KIUVU 3
Adieyi Ndenda Vanga mu Mokena ye Mase Mame?
ADIEYI WADI VANGA ONGEYE?
Yindula nona eki: Kina Kiatatu muna fuku, Lukombo una ye kimbuta kia mvu 17 omanisi e salu kiandi. Owau ozolele vunda fiakete. Ovuende vana kunda yo ziula e televizau.
Vana vau, Se diandi okotele muna nzo kuna makasi.
“E Lukombo! Ekuma ofwasilanga e ntangwa vana televizau vana fulu kia sadisa mbunzi aku muna salu kaveno kuna sikola? Ngeye kuzolanga tumama ko.”
Lukombo ovovele kuna malembe vo: “Oyantikidi diaka.”
O Se ofinamene yo vova vo: “Nge, adieyi ovovele?
Lukombo uvutwidi vo: “Kivovele diambu ko.”
O Se ofungidi kikilu makasi. Ovovele vo: “Kufwete kumpoveselanga mu mpila yayi ko.”
Kele vo ngeye i Lukombo, adieyi wadi vanga muna venga e ntantani yo se diaku?
TOMA YINDULA!
O mokena ye mase dina nze ngeye odiatisanga kalu. Avo omwene nkaku muna nzila, olenda soba nzila yankaka.
NONA:
Dumbelele kimosi una ye nkumbu a Makiadi, wavova vo: “Diampasi dikalanga kwa mono mu mokena yo se diame. Ezak’e ntangwa, avo ngiatikidi mokena yandi, okumpovesanga vo: ‘Undoloka, mono ovovesanga?’”
MAKIADI MAMBU TATU KALENDA VANGA.
-
Kazila se diandi.
Makiadi okazidi vo: “Unsia e sungididi. Diambu diamfunu nzolele kuzayisa!”
-
Yambula mokena yo se diandi.
Makiadi kazolele diaka zayisa se diandi ko e diambu dikuntokanesanga.
-
Vingila ntangwa yambote mu mokena yandi.
Makiadi omokene yo se diandi yovo kunsonekena nkanda mu kunzayisa e diambu dikuntokanesanga.
Nkia diambu olenda zayisa kwa Makiadi kafwete vanga?
BADIKA E DIAMBU EDI: Se dia Makiadi ofwidi e diya, kena bakula ko e diambu ditokanesanga Makiadi. Avo Makiadi osolele e nzengo za 1, o se diandi ke bakula ko ekuma kekunkazilanga. E diambu diadi nanga ke disadisa se diandi ko mu sia sungididi muna mvovo miandi. Disonga vo se diandi kakondelo luzitu. (Efeso 6:2) O vanga wo ke ditwasa nluta ko.
Nze una muntu kesobelanga nzila yankaka avo omwene nkaku muna nzila, muna kala ye ngwizani ambote yo mase maku, ongeye mpe olenda soba ndekwa zankaka mu mokena yau
Kana una vo e nzengo za 2 zilenda monekena nze i zambote, kansi, ke zisingika mambu ko. Ekuma? Kadi Makiadi lusadisu lwa se diandi kavuidi o mfunu muna sunda e diambu kenwananga diau. Muna kunsadisa, entete o se kafwete zaya dina dikuntokanesanga. O kala wabutama, ke dikunsadisa ko.
Kansi, avo osolele e nzengo za 3, Makiadi keyambula ko vo e nkaku muna nzila wansimba. Muna kuma kiaki, ovingidi ntangwa yambote mu vovela diambu dikuntokanesanga. Vana ntandu, avo Makiadi obakidi e nzengo za sonekena se diandi nkanda, nanga o ntim’andi ulenda vuvama vana vau.
O soneka o nkanda dilenda mpe kunsadisa mu toma songa e ngindu zandi. Vava se dia Makiadi ketanga o nkanda, ozaya dina kazolelenge kunzayisa. Ediadi dikunsadisa mu bakula diambu ditokanesanga mwan’andi. E nzengo za 3 i nzengo zambote kwa Makiadi yo se diandi. Kiakala vo omokene yandi yovo unsonekene nkanda, o vanga wo ngwizani dina yo luludiku lwa Nkand’a Nzambi luvovanga vo: “Yambula twatatidila mambu metwasanga luvuvamu.”—Roma 14:19.
Nkia nzengo zankaka Makiadi kalenda baka?
Yindula imosi muna nzengo kalenda baka. Soneka yo ova yandi kumosi ye mfwilu yovo nluta dilenda twasa.
VENGA E MVOVO MINA MASE MAKU KE BEBAKULA KO
Sungamena vo ezak’e ntangwa olenda vova diambu dina mase maku ke bebakula ko.
KASIKIL’OWU:
Mase maku bayuvuidi vo ekuma kwinina wayanza ko. Ongeye ovutwidi vo: “Kizolele vovela diambu diadi ko.”
Kansi, mase maku owu bebakulwila e mvovo miaku: “Kikunubundanga e vuvu ko, kilendi kunuzayisa mambu mame ko. Mbote yazayisa dio kwa akundi ame, ke kwa yeno ko.”
Yindula vo diambu diampasi onwananga diau, mase maku bayuvuidi kana vo balenda kusadisa. Kansi ovovele vo: “Ke nutokani ko, nzeye dina ivanga.”
-
Adieyi mase maku balenda yindula?
-
Nkia mvutu zambote olenda vana kwa mase maku?
Nanga Oyangalela Mpe Malongi Mama
WHAT YOUR PEERS SAY
Aweyi Ndenda Mokenenanga yo Mase Mame?
Olenda vua nluta miayingi mina kusidi yindula nkutu ko.
VIDEO YA MUNTU OVANGANGA FWANISWA
Aweyi Ndenda Mokenena yo Mase Mame?
Aweyi olenda mokenena yo mase maku avo kuna ye luzolo lwa mokena ko?
