Yangalela Muna Zingu Kia Nzo Aku

Balenda kieleka kala ye luyangalalu esi nzo?

Aweyi dilendakanina?

 Ng’ozeye ese, ngudi yo wana bezingang’entwadi ye kiese nze awaya omwene omu finkanda-nkanda fiafi? Kw’awonso kuna ye mpambani za makanda. Mpambana z’akala y’akento, kondwa kwa salu kia sikila, mase makondwa akento ye ngudi zakondwa akala, yo lembi lungisa o lukanu ​—mawonso mama i metwasanga mpasi. Nkwa ngangu mosi olongokanga oma ma zingu kia esi nzo wakendalala, yandi vo: “O unu kiaki, dizayakene kw’awonso dia sia vo ekanda dilenda vunzuka.”

Ekuma e mpasi zozo zibwilanga kwa makand’e? Aweyi tulenda vwil’e kiese mu zingu kia nzo?

Etuku Di’ekanda

Muna vutula e mvutu za ngyuvu zazi tufwete zaya etuku dia longo ye di’ekanda. Ovo vena y’Etuku ​—Mvangi ​— ozevo esi nzo bafwete kwenda kwa yandi muna baka luludiku, ekuma vo yandi otomene zaya e mpila tulenda mwen’e kiese kia yingi muna zingu kia nzo.

Ayingi bekwikilanga vo ekanda ke diakala y’Etuku ko. The encyclopedia Americana, mu kingelezo, yivovanga vo: “Wantu akaka alongoka bebadikanga vo o longo lwayantikila muna ngyikani a muntu yo bulu.” Kansi tu Yesu Kristu  wavova edi dia nsemwa a yakala yo nkento. Watangisa esono ya Nkand’a Nzambi yandi vo: “Kina kiayikakeswa kwa Nzambi, o muntu kavambanisa ko.”​—Matai 19:4-6.

Dianu vo, Yesu Kristu wavov’e ludi. Nzambi a ngangu wavanga wantu antete ye wakubika vo e zingu kia nzo au kiakala kia kiese. Nzambi wasompanisa yakala diantete yo nkento antete ye wavova vo o yakala “katatidila nkaz’andi: bekala nitu mosi.” (Etuku 2:22-24) Nga esina kia mpasi zazi kilenda kala vo mu kuma kia lembi tumama mana kasikidis’o Mvangi muna Diambu diandi, o Nkand’a Nzambi?

 Nkia Nzila Yina ye Ndandu?

Nze una ozeye kondwa lukatikisu, elumbu yayi e nza izele y’eketo yo kuyivaka. “Eloko ke diambi kwani ko,” ikavova nkono mosi kuna kw’alongoki kuna Estados Unidos. “O muntu olenda kala nkw’eloko, yo toma kala kwandi kiambote.” Kansi kadi olakama mavwa ma nza yituku dia mpasi, ekuma vo zifwasanga e zingu kia esi nzo kadi mekondesanga e ngwawani vana kati kwa wantu yo kotesa e kitantu yo fwasa e nzimbu zau. Muna diadi, tal’e ngana zole za mu Nkand’a Nzambi zikutusonganga edi disundidi o mfunu muna kala ye kiese.

“Elonga dia makaya dina yo zola, diwete, ke mu ngombe amazi yo lumengo ko.”

“Wete e sele kiayuma kina yo luvuvamu, ke mu nzo yazala ye mbizi ye ntantani ko.”

Ngana 15:17; 17:1.

Dina ye nsasa, ke wau ko? Yindula kana aweyi yadi kala e nza kala vo mase, ngudi yo wana balanda e tuludiku twatu! O Nkand’a Nzambi mpe uvananga o tuludiku twamfunu muna mpila o mase, ngudi yo wana bafwete zingila. Badika kaka o twaka.

Akala: “Bafwete zol’akazi au, nze to ya yau kibeni.”​—Efeso 5:28-30.”

Nga diakete kansi dia mfunu kibeni! Nkand’a Nzambi mpe utumanga o yakala ‘kazitisang’okento.’ (1 Petelo 3:7) Ovangila wo muna kuntamb’o matu, yo kala ye umbakuzi, yo nkunsong’e nzol’andi. Tondanga mpe e ngindu za nkento yo kunwila. (Tezanisa ye Etuku 21:12) Nga kukwikidi ko vo esi nzo betambulanga nluta miambote vo yakala otoma tatanga o nkento, nze una kezolanga yandi kibeni bamvangila?​—Matai 7:12.

 Akento: ‘Nuvumina akazi eno.’​—Efeso 5:33.

O nkento otwasanga e kiese muna zingu kia nzo vava kesadisanga o nkaz’andi muna lungisa e mbebe andi. E diadi i diakanwa, kadi o Nzambi wavanga nkento mu kuma ki’eyakala se “nsadisi wa nkw’andi.” (Etuku 2:18) Ozeye e nsambu zikalanga muna nzo ovo nkento ovuminang’o yakala, yo kunsadisa muna baka e nzengo yo sala entwadi yo yandi mu kuma kia wete dia nzo’au?

Akazi: “O longo, mbula luazitiswa kw’awonso, e mfulu mpe mbula yakondwa nsafu.”​—Ayibere 13:4.

Ovo bavangidi wo, o yakala yo nkento betoma kalanga enkal’a mbote. E zumba ilutidi mwanganisa nzo. (Ngana 6:27-29, 32) Nkand’a Nzambi uvovanga mu zayi wawonso vo: “Wamona kiese muna nkaz’a toko kiaku . . . Nkia kum’ofilakeselwa kwa nkento anzenza?”​—Ngana 5:18-20.

Mase: ‘Nutongonwena wan’eno muna nzila bekwenda.’​—Ngana 22:6.

Amase avo bavwidi e ntangwa muna mokena yo wila wana, ekieleka e nzo zau zikala ye kiese kikilu. Iwau, o Nkand’a Nzambi usiamisanga mase balongang’o wana e longi dia sikila ‘ovo wafonga muna nzo, yovo se kiya, yovo leka yovo sikama.’ (Nsiku 11:19) Nkand’a Nzambi uvovele mpe vo amase bafwete songa vo bezolang’o wana, muna kubalonganga.​—Efeso 6:4.

Wana: “Wana, nulemvokela mase meno ye ngudi zeno muna Mfumu.”​—Efeso 6:1.

Dia ludi vo omu nza yayi ya ungalu yo umpumbulu dia mpasi kikilu muna zitisa o mase. Kansi ke dia ngangu ko muna wila owu ke kutuvovesanga Etuku di’ekanda? Yandi otomene zaya edi dia mfunu kimana ezingu ki’esi nzo kiakala ye kiese. Muna diadi, si’engolo muna lemvokela se yo ngudi.  Si’etima muna tina o umpukumuni wa nza muna vanga e mbi.​—Ngana 1:10-19.

Ezingu kia esi nzo kikala yo nluta kele vo beland’elongi dia Nkand’a Nzambi muna zingu kiau. Ke mu tandu kiaki kaka ko bekala ye kiese, kansi bekala mpe ye vuvu kia kusentu muna nz’ampa ina kasil’o nsilu o Nzambi. (2 Petelo 3:13; Lusengomono 21:3, 4) Ozevo kala ye fu kia longoka o Nkand’a Nzambi kumosi y’esi nzo aku! Mazunda ma wantu mu nza yawonso bamwene o mfunu a tuludiku ye fwaniswa yina muna finkanda fin’enkumbu vo Zinga ye Kiese ova Ntoto Yakwele Mvu!