1. Nkia sambu kitomene zayakana tubadika?

WANTU ayingi batomene zaya e sambu kiyikilwanga vo Sambu kia Se dieto dia zulu yovo Sambu kia Mfumu. Yesu wasadila e sambu kiaki mu longa alongoki andi una bafwete sambidilanga. Nkia diambu kalomba muna sambu kiaki? Ekuma sambu kiaki kinina kiamfunu kwa yeto o unu?

2. Nkia mambu tatu mamfunu Yesu katulonga vo twalombanga?

² Yesu wavova vo: “I wau wuwu nufwete sambila: ‘E Se dieto koko zulu, yambula e nkumbu aku yazitiswa. E Kintinu kiaku kiza. O luzolo lwaku lwavangama ova ntoto nze koko zulu.’” (Tanga Matai 6:9-13.) Ekuma Yesu katulongela vo twalombanga mambu tatu mama?—Tala e Mvovo Misasilu 20.

3. Nkia mambu tufwete zaya mu kuma kia Kintinu kia Nzambi?

³ Tulongokele kala vo nkumbu a Nzambi i Yave. Tubadikidi kala o luzolo lwa Nzambi mu kuma kia wantu yo ntoto. Kansi, adieyi Yesu kazola vova vava kavova vo: ‘Yambula e Kintinu kiaku kiza’? Muna vana e mvutu, entete tuzaya nki i Kintinu kia Nzambi, nkia mambu kivanga ye una kivelelesela e nkumbu a Nzambi.

4. Nki i Kintinu kia Nzambi? Nani i Ntinu?

⁴ Yave wasikidisa luyalu lwa zulu yo sola Yesu mu kala se Ntinu. Bibila kiyikilanga luyalu lwalu vo Kintinu kia Nzambi. Yesu i “Ntinu wa atinu ye Mfumu  a zimfumu.” (1 Timoteo 6:15) Yesu una ye wisa kia vanga mambu masundidi o wete lutila konso luyalu. O nkum’andi usundidi o nkuma wa tuyalu twawonso kana nkutu tubundakeso.

5. O luyalu lwa Nzambi, akweyi lwina ye nki luyala?

⁵ Vioka lumbu makumaya vava kafuluka, Yesu wavutuka kuna zulu. Kuna kwalanda, Yave wankitula se Ntinu a Kintinu. (Mavangu 2:33) O luyalu lwa Nzambi kuna zulu lwina, kansi lusinga yala o ntoto. (Lusengomono 11:15) Ekiaki i kuma Bibila kiyikilanga Kintinu kia Nzambi vo ‘Kintinu kia zulu.’—2 Timoteo 4:18.

6, 7. Nki kikitulanga Yesu se ntinu osundidi atinu a wantu?

⁶ Bibila kivovanga vo Yesu osundidi konso ntinu ova ntoto, kadi “yandi kaka olembi fwanga.” (1 Timoteo 6:16) Ayadi awonso a wantu befwanga, kansi Yesu kesinga fwa ko. Mawonso kevanga mu kuma kieto, mesikila yakwele mvu.

⁷ Yesu Ntinu ansongi ye nkwa nkenda kekala, kadi Bibila kiasakula vo: “O mwand’a Yave ukunyitalela, o mwand’a ngangu ye wa umbakuzi, o mwand’a ndongesela ye wa nkuma, o mwand’a zayi ye wa vumi wa Yave. Oyangalela muna vumi wa Yave. Ke fundisila muna mbona meso ko, ngatu tumbila [yovo ludikila] kaka mu dina kawidi. Ofundisila nsukami muna unsongi.” (Yesaya 11:2-4) Nga kuzolele yalwa kwa ntinu a mpila yayi ko?

8. Aweyi tuzayidi wo vo Yesu ke yala yandi mosi ko?

⁸ Nzambi wasola wantu akete mu yala yo Yesu kuna zulu. Kasikil’owu, Paulu wa ntumwa wavovesa Timoteo vo: “Avo tuzizidila, tuyala yandi mpe se atinu.” (2 Timoteo 2:12) Akwa beyala kumosi yo Yesu?

9. Wantu akwa beyala yo Yesu? Nkia ntangwa Nzambi kayantika kubasola?

 ⁹ Nze una tulongokele muna kapu kia 7, Yoane wa ntumwa wasongwa mona-meso kia Yesu nze Ntinu kuna zulu kumosi ye 144.000 ma atinu akaka. Aki nani bena muna lutangu lwa 144.000? Yoane wasasila vo i awana ‘bena vo e nkumbu a Yesu ye nkumbu ya Se diandi yasonama vana mbunzu zau.’ I bosi wakudikila vo: “I yau belandanga Mwan’a meme [una vo i Yesu] konso kuna kekwendanga. Basumbwa vana vena wantu.” (Tanga Lusengomono 14:1, 4.) E 144.000 ma Akristu akwikizi ana kasola o Nzambi, ‘beyala e nza’ kumosi yo Yesu. Vava befwanga, befulwanga yo tambula moyo kuna zulu. (Lusengomono 5:10) Tuka muna lumbu ya antumwa, Yave osolanga Akristu akwikizi mu lungisa lutangu lwa 144.000 ma atinu.

