa wana? (5)

Aweyi i nyindu a Nkand’a Nzambi muna diambu dia luvambanu lwa yakala yo nkento yo vambana kwa longo? (6, 7)

1. O Nkand’a Nzambi uvovele vo o yakala i ntu, yovo mfumu, muna nzo. (1 Korinto 11:⁠3) O yakala ofwete kala yo nkento mosi kaka. Yau ewole bafwete kazala mun’owu wa nsiku miawonso.—1 Timoteo 3:2; Tito 3:1.

2. O yakala ofwete zola o nkaz’andi kons’owu kekuyizolelanga. Ofwete kuntatila wauna o Yesu ketatilanga alandi andi. (Efeso 5:25, 28, 29) Kafwete wandanga ko ngatu vo bangika o nkaz’andi. Kansi, ofwete kumvan’o zitu yo kunzitisa.—Kolosai 3:19; 1 Petelo 3:7.

3. O se kafwete salanga kwayingi muna dikila esi nzo andi. Kafwete vananga madia, mvwatu ye nzo kuna kwa nkento ye kwa wana. O se kafwete lungisanga mpe e nsatu za mwanda za esi nzo andi. (1 Timoteo 5:8) Kafwete vitang’o ntu muna sadisa esi nzo mu longokanga oma ma Nzambi yo makani Mandi.—Nsiku 6:4-9; Efeso 6:4.

4. O nkento kafwete kala nsadisi ambote kuna kwa yakala diandi. (Etuku 2:18) Kafwete sadisang’o yakala muna longa yo ludikang’o wana. (Ngana 1:8) O Yave ovavanga vo o nkento katoma lunga-lungang’esi nzo andi muna zola kwawonso. (Ngana 31:10, 15, 26, 27; Tito 2:4, 5) Kafwete vuminang’o nkaz’andi.—Efeso 5:22, 23, 33.

5. O Nzambi ozolele vo o wana  balemvokelanga amase mau. (Efeso 6:1-3) Ovavanga vo amase balonganga yo singikang’o wan’awu. Amase bafwete vaulang’e ntangwa kinumana bakalanga yo wan’au yo longokanga yau o Nkand’a Nzambi, yo lungisanga e nsatu zau za mwanda ye za nyindu. (Nsiku 11:18, 19; Ngana 22:6, 15) Amase ke bafwete longela wana kuna mbadi ko ngatu vo kubabangika.—Kolosai 3:21.

6. Vava o yakala yo nkento kebetoma wizananga ko, bafwete vav’o lemvokela e nsiku mia Nkand’a Nzambi. O Nkand’a Nzambi ukutuvovesanga twakalanga yo zola yo lolokanga. (Kolosai 3:12-14) E Diambu dia Nzambi ke dilonganga ko vo o vambana i nzila a fokolwela e ntantani zakete. Kansi, ezak’e ntangwa nanga o nkento olenda vambana yo yakala, kele vo (1) kuna lukanu o yakal’oyambwidi dikila esi nzo, (2) kele vo nkwa nsoki kikilu, yamu tezo kia sia o moyo a nkaz’andi mu vonza, yo vimpi wandi, yovo (3) e kitantu kiandi kilweke muna tezo kia kunsima kalembi sambila Yave.—1 Korinto 7:12, 13.

7. O yakala yo nkento bafwete kala ye kwikizi kwa muntu yo nkw’andi. E zumba i sumu kuna kwa Nzambi ye kuna kwa nkaz’andi. (Ayibere 13:4) Mvukana za yakala yovo nkento yo muntu akaka i vangu kaka dilenda vambanisa o longo yo sompa wakaka. (Matai 19:6-9; Roma 7:2, 3) O Yave omenganga o luvambanu lwa longo avo ke mun’owu uvovele Nkand’a Nzambi ko yo sompa muntu akaka.—Malaki 2:14-16.

[Foto muna lukaya 16, 17]

Nzambi ovavanga vo amase balongang’o wana yo kubasingika

[Foto muna lukaya 17]

O se dianzodi odikilanga esi nzo andi muna nitu ye muna mwanda