Yindula diambu edi: Se vioka miniti kumi tuka Karen kalwakidi vana nkinzi. I bosi, owidi nding’a muntu katomene zaya.

Karen ovilwidi o ntu, omwene nkundi andi Jessica osimbidi ntutu miole mia malavu ma nkolwa miaziuka. Jessica ovene ntutu mosi kwa Karen yo kumvovesa vo: “Ku mwan’akete diaka ko. Nua fiakete.”

Karen kazolele ko, kansi Jessica nkundi andi. Karen kazolele ko vo nkundi andi kayindula vo ke nkundi ambote ko. Vana ntandu, Jessica mwan’ambote. Avo yandi nkutu mu nua kena malavu, nanga ke diambi kwandi ko. Karen ovovele muna nsi a ntima vo: ‘Malavu makete kwandi, ke diau dimosi ko yo nua mfomo zangolo.’

Kele vo ngeye i Karen, adieyi wadi vanga?

Muna baka nzengo zambote mu diambu dia mpila yayi, ofwete toma zaya kiwuntu kiaku. O zaya kiwuntu kiaku disongele vo zaya mana okwikilanga ye nsiku mina olandanga. Ediadi dikusadisa mu zaya dina ovanga vana fulu kia yambula vo akaka bazayisanga dina ofwete vanga.—1 Korinto 9:26, 27.

Adieyi dilenda kusadisa mu kala yo umbakuzi wau? O vana e mvutu za yuvu ilende dilenda kusadisa.

O zaya e ngangu zaku ye fu yambote una yau dilenda kuvana nkuma wa zizidila ntonta.

NONA KIA NKAND’A NZAMBI: Paulu wa ntumwa wasoneka vo: “Kanele vo ki mpovi ambote ko, kansi kikondelo zayi ko.” (2 Korinto 11:6) Wau vo wakala yo zayi wayingi wa Nkand’a Nzambi, Paulu wasikila ye kwikizi vava akaka bamvezanga. Kayambula ko vo e mvovo miau mia luvezo mianyoyesa.—2 Korinto 10:10; 11:5.

UYIFIMPA: Soneka ova yanda diambu dimosi ozeye toma vanga yovo fu kiambote una kiau.

Yika kimosi muna fu yambote una yau. (Kasikil’owu, nga ozolanga wantu? Nga ozolanga kayila akaka? Nga obundwanga e vuvu kwa akaka? Nga ozitisanga e ntangwa?)

Lutovoko lulenda tezaneswa ye mbumbu isayananga yo fwasa lekwa kiawonso. Avo oyambwidi vo lutovoko lwayala zingu kiaku, kiwuntu kiaku kilenda fwasakana mu nzaki zawonso.

NONA KIA NKAND’A NZAMBI: Paulu wazayanga lutovoko lwandi. Wasoneka vo: “Ngiangalele kikilu o nsiku a Nzambi muna kiwuntu kiame kiakati, kansi mbwene nsiku wankaka muna nitu ame, unwanisanga nsiku una muna nyindu ame yo kumfila muna ubundu wa nsiku a sumu.”—Roma 7:22, 23.

UYIFIMPA: Nkia lutovoko ofwete sila ngolo za sunda?

Nga olenda kota mu kalu yo zayisa ndiona odiatisanga dio vo kazunganesanga e kalu va fulu kimosi yavana mazuti mefokoka? Ediadi dia uzowa kikilu kadi nzimbu zankatu kefwasa.

Adieyi olenda longoka? O kala ye makani dikusadisa mu kala ye zingu kiasikila yo lembi zunganesa zingu kiaku va fulu kimosi. Dikusadisa mu zaya e fulu ozolele kwenda ye una olenda ko lwakila.

NONA KIA NKAND’A NZAMBI: Paulu wasoneka vo: “Kilundumukanga nkatu-nkatu ko.” (1 Korinto 9:26) Paulu kazinganga moko ko yo vingila vo mambu mavangamena kuna kinsalukisa, Paulu wayisila makani yo vanga mawonso mu lungisa makani mandi.—Filipi 3:12-14.

UYIFIMPA: Soneka ova yanda makani matatu ozolele lungisa mu kolo kia mvu mosi.

Ndiona kezolanga baka nzengo ko, okitukanga nkwa nyindu miole. Nze lungwenia, olenda yantika soba mu vava kuyifwanisa ye akundi andi. Kiaki i sinsu kisonganga vo kena ye kiwuntu kia yandi kibeni ko.

Kansi, avo otatididi nzengo zaku, kusoba kiwuntu kiaku kisobi-kisobi ko, kiakala nkutu nkia mambu akaka bevanganga.

NONA KIA NKAND’A NZAMBI: Vava kakala kindende, Daniele wa ngunza ‘wasia dio muna ntima’ edi dia lemvokela nsiku mia Nzambi, kana una vo kazinganga vamosi ko ye mase mandi. (Daniele 1:8) Daniele kakala nkwa soba-soba ko. Wazingilanga e ngwizani ye nzengo zandi.

UYIFIMPA: Ameyi okwikilanga? Muna bonga e nona: Nga okwikilanga muna Nzambi? Ekuma? Adieyi dikukwikidisanga vo Nzambi una kieleka?

Nga okwikilanga vo e nsiku kasikidisa o Nzambi i muna wete diaku? Avo elo, ekuma?

Aweyi ozolele kala? Nga lukaya lwayuma lusotokanga vana ntoto kana nkutu mu fitembwa yovo nze nti watoma kumama ke ubwanga ko kana nkutu mu tembwa kiangolo? Avo otatididi nzengo zaku, okala nze nti wau. Ediadi dikusadisa mu vana e mvutu za kiuvu kiaki: Mono i Nani?