10. O sola Yesu ye 144.000 mu yala wantu, aweyi disongelanga o zola kwa Yave?

¹⁰ Yave otoma kutulunga-lunganga, i dianu kasolela wantu mu yala kumosi yo Yesu. Yesu nyadi ambote kekala kadi otoma kutubakulanga. Ozeye e mpasi tumonanga. Paulu wavova vo Yesu olenda “bakula lutovoko lweto” kadi yandi kibeni “watontwa muna mawonso nze yeto, kansi kasumuka ko.” (Ayibere 4:15; 5:8) E 144.000 ma wantu bazeye mpe mpasi zeto. Benuananga yo usumuki ye mayela. Muna kuma kiaki, tulenda kala ye ziku vo e 144.000 bebakula una tumonanga ye mpasi mpe tunuananga zau.

11. Ekuma Yesu kalongela alongoki andi basambanga vo luzolo lwa Nzambi lwavangama kuna zulu?

¹¹ Yesu wavovesa alongoki andi vo basambanga  kimana luzolo lwa Nzambi lwavangama kuna zulu. Ekuma? Muna kapu kia 3 twalongokele vo Satana wa Nkadi ampemba wakolamena Yave. Vava kakolama, Yave wayambula vo Satana kumosi ye mbasi zandi z’akolami yovo nkuya bakala kuna zulu mu fikolo. Ediadi disongele vo ke awonso ko kuna zulu bavanganga luzolo lwa Nzambi. Muna kapu kia 10, tulongoka mayingi mu kuma kia Satana ye nkuya.

12. Nkia mambu mole mamfunu meyikwanga muna Lusengomono 12:10?

¹² Bibila kisasilanga vo vava Yesu kayadikwa se Ntinu muna Kintinu kia Nzambi, ke vavioka kolo ko, wanuana vita yo Satana. (Tanga Lusengomono 12:7-10.) E tini kia 10 mambu mole mamfunu kiyikanga. Diantete, Kintinu kia Nzambi kiayantika yala, Yesu Kristu i Ntinu. Diazole, Satana wayingwa kuna zulu yo vetwa ova ntoto. Nze una tulongoka, o mambu mama mavangama kala.

13. Adieyi diabwa kuna zulu vava Satana kayingwa ova ntoto?

¹³ Bibila kiyikanga e kiese bamona mbasi zakwikizi vava Satana ye nkuya miandi bayingwa kuna zulu. Tutanganga vo: “Yangalala e zulu yo yeno nukalanga ko!” (Lusengomono 12:12) Owau, kuna zulu kuna ye luvuvamu lwakieleka ye ngwizani kadi awonso luzolo lwa Nzambi bevanganga.

14. Nkia mambu mevangamanga ova ntoto tuka Satana kayingilwa kuna zulu?

¹⁴ Kansi, e zingu ova ntoto kiaswaswana kikilu. Mambu mampasi mebwilanga wantu ova ntoto kadi ‘Nkadi ampemba wakulumuka ova ntoto, makasi mayingi kena mau, wau kazeye wo vo kolo kiakete kaka kasidi kiau.’ (Lusengomono 12:12) Satana wina ye  makasi mayingi wau kayingwa kuna zulu, ozeye wo vo fioti fisidi ofwaswa. Ovanganga mawonso kalenda mu twasa mavuanga, mpasi ye lubangamu mu nza yawonso.

15. Adieyi i kani dia Nzambi mu kuma kia ntoto?

¹⁵ Kansi e kani dia Nzambi mu kuma kia ntoto ke diasoba ko. Ozolele vo wantu alunga bazinga yakwele mvu muna paradiso ova ntoto. (Nkunga 37:29) Aweyi Kintinu kia Nzambi kilungisila e kani diadi?

16, 17. Ungunza wa Daniele 2:44, adieyi ukutulonganga mu kuma kia Kintinu kia Nzambi?

¹⁶ O ungunza wa Daniele 2:44 uvovanga vo: “Muna lumbu ya atinu awaya, o Nzambi a zulu otongeka kintinu kina ke kifwaswa ko. E kintinu kiaki ke kivewa kwa nkangu wankaka ko. Kikosomona yo sukisa yintinu yayi yawonso, kiau kaka kiyala yakwele mvu.” O ungunza wau, adieyi ukutulonganga mu kuma kia Kintinu kia Nzambi?

¹⁷ Diantete, ukutulonganga vo Kintinu kia Nzambi kiyantika yala “muna lumbu ya atinu awaya.” Ediadi disongele vo vekala ye yintinu yankaka ova ntoto vava Kintinu kiyantika yala. Diazole, ukutulonganga vo e Kintinu kia Nzambi kiyala yakwele mvu ye ke vena luyalu lwankaka ko luvinga vana fulu kiandi. Diatatu, e Kintinu kia Nzambi kinuana vita ye yintinu ya nza yayi. Kintinu kia Nzambi kisunda e vita, i kiau kaka kiyala nza yawonso. Ozevo, wantu bevua luyalu lusundidi o wete!

