Kapu Kia 1

Kintwadi kia Nsambila omu Lumbu Yeto—Adieyi Kisongele?

1, 2. (a) Nkia kintwadi kiesivi kivangamanga omu lumbu yeto? (b) Nkia vuvu kiesivi bavwidi akwa ntima miansongi?

 MUNA nza yawonso kintwadi kiesivi kivangamanga kia nsambila. Kikutakesanga mazunda ma wantu a zula yawonso, makanda ye ndinga. Konso mvu ndonga yikutakeswanga. Muna Nkand’a Nzambi bazayakene vo “mbangi” za Yave yo yikilwanga mpe vo “ndong’ayingi.” Besadilanga Nzambi yo “fuku yo mwini.” (Yesaya 43:10-12; Lusengomono 7:9-15) Ekuma bevangilanga wo? Ekuma kadi bazeye Yave wa Nzambi mosi kaka aludi. Ediadi dikubafilanga mu sia e zingu yau e ngwizani ye nsiku miandi miansongi. Bazeye wo mpe vo mu “lumbu yambaninu” tuzingilanga ya nza yayi yambi, ke kolo ko o Nzambi ofwasa yo ye vingisa nz’ampa ya paradiso va fulu kiandi.— 2 Timoteo 3:1-5, 13; 2 Petelo 3:10-13.

² E Diambu dia Nzambi disianga o nsilu vo: “Finkolo-kolo kaka, o kimpumbulu, [ke kala diaka ko, NW] . . . Alembami bevwa nza; beyangalela muna mawete mayingi.” (Nkunga 37:10, 11) “Asongi bevwa nza, besikila vo yakwele mvu.” (Nkunga 37:29) ‘[O Nzambi] okunguna mansanga mawonso muna meso mau; o lufwa, ke lukala diaka ko; musungula kala diaka dilu, yovo kazu, ngatu mpasi: oma mantete maviokele.’— Lusengomono 21:4.

3. E kintwadi kiakieleka kia nsambila aweyi kilendakaninanga?

 ³ Awana bekutakeswanga owau muna nsambila aludi i bevit’o zingila muna nz’ampa yayina. Balongoka o luzolo lwa Nzambi yo vanga lo una ufwene. O Yesu wasonga mfunu a diambu diadi vava kavova: “I wau wuwu o moyo a mvu ya mvu, bazaya ngeye vo i Nzambi aludi, yo Yesu Kristu mpe ona watuma.” (Yoane 17:3) O Yoane wa ntumwa wasoneka: “E nza mpe vempoka ivempoka, y’eketo diandi: vo i ndion’ovangang’o luzolo lua Nzambi, zing’aka kezinganga yakwele mvu.”— 1 Yoane 2:17.

Adieyi Disongele Ediadi?

4. (a) E kintwadi kia ulolo wa wantu muna nsambila adieyi kisongele omu lumbu yeto? (b) O Nkand’a Nzambi aweyi keyikilanga e nkutika yayi?

⁴ E kintwadi kia ulolo wa wantu muna nsambila adieyi kisonganga omu lumbu yeto? E kiaki i ziku kisonganga vo tufinamene kikilu ku mbaninu a nza yayi yambi, yo yantika vana vau e nz’ampa ya Nzambi. Oyeto tu ambangi a ndungana ya ungunza wa Nkand’a Nzambi una wasakula e nkutika yayi. Umosi mu ungunza wau uvovanga vo: “Muna lumbu ya mbaninu, o mongo a nzo a Yave [e nsambila andi yaludi] usikidiswa van’ebata dia miongo, [vana ntandu a nsambila zawonso] . . . kuna ivomen’e minkangu. Zula yingi ikwenda vova vo, nwiza twatomboka kuna mongo a Yave; katulong’owu wa nzila zandi, twadiatila muna mayendelo mandi: ‘kadi muna Zione i muvaikil’o nsiku, yo muna Yerusaleme e diambu dia Yave.’”—Mika 4:1, 2; Nkunga 37:34.

5, 6. (a) Nga dia ludi vo e zula mu kwiza bena kwa Yave? (b) Nkia yuvu tufwete kuyivanga e?

⁵ Dia ludi vo ke zula yamvimba ko yikotanga muna  nzo ya nsambila ya Yave eyi ya mwanda kansi, mazunda ma wantu tuka muna zula yawonso mu kota mo bena. Vava belongokanga makani ye nkal’ambote ya Yave wa Nzambi, e ntima miau miyangalalanga kikilu. Kuna lembama kwawonso bevavang’o zaya dina o Nzambi kevavanga oku kwa yau. E sambu kiau kiafwanana ye kia ntozi a nkunga ona wavova vo: “Undonga yavanga luzolo luaku kadi nge u Nzambi ame.”—Nkunga 143:10.

