Kapu Kia 21

Ekani dia Yave Disikila

1, 2. (a) Adieyi i kani dia Yave muna vangwa yandi ya ngangu? (b) Aki nani bakoteswa mun’ekanda dia kiese dia Nzambi?

 EKANI dianzodi dia Yave i diadi vo—e vangwa yawonso ya ngangu yayikana muna nsambila ya Nzambi mosi kaka aludi, yau awonso bavwa luvevoko lwa nkembo a wan’a Nzambi. Olwalu i luzolo mpe lwa awonso bezolanga unsongi.

² O Yave wayantik’o lungisa ekani diadi diampwena vava kayantika e salu kiandi kia sema. Evangwa kiantete kasema i Mwana ndiona wina vo tuka mfuluk’andi okalanga se “ntemo a nkembo [a Nzambi], ye [fwani-fwani kiandi, NW].” (Ayibibere 1:1-3) O Mwana ndioyo yandi kaka kavang’o Nzambi yandi amosi. Muna Yandi, i mwasemenwa e lekwa yawonso yakaka: entete, ambasi kun’ezulu, i bosi wantu ova ntoto. (Yobi 38:7; Luka 3:38) Awonso awaya bakala s’ekanda dimosi kaka muna nsema wawonso. O Yave okedi se Nzambi a yau awonso, wa Mfumu a Nz’amvimba ye Se diau dianzodi.

3. (a) Yeto awonso nki twavwila kwa mase meto mantete? (b) Nkia nkubika ya zola kavang’o Yave mu kuma kia mbongo ya Adami

³ Vava mase meto mantete batumbwa e tumbu kia lufwa mu kuma kia nkolam’au kuna lukanu bavaikiswa muna Edene yo bembolwa kwa Nzambi. Ke  bakala diaka esi kanda diandi ko dia nsema wawonso. (Etuku 3:22-24; Nsiku 32:4, 5) Yeto awonso tu mbongo au, ozevo twawutuka ye ngindu z’esumu. Kansi, o Yave wazaya wo vo vekala ye awana muna mbongo ya Adami bezola unsongi. Ozevo, muna zola kwawonso wavanga e nkubika kimana vo bavwa o “vevoka kwa nkembo a wan’a Nzambi.”—Roma 8:20, 21.

E Isaele Wavidisa Elau Diampwena

4. Nki’elau kavan’o Yave kwa Isaele yankulu?

⁴ Vioka 2.500 ma mvu tuka kiavangilwa Adami, o Yave wavana elau kwa wantu dia kala ye ngwizani ambote yo Yandi. Wasola Isaele yankulu bakala se nkangu andi yo kubavana e Nsiku miandi. (Etuku 12:1, 2) Wabakitula se zula yo kubasadila mun’owu w’ekani diandi. (Nsiku 14:1, 2; Yesaya 43:1) Kansi kadi, bakala muna umbundu w’esumu yo lufwa, ozevo, ke bavwa luvevoko lwa nkembo ko luna bateka vwa Adami yo Eva.

5. Aneyisaele aweyi bavidisila e ngwizani au ambote yo Nzambi?

⁵ Kansì, Aneyisaele basongw’edienga kwa Nzambi. Bakala mpe ye mbebe ya lemvokela Yave w’Es’au yo sadil’e ngwizani yo lukanu lwandi. O Yesu wasonga o mfunu wa lungisa e mbebe yayi. (Matai 5:43-48) Kansi, o nkangu a Isaele ke balenda wo vanga ko. Vava Ayuda awana bavova vo “Ese dimosi tuna diau, Nzambi” o Yesu wavova vo o mavangu ye fu yau yavunisanga e mvovo miau. (Yoane 8:41, 44, 47) Muna mvu a 33 T.K., o Nzambi wafokola e Nsiku miamina ye ngwizani ambote bakala yau Aneyisaele yo yandi. Ediadi nga diasonga vo wantu ke balendi kala diaka ye ngwizani ambote ko yo Nzambi?

 Nkutika ya “Ma ina Kun’ezulu”

6. Adieyi i kani dia “luyalu” kayik’o Paulu muna Efeso 1:9, 10?

⁶ O Paulu wa ntumwa wasonga vo akaka vana vena wantu balenda kwau vwa e ngwizani ambote yo Nzambi. Kasikil’owu, vava kayika e nkubik’a Nzambi eyi ina vo muna yau awana bekwikilanga bekituka s’ekanda Diandi o Paulu wasoneka vo: O “[Nzambi] watuzayis’e mbumba ya luzolo luandi, mun’owu wa zola kwandi, mana kayikànina ma luyalu mu nlungu a ntangwa, kayikanesa ma yawonso muna Kristu, e ma ina kun’ezulu, y’eyi in’ova nza.” (Efeso 1:9, 10, NW) O “luyalu” lwalu luna muna Yesu Kristu. Muna yandi, o wantu balenda vwa edienga vana ndose a Nzambi. Lutangu lwakete kaka muna yau bena ye vuvu kia kwenda kun’ezulu. Ulolo wa wantu akaka bezingila ova ntoto yakwele mvu.

