Zingu muna Nz’ampa ya Luvuvamu

Kele vo badikidi e mpwa ina mu finkanda-nkanda fiafi, nkia nsatu ivene? Luvuvamu, ekiese, yo mawete omwene mu finkanda-nkanda fiafi ke mau mezolanga ntim’aku ko e? Kieleka vo i wau. Kansi, nga ndozi kwani yovo luvunu muna kwikila vo e zingu kiaki kisinga kala ova ntoto?

Ndong’ampwena ya wantu nanga iwau bebadikanga. E kieleka kia unu i vita, umpumbulu, nzala, mayela, nunuva​—muna yika kaka makete. Kansi kadi, vena ye kuma mu lenda bund’evuvu. Mu kuma kia kusentu, Nkand’a Nzambi uvovanga vo “mun’owu wa nsilu andi, [Nzambi] tusiang’e vuvu ki’ezulu diampa ye nz’ampa, ina ikalwanga kwa ndungidi.”​—2 Petelo 3:13; Yesaya 65:17.

Ediodio ‘zulu dia mpa’ ye “nz’ampa,” divovanga Nkand’a Nzambi, ke zulu diadi dia nitu ko yovo nz’ampa a ntoto tuzingilanga. O ntoto ye zulu dia nitu yavangwa yalunga, o Nkand’a Nzambi usonganga vo izinga yakwele mvu. (Nkunga 89:36, 37; 104:5) E “nz’ampa” kintwadi kia wantu ansongi bezingil’ova ntoto, e ‘zulu diampa’ kintinu, yovo luyalu, lu’ezulu lua nsongi, lusinga yala e kintwadi kiokio kia wantu ova ntoto. Kansi, nga diafwana kwikila vo “nz’ampa,” yovo ntoto wa mpa wambote ulendakana o kal’e?

Zaya wo vo, e tezo kiaki kiakala muna lukanu luantete lua Nzambi mu kuma kia ntoto. Wasia yakala yo nkento antete muna Paradiso va ntoto muna Edene, wabavana salu ki’esivi: “Nuwutana, nuwokela, nulungila  nza, nukulula yo.” (Etuku 1:28) Elo, Nzambi wazola vo bawuta wana yo yandanisa e Paradiso au mu nsi yawonso. Kanele vo bayisolela kolama Nzambi, yo kusonga vo kabafwana zinga yakwele mvu ko, ekani diantete dia Nzambi ke diasoba ko. Difwete lunganiswa muna nz’ampa!—Yesaya 55:11.

Dia kieleka, vava osambanga e S’eto, yo lomba vo e Kintinu kia Nzambi kiza, olombanga vo o luyalu lolo lu’ezulu luavevola o ntoto muna mbi yo yala e nza yoyo yampa. (Matai 6:9, 10) Ye tulenda kweto bund’evuvu vo Nzambi osinga vana mputwilu za sambu kiokio, kadi e Diambu diandi disianga nsilu: “Asongi bevwa nza, Besikila vo yakwele mvu.”​—Nkunga 37:29.

Zingu Muna Nz’ampa ya Nzambi

E Kintinu kia Nzambi kitwasa mawete malembi tezaniswa ova nza, muna lungisa mambu mawonso mambote mana kateka kana o Nzambi vo i mafwete mona nkangu andi ova ntoto. O lumengo ye nswangani ke lukala diaka ko, kuna mfoko awonso ova ntoto bekala s’akundi akieleka yau yo yau. O nsilu a Nkand’a Nzambi, vo “osima vita yakuna nsuk’a nza.” “Zula ke kizangwila zula nsosolo ko, ke belongwa diaka nwana ko.”​—Nkunga 46:9; Yesaya 2:4.

Kuna mfoko o ntoto wawonso ukala ye mpwa nga mpatu. O Nkand’a Nzambi uvovele vo: “Ekanga ye nsi a kaya iyangalala, o nzanz’angidinginza umon’e kiese yo savuka nze nasisi. . . . kadi van’ekanga vefusuk’o maza, ye nkoko vana nzanz’angidinginza. Esenge diansemi dikituka se zinga, o ntoto akaya se nto za maza.”​—Yesaya 35:1, 6, 7.

Mawonso mekala mo memwesa ekiese ova nza a Paradiso. Wantu ke befwa diaka nzala ko mu kuma  kia kondwa madia. “O ntoto uyimini mbongo andi,” ukavovele Nkand’a Nzambi. (Nkunga 67:6; 72:16) Awonso bemona o nsendo a salu kiau, una kasila nsilu o Mvangi eto: “Bekuna mpatu za vinyo, yo dia bundu yau. . . . ke bekuna ko wakaka kadia.”​—Yesaya 65:21, 22.

Muna nz’ampa ya Nzambi, o wantu kebezingila diaka mu nzo za ndandanda zamfinangani ko ngatu mu fobolo ya nzo, kadi Nzambi wasia nsilu vo: “Betunga nzo yo kala mo. . . . Ke betunga ko, wakaka kakala mo.” Nkand’a Nzambi usianga mpe nsilu: “Ke befuntuka nkatu ko.” (Yesaya 65:21-23) I sia vo, o wantu besadila kuna kiese yo tambula sendo a salu kiau. E zingu ke kikala diaka kiambi ko.

I bosi, e Kintinu kia Nzambi kisinga vutula luvuvamu lwakala muna mpatu Edene kuna kua bulu ye bulu, yo kuna kwa bulu yo wantu. Nkand’a Nzambi uvovele vo: “E dievwa dinangina yo mwan’ememe, e ngo ibubamena yo mwan’a nkombo; mwan’a ngombe yo mwan’a nkosi ye mbizi amazi ikala kumosi; e kingyanangyana kikubafila.”​—Yesaya 11:6-9; Osea 2:18.

Se badiki vo, muna nza ya Paradiso e yimbevo yawonso yo uvanguki mpe usasulwa! E Diambu dia Nzambi dituvene lusikidisu: “O ntungi kevova ko vo, Yela nyela.” (Yesaya 33:24) “[Nzambi] kakunguna mansanga mawonso muna meso mau; o lufwa, ke lukala diaka ko; musungula kala diaka dilu, yovo kazu, ngatu mpasi: oma mantete maviokele.”​—Lusengomono 21:4.

 Nkia Mpila Olenda kio Vwila

Kieleka ntim’aku ufwete zazana mu wa nsilu miami mia Nzambi mia zingu muna nz’andi ampa ya ndungidi. Kanele vo, akaka nanga se bayindula vo wete wa nsambu zazi se wingi muna lenda lungana, ke wingi ko kuna kwa Mvangi eto anzolwa.​—Nkunga 145:16; Mika 4:4.

Kansi tu, muna lenda zinga yakwele mvu mu Paradiso ova ntoto, vena ye mambu tufwete lungisa. Yesu wasonga edi difwene, vava kavova muna sambu kwa Nzambi: “I wau wuwu o moyo a mvu ya mvu, bazaya ngeye vo i Nzambi aludi, yo Yesu Kristu mpe ona watuma.”​—Yoane 17:3.

Ozevo, ovo tuzolele zingila muna nz’ampa ya Nzambi, tufwete teka longoka luzolo lwa Nzambi yo vanga lo. Kadi, diambu ludi: E yayi “nza vempoka ivempoka, y’eketo diandi: vo i ndion’ovangang’o luzolo lua Nzambi, zing’aka kezinganga yakwele mvu,” ka vwila e nsambu zipongolwa kua Mvangi eto anzolwa yakwele mvu.​—1 Yoane 2:17.