Longi dia 12

Zitu wa Moyo yo Menga

Aweyi tufwete badikil’o moyo? (1) Yo sulula kuna lukanu? (1)

Akristu aweyi besongelanga e sungididi kiau mu kuma kia vonza? (2)

Nga diambi muna vonda e bulu? (3)

Nkia fu yakaka ilembi zitisang’o moyo? (4) Aweyi i nsiku a Nzambi mu kuma kia menga? (5)

Nga uvovanga mpe mu diambu dia vutulwilw’o menga? (6)

1. O Yave i tuku dia moyo. E lekwa yawonso in’o moyo muna yandi yavwil’o moyo. (Nkunga 36:⁠9) O moyo wavauka kuna kwa Nzambi. Kana nkutu i moyo a ndiona kawutukidi ko, una muna vumu kia ngudi, wantalu kuna kwa Yave. O vond’o nsedia una muna vumu kuna lukanu i sumu vana meso ma Nzambi.—Luvaiku 21:22, 23; Nkunga 127:3.

2. Akristu akieleka besiang’e sungididi mu kuma kia vonza. Betoma lunga-lunganga makalu mau ye nzo zau zalembi twas’e vonza. (Nsiku 22:8) Aselo ya Nzambi ke besianga moyo au mu vonza ko mu diambu dia nkembo yovo muna yengeyenge. I diau vo kebekuyisianga mu nsaka zambi ko, zina zimwesanga akaka e mpasi kuna lukanu. Bevenganga e nsaka za nsoki.—Nkunga 11:5; Yoane 13:35.

 3. O moyo a bulu mpe wavauka kuna kwa Mvangi. O nkristu olenda vonda e bulu muna vwa madia ye mvwatu, yovo muna kuyitanina mu mayela yovo muna vonza. (Etuku 3:21; 9:3; Luvaiku 21:28) Kansi diambi dia vonda e bulu mu kuma kia nsaka yovo mu nkatu nkatu.—Ngana 12:10.

4. O nua e fuomo, yovo bukuta e noz-de-bétele ye nua e dikaya mu nkatu nkatu ke difwene ko kwa akristu. O mavangu mama mambi e kuma kadi (1) bunduna mekutubundunanga, (2) meyivisanga e nitu zeto ye (3) mamvindu. (Roma 6:19; 12:1; 2 Korinto 7:1) Dilenda kala diampasi muna yambul’o mavangu mama. Kansi tufwete dio vanga muna yangidika Yave.

5. O menga mpe mavauka mena vana ndose a Nzambi. O Nzambi ovovele vo o moyo muna menga una. I diau vo o dia o menga diambi. Diambi mpe o dia e bulu kina kekivaikisu menga ko. E bulu kivondelo muna mbota yovo kifwididi muna ntambu ke kifwete diwa ko. Kele vo kivondelo mun’edionga yovo muna nkele kifwete vayikiswa o menga vana vau, ovo e bulu kiokio kia dia.—Etuku 9:3, 4; Fuka 17:13, 14; Mavangu 15:28, 29.

6. Nga diambi dia vutulwa o menga? Sungamena dio vo o Yave ovavanga vo twakenga o menga. Disongele vo kadifwene nkutu ko o siwa o menga ma wantu akaka muna nitu zeto ngatu vo menga ma yeto kibeni mateka vaikiswa yo lundwa. (Mavangu 21:25) I diau vo, akristu akieleka ke betondanga vutulwa menga ko. Betondanga ezaka mpila za nguka kwa nganga za mawukilu, nze i dikilwa muna soro o madia mena vo ke matukidi mu menga ko. Bezolanga zinga, kansi ke betezanga vuluza moyo ko muna kulula e nsiku mia Nzambi.—Matai 16:25.

[Pictures on page 25]

Muna yangidika Nzambi, tufwete venga o vutulw’o menga, fu ya safu ye kuyisia muna vonza kondwa kuma