1, 2. Ekuma obadikilanga e sambu se lukau lwamfunu? Ekuma tufwete zayila dina Bibila kilonganga mu kuma kia sambu?

O NTOTO wakete kikilu avo utezaneso yo nsema wawonso. Vava Yave ketalanga ova ntoto, omwenanga wantu a zula yawonso nze tonsi dia maza muna katini. (Nkunga 115:15; Yesaya 40:15) Kana una vo twakete kikilu avo tutezaneso yo nsema wawonso, e sono kia Nkunga 145:18, 19 kivovanga vo: “Yave ofinamene awonso bekumbokelanga, awonso bekumbokelanga kuna ziku. Olungisanga e zolela ya awana bekumvuminanga; owánga kazu kiau yo kubavuluza.” Ekwe lau diampwena tuna diau! Yave wa Mpungu-ngolo, ozolele vo twamfinama ye una ye luzolo lwa wá e sambu yeto. Kieleka, e sambu lau diampwena kikilu. I lukau lwamfunu Yave kavana kwa konso muntu mu yeto.

² Kansi, Yave owá kaka e sambu yeto avo tusambidi kwa yandi muna mpila ina ketondanga. Aweyi tulenda wo vangila? Yambula twabadika dina Bibila kivovanga mu kuma kia sambu.

3. Ekuma ofwete sambilanga kwa Yave?

³ Yave ozolele vo wasambanga kwa yandi yovo mokena yandi. Aweyi tuzayidi wo? Tanga Filipi 4:6, 7. Yindula e mboka yayi yamfunu. O Mfumu a nsema otokananga mu kuma kiaku. Ozolele vo wanzayisa una omonanga ye mana mekutokanesanga.

4. O samba kwa Yave lumbu yawonso, aweyi dilenda kumikina kikundi kiaku yo yandi?

⁴ E sambu kikutusadisanga mu toma siamisa kikundi  kieto yo Yave. Vava akundi bemokenanga lumbu yawonso mu kuma kia mana beyindulanga, mana mekubatokanesanga ye una bemonanga, e kikundi kiau kikumamanga. I diau mpe divangamanga vava tusambanga kwa Yave. Muna Bibila, Yave okusonganga e ngindu zandi ye una kemonanga yo kuzayisa mana kevanga kuna sentu. Ngeye mpe olenda kunzayisa konso diambu dina muna ntim’aku muna sambanga kwa yandi lumbu yawonso. Avo ovangidi wo, kikundi kiaku yo Yave kikumama.—Yakobo 4:8.

5. Aweyi tuzayidi wo vo Yave ke wanga sambu ya wantu awonso ko?

⁵ Nga Yave owanga e sambu ya wantu awonso? Ve. Muna lumbu ya Yesaya wa ngunza, Yave wavovesa Aneyisaele vo: “Kana una vo nuvanganga e sambu yayingi, kiwanga yo kwame ko; o moko meno mazele yo menga.” (Yesaya 1:15) Oyeto mpe avo katuyikebele ko, tulenda vanga mambu malenda kutuvambula yo Yave yo kumfila mu lembi wá e sambu yeto.

6. Ekuma lukwikilu lwinina o mfunu? Aweyi olenda songela vo lukwikilu una lwau?

 ⁶ Avo tuzolele vo Yave kawá sambu yeto, tufwete kala yo lukwikilu muna yandi. (Maku 11:24) Paulu wa ntumwa wasasila vo: “Kondwa kwa lukwikilu ke dilendakana ko mu toma yangidika Nzambi, kadi konso ndiona ofinama Nzambi kafwete kwikila vo una kieleka, yandi i nsendi a awana bekumvavanga ye ziku kiawonso.” (Ayibere 11:6) Mayingi mevavuanga muna kala yo lukwikilu lwakieleka, ke vova kaka ko vo tuna ye lukwikilu. Tufwete songanga lukwikilu muna lemvokelanga Yave lumbu yawonso.—Tanga Yakobo 2:26.

7. (a) Ekuma tufwete songelanga lulembamu yo luzitu vava tusambanga kwa Yave? (b) Aweyi tulenda songela vo tu akwa ziku vava tusambanga?