⁶ Nga una muna buka kia ndong’ayingi yayi ya wantu ana kekutikang’o Yave mu yikana muna nsambila? Wau olongwanga e Diambu diandi nga nkal’aku yisonganga vo okwikilanga wo vo o Yave i Nto ya malongi momo? Ya mu nkia tezo ‘odiatilanga muna mayendelo mandi’?

Aweyi Dilendakenenanga

7. (a) E kintwadi kia nsambila nkia tezo kilwaka? (b) Ekuma ofwete kitukila se nsambidi a Yave mu nzaki owau, ye aweyi tulenda sadisila akaka mu vanga wo?

⁷ I kani dia Yave vo e vangwa yawonso ya ngangu yakal’entwadi muna nsambila yakieleka. Ekw’e mpila tuvingilanga e lumbu kina kikala vo awonso bezinganga besambila Nzambi mosi kaka aludi! (Nkunga 103:19-22) Kansi ediadi muna vangama, o Yave ofwasa ntete awonso bemengang’o vanga luzolo lwandi lwansongi. Muna walakazi wandi oteka zayisanga mana kevanga kimana vo mwawonso o wantu babaka elau dia soba e mpila zingu yau. ( Yesaya 55:6, 7) Mu kuma kiaki, “kuna kwa zula yo makanda, ye ndinga, ye nkangu miawonso” omu lumbu yeto vesiwanga e mboka yayi ya nzaki: “Nuvumina Nzambi,  yo kumvan’o nkembo; kadi e ntangw’a mfundis’andi ilueke: [nusambila, NW ] ndiona wavang’ezulu, yo ntoto, yo kalunga, ye nto za maza.” (Lusengomono 14:6, 7) Nga otambulwilanga e mboka yayi? Kele vo elo, i lau diaku dia bokela akaka bazaya yo sambila Nzambi aludi.

8. Vava tumene longoka malongi ma lubantiku ma Nkand’a Nzambi, nkia ndungunuka diaka tufwete vanga?

⁸ Ke kani dia Yave ko vo kasambilwanga kwa wantu bevovanga vo yandi bekwikilanga kansi ovo tala wete dia yau kibeni kaka bevavanga. O Nzambi ozolele vo wantu bakala ye “visa kia zaya luzolo luandi” yo songanga lo muna zingu yau. (Kolosai 1:9, 10) Ozevo, wantu awana belongokanga mambu ma lubantiku ma Nkand’a Nzambi bevavang’o nungunuka muna zikuka kwa Kikristu. Bena yo luzolo lwa toma zaya Yave, lwa wokesa yo kolesa umbakuzi wau muna Diambu diandi, yo vanga wo muna zingu yau. Bevavang’o tanginina e fu ya S’eto ezulu yo badikilanga mambu una kebadikilanga mo oyandi. Ediadi dikubafilanga mu lungana emvimba mu salu kia vuluza mioyo kabavene mu sala ova ntoto omu lumbu yeto. Nga i lwau mpe o luzolo lwaku?— Maku 13:10; Ayibere 5:12–6:3.

9. E kintwandi kia kieleka aweyi kilendakenenanga o unu?

⁹ O Nkand’a Nzambi usonganga vo awana besadilanga Yave bafwete kala nkangu wayikakiana. (Efeso 4:1-3) E kintwadi kiaki kifwete songwa owau, kana una vo mu nza ya vambana tuzingilanga ye twakinu nwana yo usumuki weto. O Yesu wasamba kimana vo alongoki andi awonso bakala amosi yo vwa kintwadi kiakieleka. Adieyi disonganga ediadi? Diantete, bavwa  ngwizani ambote yo Yave ye Mwan’andi. Dianzole, bawizana muntu yo nkw’andi. ( Yoane 17:20, 21) Muna kuma kiaki, e nkutakani ya Akristu i nkubika kesadilanga o Yave muna longa nkangu andi.

Nkia Mambu Mesadisanga mu Vwa Kintwadi Kiaki?

10. (a) Vava yeto kibeni tusadilanga o Nkand’a Nzambi mu baka e mvutu za yuvu tuvwidi o mfunu nki tunungununanga? (b) Badika mambu mesadisanga muna kintwadi kia Kikristu muna van’e mvutu za yuvu ina muna tini kiaki.

