Kapu Kia 2

Tundidika Yave wa Nzambi Mosi Kaka Aludi

1. Nani i Nzambi mosi kaka aludi?

 O NKAND’A Nzambi uvovanga vo kana una vo vena y’ana beyikwa vo nzambi, ‘kansi oku kwa yeto, vena ye Nzambi mosi kaka w’Ese.’ (1 Korinto 8:5, 6) O “Nzambi mosi” ndioyo i Yave, wa Mvangi a lekwa yawonso. (Nsiku 6:4; Lusengomono 4:11) O Yesu wanyikila vo “eyame Nzambi, wa Nzambi eno.” (Yoane 20:17) Wakwikila muna mvovo mia Mose mivovanga vo: “O Yave yandi i Nzambi [aludi, NW]; ke vena wakaka ko vana kena.” (Nsiku 4:35) O Yave osundidi o nene wa konso má kilenda sambilwa, kiakala teke, wantu, yovo Nkadi Ampemba wa Satana wa tantu andi una vo i “nzambi a tandu kiaki.” (2 Korinto 4:3, 4) Nswaswani ye zazi zawonso o Yave i “Nzambi [mosi kaka, NW ] aludi,” nze una kayikilwa kwa Yesu.—Yoane 17:3.

2. Ozaya oma ma Nzambi mafwete kutufila mu vanga nki muna zingu kieto?

² Wantu ambote ana bezayanga e fu ya Nzambi, yo mana kavanga ye mana kesinga vanga mu kuma ki’eto betuntwanga oku kwa yandi. E nzol’au muna Yave vava yiwokelanga bevavanga kuntundidika. Mu nkia mpila? E mpil’antete muna zayisa oma ma yandi kw’akaka. “Muna nua i mutambulwidilw’e ntambulwil’a luvuluku,” u tutanganga muna Roma 10:10. E mpila yakaka i kuntanginina muna mpova ye mavangu  meto. “Nukadi nu atanginini a Nzambi nze wan’anzolwa,” ututangidi muna Efeso 5:1. Muna toma wo vanga tufwete zaya kieleka Yave.

3. Ayeyi i fu ya Nzambi eyi isundidi?

³ Muna Nkand’a Nzambi muna ye fulu yayingi iyikanga e fu ya Nzambi eyi isundidi. E fu yandi yá yampwena i ngangu, unsongi, nkuma yo zola. “Muna yandi mwina ngangu.” (Yobi 12:13) “Ngyenda zandi zawonso zansongi.” (Nsiku 32:4) Oyandi “nkwa nkuma wayingi.” (Yesaya 40:26, NW) O “Nzambi i zola.” (1 Yoane 4:8) Kansi, muna fu yá yayi ya Nzambi nkia fu kisundidi kina kisonganga e mpila Nzambi kena?

“Nzambi i Zola”

4. Nkia fu kia Nzambi kiamfila mu vanga e nza ye má yawonso ya moyo?

⁴ Badika kana nki kiafila Yave mu vanga e nza ye vangwa ya ngangu ya mianda ye ya wantu. Nga i ngangu zandi yovo nkum’andi? Ve, vava Nzambi kavanga yo ke vakala mfunu a ngolo za nkumiki ko. O unsongi wandi mpe ke wavavwanga kwandi ko vo kakaulwila o lukau lwa moyo kwa akaka. Kansi kadi, o zola kwampwena kwa Nzambi i kwamfila mu kaulwila e kiese kia zinga ye akaka. O zola kwamfila mu sikidisa ekani diandi vo wantu alemvoka bazinga yakwele mvu muna Paradiso. (Etuku 1:28; 2:15) O zola kwamfila mu vengola e sibu kiabwila wantu mu kuma kia kolama kwa Adami.

5. Mun’owu wa Nkand’a Nzambi nkia fu keyikilwanga o Yave ye mu nkia kuma?

⁵ Ozevo, muna fu yawonso ya Nzambi eki kisundidi i zola. I fu kisundidi, i nkal’andi kibeni. Kana una vo eyaka fu yandi nze ngangu, unsongi, yo nkuma yamfunu  mpe, kansì tu, o Nkand’a Nzambi ke vovanga ko vo Yave i mosi muna yau. Kansi uvovanga vo, oyandi i zola. Elo, o Yave i zola. O zola kwaku kufilwanga kwa nsiku, ke kwa nsakwa meso ko. O zola kwa Nzambi kufilwanga kwa nsiku mia ludi ye miansongi. I mpila zola kusundidi, kuna kesonganga yandi kibeni Yave wa Nzambi. O zola kwaku i sinsu kia nzol’andi yakondw’eloko, ye osongelanga yo muna mavangu mandi.

