Kapu Kia 1

E Zingu Kiaku kia Kusentu Kilenda Kala kia Nsambu!

1, 2. O Mvangi adieyi kazolele mu kuma kiaku?

 MBIMBAKANA ya ngemba ya ndion’ozolanga. Tusevo twa kiese vava odianga kumosi y’akundi anzolwa. E kiese kia monang’o wan’aku vava besakananga. O mambu nze i mama i metwasang’e kiese muna zingu. Kansi kuna kwa ulolo wa wantu, e zingu kiazala ye mpasi zayingi. Avo e zingu kiaku i wau kina, yangalala!

² I luzolo lwa Nzambi vo wavwa e nsambu zakwele mvu muna zingu kiambote. Eyayi ke ndozi ankatu ko, kadi o Nzambi okuvana e nsabi muna vwa e nsambu za kiese kia kusentu. E nsabi yayi i zayi.

3. Nkia zayi una vo i nsabi za kiese, ekuma tufwete kadila ye ziku vo o Nzambi olenda kutuvana o zayi wau?

³ O zayi wau tuyikanga, i zayi usundidi e ngangu za muntu. I “zayi wa Nzambi.” (Ngana 2:5, Tradução do Novo Mundo) Se vioka 2.000 ma mvu, nsoneki mosi wa Nkand’a Nzambi wavova vo: “Konso nzo kwa muntu yatungwa; kansi ndiona watung’e lekwa yawonso i Nzambi.” (Ayibere 3:4) Se badiki e mpila ngangu kena zau o Mvangi a lekwa yawonso! O Nkand’a Nzambi uvovele vo o Nzambi otanganga yo van’e nkumbu za ntetembwa zawonso. Nkia mpila ngangu z’esivi, wau vebadikwanga vo vena ye nkama za mazunda ma ntetembwa zizungidi e kalu kieto,  alongoki antetembwa, edi bevovanga vo vena ye zaka nkama za buka ya mazunda ma ntetembwa! (Nkunga 147:4) O Nzambi ozeye mpe mawonso mu kuma kieto, ozevo nga nani diaka ovo ke yandi kaka ko olenda vana e mvutu za sikila za yuvu ya mfunu ya zingu?—Matai 10:30.

4. Ekuma tulenda bundil’evuvu vo o Nzambi ofwana vana malongi muna kutufila, ye nkia nkanda uvanganga wo?

⁴ Yindula vo wantu wole betezanga vangulula makalu mau. Omosi wau kalendele vangulula ko, oyambwidi e sadilwa, ovwenene kwandi. Nkansi o nkw’an,di okwamanene kak’o vangulul’e diandi mu malembe malembe yavana kalendele dio singika, otezele kwika (motor) osevele wau kamwene vo dikweme yo sala e nsal’ambote. Ke diampasi ko mu zaya ekana nani mu yau ewole wakala yo nkanda a tuludiku twa mvangi a makalu. Nga ke dialudi ko vo o Nzambi ofwana vana malongi mana malenda fila e zingu kieto? Nanga ozeye wo vo o Nkand’a Nzambi utoma kuyisonganga vo wau kikilu—i nkanda wa malongi ye tuludiku twa Mvangi eto, wasonekwa muna samuna o zayi wa Nzambi.—2 Timoteo 3:16.

5. Nkia mfunu una o zayi wina omu Nkand’a Nzambi?

⁵ Ovo ediadi divovang’o Nkand’a Nzambi dia kieleka, se badiki e mpila zayi una muna nkanda wau! Muna Ngana 2:1-5, tuvoveswanga twatomba e ngangu, yo satululanga tusalu twaswekama—kansi ke mu ntoto a ngindu za wantu ko, muna Diambu dia Nzambi kaka. Ovo tutombela wo mwamuna, ‘tusolol’o zayi wa Nzambi.’ Wau vo o Nzambi ozeye etezo kieto y’ezolela yeto, okutuvananga malongi malenda kutusadisa mu kala ye zingu kia luvuvamu ye kiese. (Nkunga 103:14; Yesaya 48:17) O zayi wa Nzambi ukutuzayisanga mpe e nsangu zambote z’esivi.

MOYO A MVU YAMVU!

6. Nkia lusikidisu kavov’o Yesu Kristu mu kuma kia zayi wa Nzambi?

⁶ O Yesu Kristu wa muntu otomene zayakana muna lusansu,  wavova mu kuma kia zayi wau wa Nzambi oku vo: “I wau wuwu o moyo a mvu ya mvu, bazaya ngeye vo i Nzambi aludi, yo Yesu Kristu mpe ona watuma.” (Yoane 17:3) Se badiki—zayi ufilanga ku moyo a mvu ya mvu!