¹⁰ Mambu nsambwadi mamfunu mesadisanga mu vwa e kintwadi kia nsambila. Vava ovana e mvutu za yuvu ilende, yindula konso diambu una dilenda vanga mu ngwizani aku yo Yave ye akwaku Akristu. Obadika mambu mama kumosi ye sono iyikilu ke ina yasonama ko ikusadisa muna nungunuka muna zayi wa Nzambi, yo baka ngangu yo umbakuzi—una vo i fu tuvwidi o mfunu yeto awonso. (Ngana 5:1, 2; Filipi 1:9-11) Badika mambu mama dimosi dimosi.

(1) Tuzayanga vo o Yave yandi ovwidi o nswa wa sikidisa dina diambote ye dina diambi. “Bunda Yave e vuvu yo ntim’aku wawonso, kuyekamena waku umbakuzi ko. Muna ngyenda zaku zawonso untadila, oyandi osingika nzila zaku.”— Ngana 3:5, 6.

Ekuma tufwete vavila malongi yo luludiku lwa Yave vava tubakanga e nzengo? (Nkunga 146:3-5; Yesaya 48:17)

(2) Tuna ye Diambu dia Nzambi muna kutufila. “Una nwatambula kwa yeto diambu dia lutumu, dina vo dia Nzambi, nwatambula dio, ke nze diambu dia  wantu ko, una din’e kieleka, diambu dia Nzambi kaka.”— 1 Tesalonika 2:13.

Nkia vonza kikalanga muna vanga dina “tubadikidi” vo i diasonga? (Ngana 14:12; Yeremiya 10:23, 24; 17:9)

Kele vo katuzeye ko elongi kevananga Nkand’a Nzambi mu kuma kia diambu kingandi, aweyi tufwete vanga? (Ngana 2:3-5; 2 Timoteo 3:16, 17)

(3) Yeto awonso tubakanga e ndandu za nkubika yau yimosi ya madia ma mwanda. “O wan’aku awonso bekal’alongoki a Yave.” (Yesaya 54:13) “Mbula twabadikaziana mpe, twapalanina muna zola yo mavangu mambote; ke tuvunz’o lungana ko, nze fu kia wantu akaka, tuwonzaziana kaka; yo siamisa wo o vanga, wau tumwene vo e lumbu [kia lufwasu] kifinamene.”— Ayibibere 10:24, 25.

Nkia nluta bebakanga awonso belandang’e nkubik’a Yave ya madia ma mwanda? (Yesaya 65:13, 14)

(4) Yesu Kristu i Mfidi eto, ke muntu ko. “Vo i yeno, ke nuyikwa ko vo, Nlongi: kadi vena y’omosi, wa nlongi eno, oyeno awonso nu wana-ngudi. Ke nuyiki muntu ko vo s’eno ova nza: kadi vena y’omosi w’Es’eno, ona wina kun’ezulu. Ke nuyikwa ko vo, Ntu: kadi vena y’omosi wa ntu eno, o Kristu.”— Matai 23:8-10.

Nga vena yo muntu muna yeto ofwete kuyibadikila vo osundidi akaka? (Roma 3:23, 24; 12:3)

(5) Tusianga e vuvu vo luyalu lwa Kintinu kia Nzambi kaka i lusadisa o wantu. “I nsamba yiyi nusamba: ‘E S’eto koko’zulu, yambula nkumbu aku yazitiswa. E kintinu kiaku kiza. O luzolo luaku luavangam’ova  nza nze koko’zulu. Kansi nutombel’ekulu e kintinu kiandi, ye ndungidi andi: ozevo e lekwa yayi yawonso ikunukudikilwa.”— Matai 6:9, 10, 33.

“Otombel’ekulu e kintinu” aweyi kutaninanga e kintwadi kieto? (Mika 4:3; 1 Yoane 3:10-12)

(6) Mwand’avelela usadisanga asambidi a Yave mu yima e fu yina mfunu muna kintwadi kia Kikristu. “E mbongo a mwanda, zola, kiese, NW], luvuvamu, luzindalalau, NW], walakazi, unsongi, kwikizi, lembama, volo.”— Ngalatia 5:22, 23.

Adieyi tufwete vanga kimana o mwand’a Nzambi wayima e mbongo andi mu yeto? (Mavangu 5:32)

Okala yo mwand’a Nzambi aweyi ulenda tomesena e ngwizani eto ye akweto Akristu? (Yoane 13:35; 1 Yoane 4:8, 20, 21)

(7) Asambidi aludi a Nzambi awonso belungananga mu samuna e nsangu zambote za Kintinu. “E nsangu zazi zambote za kintinu zisamunwa muna nza yawonso, muna umbangi kwa zula yawonso; i bosi iluak’e mbaninu.”— Matai 24:14.