6. Aweyi tulenda tanginina Nzambi kana una vo utusundidi mu nene?

⁶ E fu kiaki kiamfunu kia zola i kikutufwanisanga mu tanginina Nzambi ndioyo. Wau vo tu asumuki, ye tu akete vana kena nanga tulenda banza vo ke tulenda kuntanginina ko. Kansi tuna ye mbandu yakaka ya zola kwampwena kwa Yave: Oyandi ozeye olembi fwana kweto, ke vavanga lunga ko kuna kwa yeto. Ozeye wo vo twavauka vandá ye zingu kialunga. (Nkunga 51:5) Muna kuma kiaki o Nkunga 130:3, 4 uyikanga vo: “E Yave, kala vo [otungunun’o, NW ] bi, E Mfumu, nga nani otelama? Om[u] ngeye mwina luyambulwilu.” Elo, o Yave i “Nzambi a nkenda ye nsambu, nkwa ntim’evundu, o mwingi muna walakazi.” (Luvaiku 34:6) “Nge, e Mfumu, wambote, wa ngyambulwidi.” (Nkunga 86:5) Nkia mpila fiauzi! Nkia mpila lukasakeso lwa sadila Nzambi ndioyo w’esivi yo mona o zola yo mfunu kekutuvwanga!

7. O zola kwa Yave aweyi kulenda monekena muna salu yandi kavanga?

⁷ O zola kwa Yave kumonekanga mpe muna salu yandi kavanga. Badika e lekwa yayingi yambote kavanga muna wete dieto, nze i miongo miambote, mfinda, mayanga, ye mbu. Oyandi okutuvananga mpe madia  ma mpila mu mpila muna yangidika ete dieto yo kutudikila. Vana ntandu, o Yave okutuvananga mpe ulolo wa mvuma zambote za wete ye nsunga za mpila mu mpila ye bulu y’esivi. Wavanga e lekwa ina iyangidikang’o wantu, ye yakaka mpe. Dialudi vo, ozingila omu nza yayi yambi ye nkal’eto yalembi lunga ke tulendi mona mawete mama mawonso ko ma vangwa yandi. (Roma 8:22) Kansi, se yindudi mana kesinga vanga o Yave mu kuma kieto muna Paradiso! O ntozi a nkunga wavova: ‘Oziula koko kwaku, yo yukutisa kinzola-nzola kia mioyo miawonso.’— Nkunga 145:16.

8. Nkia sinsu kisundidi kia zola kasonga o Yave kuna kwa yeto?

⁸ Nki i sinsu kisundidi kia zola kwa Yave kuna kwa wantu? O Nkand’a Nzambi uvovanga vo: “Muna nzola kazolele nza o Nzambi i kavanin’o Mwan’andi amosi, kimana konso on’okwikilanga muna yandi ke vila ko, moyo a mvu ya mvu kevwa.” ( Yoane 3:16) O Yave nga wavanga wo mu kuma kia mambu mambote bevangang’o wantu? Roma 5:8 ovanang’e mvutu: “O Nzambi osongele yandi nzola katuzolele, e kuma wau twakal’asumuki, o Kristu watufwila.” Elo, o Nzambi wafila Mwan’andi alunga ova ntoto muna vana moyo andi se kimenga kia lukulu muna kutukula muna sibu ki’esumu yo lufwa. (Matai 20:28) Ediadi diaziula e nzila kwa wantu bezolanga Nzambi bavwa o moyo a mvu ya mvu. Dia matondo vo o zola kwa Nzambi kusongwanga kwa wantu awonso bazolele vanga luzolo lwandi, kadi o Nkand’a Nzambi uvovele vo: “O Nzambi ke [swaswanisanga wantu, NW ] ko: kansi muna zula yawonso, on’okumvumina yo vanga nsongi, wina y’edieng’oku kena.”— Mavangu 10:34, 35.