⁷ Tufwete songanga lulembamu yo luzitu vava tusambanga kwa Yave. Ekuma? Avo tuzolele mokena yo ntinu yovo nyadi a nsi, tuvanga wo kuna luzitu lwawonso. Yave yandi i Nzambi wa Mpungu-ngolo. Muna kuma kiaki, tufwete songanga lulembamu yo luzitu vava tumokenanga yandi. (Tuku 17:1; Nkunga 138:6) Tufwete kalanga mpe akwa ziku vava tusambanga kwa Yave ye nsi a ntima, ke vutukila kaka mvovo ko.—Matai 6:7, 8.

8. Vava tulombanga diambu muna sambu, adieyi tufwete vanga?

⁸ Avo tulombele diambu muna sambu, tufwete vanga mawonso kimana dina tulombele diavangama. Kasikil’owu, avo tusambidi kwa Yave mu kuma kia nsatu zeto za lumbu ke lumbu, ka tufwete zinga moko ko yo vingila vo Yave katuvana lekwa yawonso, kansi tufwete vanga ngolo muna yo vua. Tufwete salanga ye fululu kiawonso yo tambulwila konso salu tulenda sala. (Matai 6:11; 2 Tesalonika 3:10) Avo tulombele lusadisu kwa Yave kimana twayambula vanga diambu diambi, tufwete venga konso diambu dilenda kutufila mu vanga dio. (Kolosai 3:5)  Yambula twafimpa yaka yuvu itoma yuvulwanga mu kuma kia sambu.

9. Kwa nani tufwete samba? E sono kia Yoane 14:6, adieyi kikutulonganga mu kuma kia sambu?

⁹ Kwa nani tufwete samba? Yesu walonga alongoki andi basambanga kwa ‘Se dieto una kuna zulu.’ (Matai 6:9) Wavova mpe vo: “Mono i nzila ye ludi yo moyo. Kavena ona okwiza kwa Se ko avo ke mu mono ko.” (Yoane 14:6) Muna kuma kiaki, tufwete sambanga kaka kwa Yave muna nkumbu a Yesu. Ekuma tufwete sambanga muna nkumbu a Yesu? Kadi Yave muna wá sambu yeto, tufwete zitisanga kiyekwa kiamfunu kavana kwa Yesu. Nze una twalongokele, Yesu wayiza ova ntoto muna kutuvuluza muna sumu ye lufwa. (Yoane 3:16; Roma 5:12) Yave watumbika mpe Yesu se Ngang’ambuta ye Mfundisi.—Yoane 5:22; Ayibere 6:20.

10. Nga vena ye mpila yasikidiswa ina tufwete kala vava tusambanga? Sasila.

¹⁰ Nga vena ye mpila yasikidiswa ina tufwete kala vava tusambanga? Ve. Yave ke kutulombanga ko vo twakala twafukama, vuanda yovo telama vava tusambanga. Bibila kikutulonganga vo tulenda kala konso mpila ina vo ya luzitu vava tusambanga kwa Yave. (1 Tusansu 17:16; Nekemiya 8:6; Daniele 6:10; Maku 11:25) E diambu disundidi o mfunu kwa Yave ke mpila ina tukalanga ko vava tusambanga, kansi i samba ye kani diasikila. Tulenda samba mu ndinga yawakana yovo mu nsi a ntima konso fulu twina ye konso ntangwa, mu mwini yovo mu fuku. Vava tusambanga kwa Yave tulenda kala ye vuvu vo okutuwá kana nkutu vo wantu ke batuwidi ko.—Nekemiya 2:1-6.