Nki kifwete kutukumika mu kuyivana mu salu kiaki kia samun’e nsangu zambote? (Matai 22:37-39; Roma 10:10)

11. Vava tusadilanga e ludi kia Nkand’a Nzambi muna zingu kieto, nkia ndandu ditwasanga?

¹¹ O sambila Yave mu kintwadi dikutufinamesanga kwa yandi yo kutufwanisa mu kala ye kikundi kiambote ye minkwikizi y’akw’eto. Nkunga 133:1 uyikanga vo: “Wa, kuna kwa wete, kuna kwa kiese kwa  mpangi bakadila vamosi!” Nkia mpila kiese kia vaika yo sisa e nza yayi y’eloko diandi diawonso yo umpumbulu, ye nsoki yo kwenda lungana kumosi y’awana bezolanga kieleka Yave yo lemvokela e nsiku miandi!

Yambula e Fu kia Mpambula

12. Ekuma tufwete yambulwila etima dia kuyitumina?

¹² Muna lembi yivisa kintwadi kieto kia nz’amvimba, tufwete yambula e fu kia mpambula. Dimosi muna fu yayi i tima dia kuyivambula yo Nzambi ye nsiku miandi. O Yave okutusadisanga mu venga dio, wau vo okutusonganga etuku diandi, Nkadi Ampemba wa Satana. (2 Korinto 4:4; Lusengomono 12:9) O Satana yandi wavukumuna Adami yo Eva mu veza mana kavova o Nzambi yo baka e nzengo ke zina ngwizani ko ye nsiku mia Nzambi. E mfoko diatwasa, i mpasi kwa yau ye kwa yeto. (Etuku 3:1-6, 17-19) E nza yayi yazala y’etima dia kuyitumina yo lembi lemvokela nsiku mia Nzambi. Idiau vo, tufwete menga etima diadi.

13. Adieyi dilenda songa vo mu kubama tuna mu vwil’e zingu muna nz’ampa yansongi ya Nzambi?

¹³ Kasikil’owu, badika e nsilu wa kiese wa Yave wa vingisa ezulu diampa ye nz’ampa ina “ikalwanga kwa ndungidi” vana fulu kia nza yayi yambi. (2 Petelo 3:13) Ediadi nga ke dikutufilanga ko mu kuyikubika kimana twazinga muna ntangwa yayina vekala kaka unsongi? Disongele vo ofwete wila luludiku lwa Nkand’a Nzambi: “Ke nuzodi nza ko, ngatu eyi in’omu nza. Ovo muntu ozol’e nza, o zola kw’Ese ke kwina mu yandi ko.” (1 Yoane 2:15) Muna kuma kiaki, tuvenganga mwand’a nza yayi—wa vava kuyitumina yo tokanena  mambu ma yau kibeni, umpumbulu yo nsoki au. Tuvavang’o wila Yave yo kunlemvokela muna ntima kana una vo vekwizanga ezaka ngindu muna nitu eto ya sumuka. E mpila zingu kieto kiawonso yisianga umbangi vo e ngindu ye makani meto mefilwanga mu vanga luzolo lwa Nzambi.— Nkunga 40:8.

14. (a) Ekuma dinina o mfunu dia sadila elau tuvwidi owau mu longoka e nzila za Nzambi yo landa zo muna zingu kieto? (b) E sono ya Nkand’a Nzambi iyikilu nkia nsasa ina kwa yeto?

¹⁴ Vava kilwaka e lumbu kina kasil’o Yave mu fwasa e tandu kiaki kiambi ye awonso beyangalelanga kio, ke zingila ko. Ke soba e lumbu kiokio ko ngatu nsiku miandi muna vana diaka e ntangwa kwa awana bekuyivananga mu nza ana balembi yangalelang’o longoka luzolo lwa Nzambi yo vanga lo. Eyayi i ntangwa ya vanga e diambu! (Luka 13:23, 24; 17:32; 21:34-36) Nkia mpila lukasakeso lwa monanga e ndong’ayingi besadilanga elau diadi, kuna zola kwawonso yo landanga luludiku kevananga Yave muna Diambu diandi ye nkubik’andi yo diatila kuna ungudi muna ngyenda zau yamuna nz’ampa! Kele vo tutomene zaya Yave, tutoma kunzola mpe yo kunsadila.

Yuvu ya Lufimpu

• Adieyi ekani dia Yave mu kuma kia nsambila?

• Vava tumene longoka malongi ma lubantiku ma Nkand’a Nzambi, nkia ndungunuka diaka tufwete vav’o nungunuka?

• Adieyi kafwete vanga konso muntu mu yeto kimana twakala twayikakiana y’akaka besambilanga Yave?

[Yuvu ja longokela]

 [Foto muna lukaya 4]

‘Alembami bevwa nza beyangalela muna mawete mayingi’