9. Evangu dia Yave dia vana Mwan’andi se lukulu mu kuma kieto aweyi difwete fidila e zingu kieto?

 ⁹ Evangu dia Yave dia vana Mwan’andi se lukulu mu kuma kieto yo ziul’e nzila twavwil’o moyo a mvu ya mvu aweyi difwete fidila e mpila tusadilanga e zingu kieto owau? Difwete kolesa o zola kweto kwa Yave wa Nzambi aludi. Ye mpe, tufwete vav’o wila Yesu ona osunzulanga Nzambi. ‘Mun’awonso kafwila [Yesu], kiman’awana bena moyo, ke bakala moyo mu kuma kiau kaka ko, bakadila kaka ndiona wabafwila.’ (2 Korinto 5:15) Nkia mpila kiese kia landanga e ntambi za Yesu kadi oyandi watoma tanginina o zola kwa Yave ye nkenda zandi! Osongelanga zo mu mana kavov’o Yesu kwa alembami: “Nwiz’oku ngina, yeno awonso nufuntukanga yo bimuka yo mazitu, ikunuvundisa. Nuvwata vangu kiame, nwalongwa kwa mono; kadi i nlembami yo ntim’anleka: nwasolola vundu kia mioyo mieno. Kadi vangu kiame kiambote, enatu diame diampevo.”— Matai 11:28-30.

Songang’o Zola kw’Akaka

10. Nkia mpila tulenda songel’o zola kwa akweto Akristu?

¹⁰ Aweyi tulenda songela vo tuna yo zola kuna kwa Akristu y’akweto nze i nzola katuzolel’o Yave yo Yesu? Tala e mpila zayingi tulenda wo songela: ‘O zola [kuzindalalanga, NW ] kuna yo walakazi; o zola ke kuna ye kimpala ko; o zola ke kukusàna ko, ke kukutùndisa ko, ke kulembwa nsongi ko, ke kukuvàvila wandi wete ko, ke kufunga makasi ko, ke kubadika diambi ko; ke kumwena vilwa wete ko, kansi kumwena wete kumosi ye ludi; kuzizidila mawonso, kukwikila mawonso, kusilanga mawonso e vuvu, kuzindalela mawonso. O zola ke kusuka nkutu ko.’—1 Korinto 13:4-8; 1 Yoane 3:14-18; 4:7-12.

11. Kw’akinani diaka tufwete songa o zola ye mu nkia mpila?

 ¹¹ Kw’akinani diaka tufwete songa o zola ye mu nkia mpila? O Yesu wavova: “Dianu vo, nwenda, nwakitula wantu a zula yawonso s’alongoki, nwabavubila muna nkumbu a Se, yo mwana, yo Mwand’avelela: nwabalonga vo balunda mambu mawonso inukanikini.” (Matai 28:19, 20) Ediadi divavanga vo twazayisa e nsangu zambote za Nzambi mu kuma kia paradiso ikwiza muna nz’ampa kw’awana bena vo ke Akristu ko. O Yesu watoma dio kiesesa vo ke tufwete songa kaka o zola kw’awana tuna yau mu lukwikilu lumosi ko: “Kadi ovo nuzolele [kaka] ana banuzolele, nkia nsendo nuna wau? Akwa mpaku nkutu, ke wau bevanga ko e? Ovo nukayisa mpangi zeno kaka, nkia nduta nulut’akaka? A nzenza nkutu, ke wau bevanganga ko?”— Matai 5:46, 47; 24:14; Ngalatia 6:10.

“Diatila Muna Nkumbu a Yave”

12. Ekuma kinina vo Nzambi kaka ofwanukini nkumbu yayi?

¹² E mpila yakaka tulenda tundidikila Nzambi aludi i zaya nkumbu andi kibeni, Yave, yo sadila yo, yo longa yo kw’akaka. O ntozi a nkunga wavova dio muna ntim’andi wawonso vo: “Bazaya wo vo nge kaka wina nkumbu a Yave, u Mpungu omu nza yawonso.” (Nkunga 83:18) E nsasa nkumbu a Yave, “Ona Okadisanga.” Nkwa Makani Manene, olungisanga makani mandi. Nzambi aludi kaka ofwanukini nkumbu yayi, kadi o wantu ke bena ye sikididi ko vo makani mau mesikila. ( Yakobo 4:13, 14) Yave kaka olenda vova vo e diambu diame “disikila” mun’edi ntwikidi dio. ( Yesaya 55:11) Ndonga besivikanga vava bemonanga e nkumbu a Nzambi muna Nkand’a Nzambi wa yau kibeni yo zaya e nsas’andi. (Luvaiku 6:3) Kansi muna bak’e  nluta mia zayi wau nanga vo ‘badiatila [kaka] muna nkumbu a Yave . . . yakwele mvu.’—Mika 4:5.