7. Nkia ziku kisonganga vo o Nzambi katuvanga ko vo twafwanga?

⁷ Kuvezi ko e diambu diadi dia moyo a mvu ya mvu mu badika vo ndozi ankatu. Kansi, badika owu wavangilwa e nitu a muntu. Yakubikwa e nkubikw’esivi, kimana vo ya yangalala, ya wa, yo wang’e nsunga, ya mona, yo simba e lekwa. E mbidi a lekwa ina ova Nza ikutuyangidikanga—madia mambote, e ngimbila za nuni, mvuma za nsunga, nzanza miambote, kikundi kia luyangalalu! O tomfo tweto tw’esivi, tusundidi e (supercomputador), kadi tukutusadisanga muna vwa yo yangalala mu mawonso mama. Nga Mvangi eto ozola wo vo twafwa yo vidisa mama mawonso? Nga ke wau ko vo edi kazolele twazinga ye kiese yakwele mvu? Ozevo, o wau i zayi wa Nzambi muna kuma kiaku!

ZINGU MUNA PARADISO

8. O Nkand’a Nzambi adieyi uvovanga mu kuma kia zingu kia wantu kia kusentu?

⁸ Oma kevovanga o Nkand’a Nzambi mu kuma kia Ntoto yo wantu oku sentu malenda yikwa muna mvovo mosi kaka​—⁠Paradiso! O Yesu Kristu wayika dio vava kavovesa muntu mosi una se kefwanga: “Okala yame muna Paradiso.” (Luka 23:43) Kieleka vo o mvovo wau Paradiso wayindulwisa o muntu ndiona e mpila zingu kia kiese kiakala yo mase meto mantete, Adami yo Eva. Alunga bakala vava bavangwa kwa Mvangi yo zingilanga muna mpatu ina yakubikwa yo vatwa kwa Mvangi. Yafwana yikilwa vo mpatu a Edene, kadi mawete i nsas’a nkumbu yayi.

9. Aweyi kiakala e zingu muna Paradiso antete?

⁹ Nkia mpila wete yakala e mpatu yayina! Paradiso a kieleka yakala. Muna nti miandi miawonso, vakala ye nti miayimanga e bundu yambote. Ekolo bakalanga muna  mawete mamana, o Adami yo Eva banuang’o maza mambote yo velang’e bundu ya nti, ke bakala ye konso diambu dina batelamena ntima ko, ngatu vo kala yo wonga. E bulu mpe ke yabavumisanga ko, kadi Nzambi wavana kwa yakala yo nkento andi e salu kia kubayala e ngyal’a nsongi. Ye mpe, o yakala yo nkento antete bakala yo vimpi wafwana. Ekolo badi lemvokela Nzambi, zingu kia kiese kiakwele mvu badi vwa. Bavewa e salu kia kiese kia lunga-lunga e paradiso au y’esivi. O Nzambi wavana mpe nkanikinu kwa Adami yo Eva vo ‘balungila nza, yo kulula yo.’ Oyau ye mbongo au badi yandangesa e Paradiso yavana e nza yawonso yadi kituka se fulu kiawete ye kiese.—Etuku 1:28.

10. Vava kayika e Paradiso, adieyi kazola vova o Yesu?

¹⁰ O Yesu vava kayika Paradiso, kazola vova ko vo o muntu ndiona wa mbangami kayindula ina yankulu. Ve, yaku sentu kayikang’o Yesu! Wazaya wo vo kalu kieto kiawonso kikituka se paradiso ova ntoto. O Nzambi i kelungisila wuwu ekani diandi diantete mu kuma kia wantu yo Ntoto. (Yesaya 55:10, 11) Elo, e Paradiso ivutulwiswa! Nkia mpila zingu kikala e? Yambula o Nkand’a Nzambi una vo i Diambu diandi, wavan’e mvutu.

ZINGU MUNA PARADISO IVUTULWISWA

11. Muna Paradiso ivutulwiswa, adieyi divangama kwa mayela yo ununu yo lufwa?

¹¹ O mayela, yo ununu yo lufwa ke lukala diaka ko. “O meso ma mpofo metemoka, o matu m’afwa matu mekakuka. o nkw’evola olemoka nze mvudi, o lubini lu’ebaba luyimbila.” (Yesaya 35:5, 6) “Nzambi yandi kibeni okala [yo wantu], kakunguna mansanga mawonso muna meso mau; o lufwa, ke lukala diaka ko; musungula kala diaka dilu, yovo kazu, ngatu mpasi: oma mantete maviokele.”—Lusengomono 21:3, 4.

12. Ekuma tulenda kadila ye ziku vo ke vekala nsoki ko, ngatu umpumbulu yovo mambi muna Paradiso ya kusentu?

¹² O nsoki, yo umpumbulu ye mambi mefokoka yakwele  mvu. “Amimpanga-mayi kendonwa bekendonwa . . . Finkolo-kolo kaka, e kimpumbulu, ladi . . . Nkatu kwandi. Alembami bevwa nza.” (Nkunga 37:9-11) “Yimpumbulu ikendonwa muna nsi, Akwa maleko, vuzuka.”—Ngana 2:22.