18. Aweyi iyikilwanga e vita yansuka benuana ntinu mia nza ye Kintinu kia Nzambi?

¹⁸ Aweyi Kintinu kia Nzambi kiyadila e nza? Vitila  vita yansuka iyikilwanga vo Armangedo, e nkuya bevunginika “ntinu mia nza yawonso, babalunganisa vamosi muna vit’a lumbu kianene kia Nzambi a Mpungu-ngolo.” Atinu a nza benuana ye Kintinu kia Nzambi.—Lusengomono 16:14, 16; tala e Mvovo Misasilu 10.

19, 20. Ekuma tuvuididi Kintinu kia Nzambi o mfunu?

¹⁹ Ekuma tuvuididi Kintinu kia Nzambi o mfunu? Vena ye kuma tatu. Kiantete, tu asumuki, muna kuma kiaki tuyelanga yo fwa. Kansi, Bibila kivovanga vo muna Kintinu kia Nzambi tuzinga yakwele mvu. Muna Yoane 3:16 tutanganga vo: “Muna nzola katoma zola o wantu, o Nzambi i kavanina o Mwan’andi mosi kaka, kimana konso ona osonga lukwikilu muna yandi ke fwaswa ko, moyo a mvu ya mvu kevua.”

²⁰ E kuma kiazole tuvuididi Kintinu kia Nzambi o mfunu, i kia sia vo, tuzinganga ye yimpumbulu. Wantu ayingi akwa luvunu, mivi ye mintá zumba. Ke tulendi vanga diambu ko muna kubafwasa, kansi Nzambi ovanga wo. Awana bekwamanananga vanga mambu mambi, befwaswa muna Armangedo. (Tanga Nkunga 37:10.) E kuma kiatatu tuvuididi Kintinu kia Nzambi o mfunu, i kia sia vo, ayadi a nza ke belendanga singika mambu ko, akwa nsoki yovo mpuki. Ke bena yo luzolo lwa sadisa nkangu ko mu lemvokela Nzambi. Bibila kivovanga vo: ‘O muntu oyalanga nkwandi muna kumwesa e mpasi.’—Kimpovi 8:9.

21. Aweyi Kintinu kivangila mawonso kimana luzolo lwa Nzambi lwavangama ova ntoto?

²¹ Vava vita ya Armangedo ivioka, Kintinu kia Nzambi kivanga mawonso kimana luzolo lwa Nzambi  lwavangama ova ntoto. Kasikil’owu, Satana ye nkuya miandi bekangwa. (Lusengomono 20:1-3) Wantu ke beyela diaka ko ngatu fwa. Mu kuma kia lukûlu, akwa kwikizi awonso bezinga yakwele mvu muna Paradiso. (Lusengomono 22:1-3) E Kintinu kivelelesa nkumbu a Nzambi. Ediadi aweyi disongele? Disongele vo vava Kintinu kia Nzambi kiyala e nza, wantu awonso bezitisa e nkumbu a Yave.—Tala e Mvovo Misasilu 21.

22. Aweyi tuzayidi wo vo Yesu kayadikwa se Ntinu ko vava kakala ova ntoto ngatu vana vau vava kafulwa?

²² Yesu walonga alongoki andi basambanga vo: ‘Yambula e Kintinu kiaku kiza.’ Ediadi diasonga vo Kintinu kia Nzambi kisikidiswa kuna sentu. Entete, Yave osikidisa luyalu lwandi yo kitula Yesu se Ntinu. Nga Yesu vava kavutuka kuna zulu vana vau wayadikwa se Ntinu? Ve, diavava vo kavingila. Vava Yesu kafulwa, ke vavioka kolo kiayingi ko, Petelo yo Paulu batoma kiesesa diambu diadi vava bayika ungunza una muna  Nkunga 110:1 mu kuma kia Yesu. Muna ungunza wau Yave wavova vo: “Vuanda oku koko kuame kwalunene yavana isia e mbeni zaku se sikinua kia tambi yaku.” (Mavangu 2:32-35; Ayibere 10:12, 13) Kolo kwa Yesu kavingila vitila Yave kanyadika se Ntinu?

23. (a) Nkia ntangwa Yesu kayantika yala se Ntinu a Kintinu kia Nzambi? (b) Adieyi tulongoka muna kapu kilanda?

²³ Mvu miayingi vitila mvu wa 1914, buka kia Akristu akwikizi babakula vo vekala ye mvu wamfunu muna ungunza wa Bibila. E mambu mebwanga ova ntoto tuka muna mvu wa 1914 mesonganga e ziku vo ndungidi bakala yau. Kadi mu mvu wauna Yesu wayantika yala se Ntinu. (Nkunga 110:2) Ke vavioka kolo kiayingi ko, Satana wavetwa ova ntoto, owau “kolo kiakete kaka kasidi kiau.” (Lusengomono 12:12) Muna kapu kilanda, tumona e ziku yayingi isonganga vo mu kolo kiaki tuzingilanga. Tulongoka mpe vo ke kolo ko Kintinu kia Nzambi kivanga mawonso kimana luzolo lwa Nzambi lwavangama ova ntoto.—Tala e Mvovo Misasilu 22.