7. Aki nani i “ma ina kun’ezulu”?

⁷ Entete, kina kia Pentikosti ya mvu a 33 wa T.K. bayantik’o kutika “e ma ina kun’ezulu,” i sia vo, awana bekal’entwadi yo Kristu muna Kintinu ki’ezulu. Muna kuma kia lukwikilu lwau muna kimenga kia Yesu beyikilwanga vo asongi kuna kwa Nzambi. (Roma 5:1, 2) Vava yafwan’entangwa, Ayuda ye esi zula bakoteswa muna buka kiaki ikuma vo lutangu lwa “ma ina kun’ezulu” 144.000. (Ngalatia 3:26-29; Lusengomono 14:1) Akete kaka muna yau i basidi ova ntoto.

Nkutika ya “Ma In’ova Nza”

8. Aki nani i “ma in’ova nza” ye nkia ngwizani bavwidi yo Yave?

⁸ Luyalu lwalu lukutikanga mpe e “ma in’ova nza.” Mazunda ma wantu bekutikwang’owau ye vuvu kia  zinga yakwele mvu ova ntoto. Kumosi ye nsadiswa ya Kintinu, oyau bekembelelanga nkumbu a Yave yo tundidika e nsambil’andi. (Yesaya 2:2, 3; Sefaniya 3:9) Oyau beyikilanga mpe Yave nze “S’au” kadi bazeye vo yandi i nto a moyo. Bavwidi e nkal’ambote vana ndose andi muna lukwikilu lwau muna menga matengoka ma Yesu. (Lusengomono 7:9, 14) Kansi, wau vo asumuki kusentu kaka beyikilwa mvimba vo wan’a Nzambi.

9. Nkia nsilu kevananga muna Roma 8:21 kwa wantu?

⁹ Awana bena ye vuvu kia moyo ova ntoto belakukilwang’e ntangwa ina o wantu belwaka muna “vevoka kwa nkembo a wan’a Nzambi.” (Roma 8:21) O luvevoko lwalu luyantika vav’o Kristu ye makesa mandi m’ezulu betwasa e mpasi zayingi zifokokela muna Armangedo. Kikala se lufwasu lwa kintwadi kia nza ya Satana, yo landilwa kwa nsambu za Luyalu lw’Ezunda dia Mvu lwa Kristu muna nkum’a Kintinu.— Lusengomono 19:17-21; 20:6.

10. E selo ya Yave nkia nkunga wa nkembo beyikana mu yimbila?

¹⁰ Nkia mpila kiese kikala vava e selo ya Yave ova ntoto bekembela Nzambi kumosi ye selo yandi kun’ezulu: “O mavangu maku manene y’esivi, e Yave wa Nzambi ampungu; e fu yaku yansongi ye ludi, e Ntinu a mvu ya mvu. E Yave, nani olembi vumina yo kembel’e nkumbu aku; kadi ngeye kaka wavauka; e zula yawonso ikwiza kunda vana ndose aku; kadi o mavangu maku mansongi masengomweno.” (Lusengomono 15:3, 4) Elo, e selo yawonso ya Yave beyikana muna  nsambila ya Nzambi mosi kaka aludi. Amafwa mpe befulwa yo vewa elau diayikam’o wisa ezu diau muna kembela Yave.— Mavangu 24:15.

Luvevoko lw’Esivi Kuna Ntwala

11. Nkia mpila luvevoko bevwa awana besala yo moyo muna mpasi zayingi?

¹¹ Vava zimanisa e mpasi zayingi ye vava Armangedo yiveleles’o ntoto mu vempola yimpumbulu o Satana kekala diaka “nzambi a tandu kiaki” ko. Asambidi a Yave ke benwana diaka yo umpukumuni wambi wa Satana ko. (2 Korinto 4:4; Lusengomono 20:1, 2) E nsambila za luvunu ke zisokela diaka Yave luvunu ko ngatu vambanisa diaka kintwadi kia wantu. E selo ya Nzambi aludi ke bebangikwa diaka kwa ayadi alembi songa ko. Nkia mpila luvevoko lusinga kala!