13. O Nzambi aweyi ketwasil’o luvuvamu?

¹³ Vekala yo luvuvamu muna Nz’amvimba. “[Nzambi] osima vita yakuna nsuk’a nza; Ta ketolola yo butuna dionga.” (Nkunga 46:9) “O nsongi osakumuka; Yo ulolo wa luvuvamu yavana kilala ngonde.”—Nkunga 72:7.

14, 15. Aweyi uvovole o Nkand’a Nzambi mu kuma kia nzo, ye salu yo madia muna Paradiso ivutulwiswa?

¹⁴ Vekala ye nzo zasikila ye salu kia kiese. “Betunga nzo yo kala mo . . . Ke betunga ko, wakaka kakala mo; ke bekuna ko wakaka kadia; nze lumbu ya nti ikala lumbu ya nkangu ame, ana nsolele bekwaminin’o mona wete wa salu ya moko mau. Ke befuntuka nkatu ko, ngatu wutila kuna mbubu.”—Yesaya 65:21-23.

¹⁵ Vekala yo madia mayingi mambote. “O ulolo wa masa ukala muna nsi, yakuna ntandu a miongo.” (Nkunga 72:16) “O ntoto uyimini mbongo andi: O Nzambi, wa Nzambi eto okutusambula.”—Nkunga 67:6.

16. Ekuma kikadila kia kiese e zingu muna Paradiso?

¹⁶ O moyo a mvu ya mvu muna Nza a paradiso wa kiese ukala. “Asongi bevwa nza, Besikila vo yakwele mvu.” (Nkunga 37:29) “Ekanga ye nsi a kaya iyangalala, o nzanz’angidinginza umon’e kiese yo savuka, nze nasisi.”—Yesaya 35:1.

O ZAYI YE ZINGU KIAKU KIA KUSENTU

17. (a) Adieyi ofwete vanga kele vo ozolele vwa e zingu kikala muna Paradiso? (b) Aweyi tuzayidi vo o Nzambi nsobani zampwena kevang’ova Nza?

¹⁷ Ovo zolele vwa e zingu kiaki kia mu Paradiso, kuyambula konso diambu ko dia sima ovwa o zayi wa Nzambi. Yandi ozolang’o wantu, osinga soba mawonso mena o mfunu kimana e Nza yakituka se paradiso. Ongeye kele  vo wakala ye wisa kia manisa o usukami, yo kondwa kwa ndungidi kuzele ova nza, nga kwadi wo vanga ko e? Nga ke wau ko tufwete vava kavanga o Nzambi? Kieleka, mu mvovo miatoma kiá o Nkand’a Nzambi utoma yikanga e ntangwa in’o Nzambi kefwasa e nza ya tandu kiaki kiambi yo sikidisa o luyalu luansongi. (Daniele 2:44) O Nkand’a Nzambi ke ukutuzayisanga kaka mambu mama ko. Ukutusongelanga mpe owu tulenda kotela yo moyo muna nz’ampa eyi yasilw’o nsilu kwa Nzambi.—2 Petelo 3:13; 1 Yoane 2:17.

18. O zayi wa Nzambi adieyi ulenda vanga mu kuma kiaku owau?

¹⁸ O zayi wa Nzambi ulenda mpe kusadisa owau. E yuvu ina isundidi o bala itokanesang’o wantu o Nkand’a Nzambi ovaninanga yo e mvutu. Ovo otondele o tuludiku twandi dikusadisa mu kal’e kikundi yo Nzambi. Nkia mpil’elau! Ediadi dikusadisa muna vwa o luvuvamu luna vo Nzambi kaka olenda lo vana. (Roma 15:13, 33) Muna vav’o vwa o zayi wau wa moyo, isongela vo obantikidi simb’e nzila isundidi o mfunu ina ye ndandu muna zingu kiaku. Kukendalela dio ko e ntomb’otomba o zayi wa Nzambi ufilanga ku moyo a mvu ya mvu.

19. Nkia kiuvu tumokena muna kapu kilanda?

¹⁹ Tuyikidingi o Nkand’a Nzambi vo i nkanda una yo zayi wa Nzambi. Kansi aweyi tuzayidi wo vo ke nkanda a ngangu za muntu ko, kansi wa zayi una vo usundidi? E kiuvu kiaki tumokena kio muna kapu kilanda.

FIMPA O ZAYI WAKU

O zayi mu kuma kia Nzambi nkia kuma ulenda kutufidila ku kiese kiakwele mvu?

Aweyi kikala e zingu muna Paradiso ikwiza ova ntoto?

Ekuma olenda kadila ye ndandu owau kele vo ovwidi o zayi wa Nzambi?

[Yuvu ja longokela]