13. Adieyi divavwanga muna zaya nkumbu a Yave yo diatila muna nkumbu andi?

¹³ Muna kuma kia nkumbu a Nzambi o Nkunga 9:10 uvovanga vo: “Bekubunda e vuvu, ana bazeye nkumbu aku.” Mayingi divavanga ke zaya kaka nkumbu a Yave ko, ozaya e nkumbu andi kwankatu ke disonganga ko vo o muntu vuvu kebundanga kwa yandi. Zaya e nkumbu a Nzambi i sia vo zola e mpila Nzambi kena o Yave, zitisa e wisa kiandi, lemvokela e nkanikinu miandi, yo kumbund’e vuvu muna mawonso. (Ngana 3:5, 6) Diau adimosi mpe diatila muna nkumbu a Yave divavanga vo twayiyekola kwa yandi, twayisunzulanga vo tu’asambidi andi, yo sadila e zingu kieto mun’owu wa luzolo lwa Nzambi. (Luka 10:27) Nga ovanganga wo?

14. Kele vo tuzolele sadila Yave yakwele mvu nkia mpila tufwete kunsadila?

¹⁴ Kele vo tuzolele sadila Yave yakwele mvu ke tufwete sala mpasi sala kwankatu ko. O Paulu wa ntumwa walukisa Timoteo ndiona wasadilanga Yave se mvu miayingi vo: “[Uyilonga, NW ] kak’o vumina Nzambi.” (1 Timoteo 4:7) O vumi utukanga muna ntima wazala ye matondo kwa ndiona ovuminwanga. Ozevo, o “vumi wa Nzambi” i luzitu lwampwena tusonganga kwa Yave. Tusonganga kikundi kianzodi kwa yandi wau vo tukunzitisanga yo yangalela mpe e nzila zandi. Dikutufilanga mu zola vo awonso bazitisanga e nkumbu andi. Tufwete kalanga yo vumi wa Nzambi muna zingu kieto kele vo tudiatila muna nkumbu a Yave wa Nzambi aludi yakwele mvu.— Nkunga 37:4; 2 Petelo 3:11.

15. Aweyi tulenda sambila kaka Nzambi eto?

 ¹⁵ Muna sadila Nzambi yo kunyangidika, yandi kaka tufwete sambila wau vo i “Nzambi ansongo.” (Luvaiku 20:5) Katulendi zola Nzambi ko yo zola mpe e nza yayi yambi ina vo Satana i nzambi. (Yakobi 4:4; 1 Yoane 2:15-17) O Yave otomene zaya e mpila muntu kena konso oyu mu yeto. (Yeremiya 17:10) Ovo tuzola kieleka unsongi, ozeye wo, okutusadisa twazizidila e ntonta zeto za lumbu ke lumbu. Okutusadisa yo nkum’andi wa mwand’avelela kinumana twasund’e mbi iwokelanga kaka omu nza yayi. (2 Korinto 4:7) Okutusadisa mpe twasikidisa e vuvu kieto kia moyo a mvu ya mvu muna paradiso ova ntoto. Nkia mpila vuvu ki’esivi! Tufwete kio toma yangalela yo sadila Yave wa Nzambi aludi ona utuvene elau diadi.

16. Adieyi ofwete vanga kumosi ye mazunda ma wantu akaka?

¹⁶ Mazunda ma wantu omu nza yawonso betambulwilanga e mboka a ntozi a nkunga ona wasoneka vo: “Twatundidikila Yave kumosi, twazangukila nkumbu andi.” (Nkunga 34:3) O Yave okubokelanga wakala entwadi yo ulolo wa wantu a zula yawonso bevanganga wo.

Yuvu ya Lufimpu

• O Yave nkia mpila muntu kena? Nkia nluta tubakanga muna toma zayanga e fu yandi?

• Aweyi tulenda sadisil’o wantu akaka bazaya e ludi mu kuma kia Nzambi?

• Adieyi divavwanga muna zaya Yave yo diatila muna nkumbu andi?

[Yuvu ja longokela]

 [Foto muna lukaya 14]

Muna zola kwandi kwampwena o Yave ‘oziula koko kwandi, yo yukutisa kinzola-nzola kia mioyo miawonso’