12. O wantu awonso aweyi bevevokela mun’esumu ye mpasi ditwasanga?

¹² O Yesu wa “Mwan’ememe a Nzambi, on’okatul’esumu dia nza” osadila e nluta miawonso mia kimenga kiandi muna sukisa esumu yo lufwa muna wantu. (Yoane 1:29) Vava kakal’ova ntoto o Yesu waloloka esumu dia muntu, oyandi wawuka mpe o muntu ndioyo mu songa eziku vo unlolokele. (Matai 9:1-7; 15:30, 31) Diau adimosi mpe kevang’o Kristu Yesu wa Ntinu a Kintinu kia Nzambi kun’ezulu, owuka ampofo, mababa, afwa matu, ana bazengok’o malu yovo moko, akwa yimbevo ya ntu, ye yakaka mpe. (Lusengomono 21:3, 4) Alemvoki awonso bevevoka muna “nsiku esumu” muna kuma kiaki e ngindu zau zawonso ye mavangu mau mekubayangidika yo yangidika mpe Nzambi. (Roma 7:21-23) Kuna  mfoko Ezunda dia Mvu oyau belungiswa yo lwaka muna ‘mpwa ye fwaniswa’ kia Nzambi mosi kaka aludi.— Etuku 1:26.

13. Kuna mfoko a Luyalu lw’Ezunda dia Mvu o Kristu adieyi kevanga, ye nkia ndandu?

¹³ Vav’o Kristu kekitula wantu awonso se alunga, otambika e wisa kavewa muna salu kiaki kw’eS’andi: “[o]yekol’e kintinu kwa Nzambi w’Ese; vava kevwa tumbula kuluntu wawonso, ye wisa yawonso, ye nkuma. Yala keyala kaka, yavana kevwa vindakes’atantu awonso kunansi a malu mandi.” (1 Korinto 15:24, 25) O Luyalu lwa Kintinu lw’Ezunda dia Mvu lulungisa mvimba ekani diandi; ozevo, luyalu lwalu ke lukala diaka mfunu ko vana vena Yave yo wantu. Wau vo esumu yo lufwa lufokolwa emvimba, o wantu bevevolwa mu mpasi zawonso, o mfunu wa kinkûdi kia Yesu ufokoka. O Nkand’a Nzambi usonganga vo: “I bosi, o Mwana yandi kibeni, osakidikwa kwa ndiona wansakidikila lekwa yawonso, o Nzambi kakala wonso muna wonso.”— 1 Korinto 15:28.

14. Nkia lufimpu lufimpwa wantu awonso alunga, mu nkia kuma?

¹⁴ Kuna nima a mama mawonso, wantu alunga bevewa elau dia songa vo e nzengo zau i sadila Nzambi mosi kaka aludi yakwele mvu. Muna kuma kiaki, muna kituka mvimba se wan’andi o Yave ofimpa wantu awaya awonso alunga muna lufimpu lwansuka. O Satana ye nkwiya miandi bevaikiswa muna mbilu. O lufimpu lwalu ke lutwasa mfwilu ko kw’awana bezolanga Yave. Kansi konso ndiona okolamena Yave  mu kondwa kwikizi ofwaswa yakwele mvu kumosi yo nkolami antete ye nkwiya miandi.— Lusengomono 20:7-10.

15. Nkia mpila zingu kikala ye vangwa yawonso ya ngangu ya Yave?

¹⁵ O wantu awonso alunga bekuyisia kun’esambu dia kimfumu kia Nzambi muna lufimpu lwaluna o Yave okubatambula se wan’andi. Tuka ntangwa yina, oyau bekala mvimba yo luvevoko lwa nkembo lwa wan’a Nzambi nze kanda dia Nzambi muna nsema wawonso. E vangwa yawonso ya ngangu kun’ezulu yo va ntoto beyikana diaka muna kunsambila nze Nzambi mosi kaka aludi. Ozevo ekani dia Yave dilungana! Nga ozolele kala mosi mun’ekanda diadi dia kiese dizingila yakwele mvu muna nsema wawonso? Avo elo, tuwondelele walemvokela oma kevovanga Nkand’a Nzambi muna 1 Yoane 2:17: “E nza mpe vempoka ivempoka, y’eketo diandi: vo i ndion’ovangang’o luzolo lua Nzambi, zing’aka kezinganga yakwele mvu.”

Yuvu ya Lufimpu

• Nkia ngwizani yakalanga kw’asambidi awonso a Yave, vav’o kolama ke kwakala ko muna Edene?

• Nkia mbebe ina kw’awana bena vo selo ya Nzambi?

• Aki nani besinga kituka wan’a Nzambi, ye aweyi evangu diadi dinina e ngwizani y’ekani diandi mu kuma kia kintwadi kia nsambila?

[Yuvu ja longokela]

 [Foto muna lukaya 190]

Wantu alemvoka bevw’o moyo muna paradiso mu nza yawonso