11. Nkia mambu tulenda lomba kwa Yave?

¹¹ Nkia mambu tulenda lomba muna sambu? Tulenda  lomba konso diambu dina Yave ketondanga. Bibila kivovanga vo: “Konso diambu tulomba mun’owu wa luzolo lwandi, wá ke kutuwá.” (1 Yoane 5:14) Nga tulenda samba mu kuma kia mambu ma yeto kibeni? Elo. O samba kwa Yave kufwete kala nze yeto tumokenanga yo nkundi ona tutoma zolanga. Tulenda zayisa kwa Yave konso diambu dina muna ngindu ye muna ntima mieto. (Nkunga 62:8) Tulenda samba kwa Yave katuvana o mwand’andi avelela kimana watusadisa mu vanga mambu mambote. (Luka 11:13) Tulenda mpe lomba kwa Yave katuvana ngangu muna baka nzengo zambote yo lomba vo katukumika mu zizidila e mpasi. (Yakobo 1:5) Tufwete lombanga kwa Yave kaloloka masumu meto. (Efeso 1:3, 7) Tufwete sambanga mpe mu kuma kia akaka, kumosi ye yitu yeto ye mpangi zeto muna nkutakani.—Mavangu 12:5; Kolosai 4:12.

12. Nkia mambu mafwete sunda o mfunu muna sambu yeto?

¹² Nkia mambu mafwete sunda o mfunu muna sambu yeto? Yave yo luzolo lwandi. Tufwete vutulanga matondo ye nsi a ntim’eto wawonso muna mawonso kevanganga o Yave muna wete dieto. (1 Tusansu 29:10-13) Tuzeye wo kadi vava Yesu kakala ova ntoto, walonga alongoki andi e mpila bafwete sambilanga. (Tanga Matai 6:9-13.) Wavova vo bafwete lombanga ntete vo e nkumbu a Nzambi yazitiswa, i sia vo, yabadikilwa vo yavauka yovo yavelela. I bosi, Yesu wavova vo twasambanga vo e Kintinu kia Nzambi kiza, o luzolo lwa Yave lwavangama ova ntoto wawonso. Vava Yesu kamana vova mambu masundidi o mfunu, i bosi kayika vo tufwete sambanga mu kuma kia mana tuvuidi o mfunu muna zingu kieto. Avo tusidi Yave yo luzolo lwandi va fulu kiantete muna sambu yeto, tusonga vo mama i mambu masundidi o mfunu muna zingu kieto.

13. Ola zikwa ifwete zingilanga e sambu yeto?

 ¹³ Ola zikwa ifwete zingilanga e sambu yeto? Bibila ke kisikidisanga ola ko ifwete zingilanga e sambu. E sambu yeto ilenda kala yankufi yovo yandá mun’owu wa diambu tulombanga. Kasikil’owu, tulenda vanga sambu kiankufi vitila twadia, kansi tulenda vanga sambu kiandá vava tuzayisanga kwa Yave mana mekututokanesanga yovo kumvutula matondo. (1 Samuele 1:12, 15) Ke tuzolele vanga sambu yandá ko mu vava sivikisa akaka, nze una  bavanganga akaka muna lumbu ya Yesu. (Luka 20:46, 47) E sambu ya mpila yayi ke yisivikisanga Yave ko. E diambu disundidi o mfunu kwa Yave i samba ye nsi a ntim’eto wawonso.

14. Nkumbu nkwa tufwete sambanga muna lumbu? Ediadi adieyi ditulongele mu kuma kia Yave?

¹⁴ Nkumbu nkwa tufwete sambanga muna lumbu? Yave okutulombanga vo twasambanga kwa yandi ntangwa zawonso. Bibila kivovanga vo tufwete “kwamanana samba,” ‘siamanana muna sambu,’ yo ‘sambanga ntangwa zawonso.’ (Matai 26:41; Roma 12:12; 1 Tesalonika 5:17) Ediadi ditulongele vo Yave okalanga wakubama ntangwa zawonso mu wá e sambu yeto. Tulenda kumvutula matondo lumbu yawonso mu kuma kia zola kwandi yo ntim’andi amvevo. Tulenda mpe kunlomba luludiku, nkuma ye lufiaulwisu. Avo tuzitisanga kieleka e lau tuna diau dia  samba kwa Yave, tusadila dio konso ntangwa mu mokena yandi.

15. Ekuma tufwete vovelanga “amen” kuna mfoko a sambu?

¹⁵ Ekuma tufwete vovelanga “amen” kuna mfoko a sambu? O mvovo “amen” una ye nsasa vo “i wau kikilu” yovo “yambula diakala wowo.” Ozevo, vava tuvovanga “amen,” tusonganga vo mana tuvovele muna sambu kieto maludi kikilu. (Nkunga 41:13) Bibila kikutulonganga vo kuna mfoko a sambu kivangilu vana fulu kia ndonga, diambote mpe mu vova “amen,” kiakala muna nsi a ntima yovo mu nding’a ngolo. Vava tuvanganga wo tusonganga vo tutambulwidi mawonso mavovelo.—1 Tusansu 16:36; 1 Korinto 14:16.

16. Nga Yave ovananga kieleka e mvutu za sambu yeto? Sasila.

¹⁶ Nga Yave ovananga kieleka e mvutu za sambu yeto? Elo. Bibila kivovanga mu kuma kia Yave vo: “Owanga e sambu.” (Nkunga 65:2) Yave owanga yo vana e mvutu za sambu ya ziku ya ulolo wa wantu. Yave ovananga mvutu za sambu yayi mu mpila zaswaswana.

17. Aweyi Yave kesadilanga mbasi ye selo yandi mu vana e mvutu za sambu yeto?

¹⁷ Yave osadilanga mbasi ye selo yandi ova nza mu vana e mvutu za sambu yeto. (Ayibere 1:13, 14) Vena ye nona yayingi ya wantu balomba lusadisu kwa Nzambi kimana babakula e Bibila. Ke vavioka kolo ko, bakingulwa kwa Mbangi a Yave. Bibila kisonganga mpe vo ambasi beyikamanga e salu kia samuna e “nsangu zambote” mu nza yawonso. (Tanga Lusengomono 14:6.) Ndonga mu yeto tusambanga kwa Yave mu kuma kia diambu dimosi diasikididi yovo mu kuma kia nsatu zeto ye tutambulanga lusadisu kwa mpangi zeto Akristu.—Ngana 12:25; Yakobo 2:16.

18. Aweyi Yave kesadilanga mwand’andi avelela ye Bibila mu vana e mvutu za sambu yeto?

 ¹⁸ Yave osadilanga mwand’andi avelela mu vana e mvutu za sambu yeto. Vava tukunlombanga lusadisu mu zizidila e mpasi, Nzambi osadilanga mwand’andi avelela muna kutuvana luludiku yo nkuma. (2 Korinto 4:7) Yave osadilanga mpe Bibila mu vana mvutu za sambu yeto yo kutusadisa mu baka nzengo zambote. Vava tutanganga Bibila, tulenda solola sono kilenda kutusadisa. Vava tukalanga muna tukutakanu, Yave olenda sadila mpangi mu vana mvutu yo vova diambu dina tuvuidi o mfunu. Olenda mpe sadila nkuluntu muna nkutakani mu kutuzayisa diambu diamfunu ditukidi muna Bibila.—Ngalatia 6:1.

19. Ekuma tulenda yindulwila vo Yave ozingilanga mu vana e mvutu za sambu yeto?

¹⁹ Ezak’e ntangwa, tulenda yindula vo Yave kavene mvutu za sambu kieto ko wau vo kolo kiayingi kiviokele yovo kavene mvutu zina twayindulanga ko. Kansi, tufwete sungamena vo, Yave ozeye e ntangwa yafwana ye mpila ya vanina e mvutu za sambu yeto. Ozeye dina tuvuidi mfunu. Tufwete kwamanana samba mu songa vo tuna ye ziku muna dina tulombele kwa Yave yo songa vo tuna kikilu ye lukwikilu muna yandi. (Luka 11:5-10) Ezak’e ntangwa, Yave ovananga e mvutu za sambu yeto mu mpila ina ke tuyindulanga ko. Kasikil’owu, tulenda samba mu kuma kia diambu diampasi ditubwididi, kansi vana fulu kia fokola e mpasi, Nzambi olenda kutuvana nkuma mu zizidila zo.—Tanga Filipi 4:13.

20. Adieyi divangamanga vava tusambanga kwa Yave?

²⁰ Kieleka, lau diampwena tuna diau dia samba kwa Yave. Tuna ye ziku vo okutuwá. (Nkunga 145:18) Vava tusambanga kwa Yave ye nsi a ntim’eto, e kikundi kieto yo yandi kikumamanga.