1. Wau vo olongokele nkanda wau, adieyi olenda kukiyuvula?

TUKA wayantika longokela nkanda wau, mayingi kala ozeye mu kuma kia ludi kia Bibila. Walongokele e ludi mu kuma kia nsilu a Nzambi wa moyo a mvu ya mvu, una bena awana bafwa ye vuvu kia lufuluku. (Kimpovi 9:5; Luka 23:43; Yoane 5:28, 29; Lusengomono 21:3, 4) Nanga wayantikidi kwenda muna tukutakanu twa Mbangi za Yave yo kwikila vo mu nsambil’aludi kikilu bena. (Yoane 13:35) Nanga wayantikidi mpe siamisa e ngwizani aku yo Yave yo baka e nzengo  za kunsadila. Muna kuma kiaki olenda kukiyuvula: ‘Adieyi mfwete vanga mu sadila Nzambi?’

2. Ekuma yakala dimosi wa musi Etiopia kazola vubilwa?

² I diau mpe kakiyuvula yakala dimosi wa musi Etiopia ona wazinga muna lumbu ya Yesu. Ke vavioka kolo ko vava Yesu kafuluka, Filipo wa nlongoki a Yesu wasila umbangi kwa yakala diadi. Filipo wansasila vo Yesu i Masia. Mana musi Etiopia kalongoka masimba o ntim’andi yo vova vana vau vo: “Tala! O maza i mama; adieyi dinsimbidi muna vubwa?”—Mavangu 8:26-36.

3. (a) Nkia nkanikinu Yesu kavana kwa alandi andi? (b) Aweyi Nkristu kafwete vubilwa?

³ Bibila kilonganga vo avo ozolele sadila Yave, ofwete vubwa. Yesu wakanikina alandi andi vo: ‘Nuenda, nuakitula wantu a zula yawonso se alongoki, nuabavuba.’ (Matai 28:19) Yesu yandi kibeni wavubwa mu songa mbandu ambote. Kazazilwa maza va ntu ko, kansi wadimunua muna maza yandi awonso. (Matai 3:16) O unu, vava Nkristu kevubwanga, kafwete dimunua muna maza yandi awonso.

4. O luvubu lwaku adieyi lusonga kwa akaka?

⁴ O luvubu lwaku lusonga kwa akaka vo ozolele kala kieleka nkundi a Nzambi ye ozolele kunsadila. (Nkunga 40:7, 8) Muna kuma kiaki, diambote wakiyuvula: ‘Adieyi mfwente vanga mu vubwa?’

5. (a) Adieyi ofwete vanga vitila wavubwa? (b) Ekuma tukutakanu twa Kikristu twinina o mfunu?

⁵ Vitila wavubwa, ofwete zaya Yave yo Yesu. Wayantika wo vanga muna longokanga e Bibila. (Tanga Yoane 17:3.) Kansi, ke diau kaka ko divavuanga. Bibila kivovanga vo ofwete ‘zadiswa yo zayi wasikila’ wa luzolo  lwa Yave. (Kolosai 1:9) O tukutakanu twa Mbangi za Yave tukusadisa mu wokesa o zayi wau yo siamisa ngwizani aku yo Yave. Ekiaki i kimosi muna kuma ofwete kwendelanga muna tukutakanu twatu ntangwa zawonso.—Ayibere 10:24, 25.

6. Nkia tezo kia zayi wa Bibila ofwete kala wau vitila wavubwa?

⁶ Dialudi vo, Yave kevavanga ko vo wateka zaya mawonso mena muna Bibila vitila wavubwa. Kadi kavava ko vo musi Etiopia kateka zaya mawonso vitila kavubwa. (Mavangu 8:30, 31) Tukwamanana longoka mu kuma kia Nzambi yakwele mvu. (Kimpovi 3:11) Kansi muna vubwa, ofwete zaya yo tambulwila malongi mantete ma Bibila.—Ayibere 5:12.

7. Aweyi e longi dia Bibila dikusadisilanga?

⁷ Bibila kivovanga vo: “Kondwa kwa lukwikilu ke dilendakana ko mu toma yangidika Nzambi.” (Ayibere 11:6) Muna kuma kiaki, ofwete kala yo lukwikilu vitila wavubwa. Bibila kikutuzayisanga vo wantu ankaka muna mbanza ankulu ya Korinto, vava bawá e nsangu zasamunanga alandi a Yesu, ‘bakwikila yo vubwa.’ (Mavangu 18:8) Diau dimosi mpe, e longi dia Bibila dikusadisanga mu kala yo lukwikilu muna nsilu mia Nzambi ye muna nkum’a kimenga kia Yesu, kina kilenda kutuvuluza muna sumu yo lufwa.—Yosua 23:14; Mavangu 4:12; 2 Timoteo 3:16, 17.

8. Adieyi dilenda kufila mu zayisa kwa wantu ankaka mana olongokanga?

⁸ Ekolo olongokanga mayingi muna Bibila yo mona una mekusadisilanga muna zingu kiaku, o lukwikilu  lwaku lukumama. Okala ye luzolo lwa zayisa kwa wantu ankaka mana olongokanga. (Yeremiya 20:9; 2 Korinto 4:13) Kansi, kwa nani ofwete zayisa mana olongokanga?

9, 10. (a) Kwa nani olenda yantika zayisa mana olongokanga? (b) Adieyi ofwete vanga avo zolele yantika sila umbangi kumosi ye nkutakani?

⁹ Oyangalela zayisa mana olongokanga kwa yitu yaku, akundi, mfinangani ye akwaku a salu yovo a sikola. Ediadi diambote kikilu, kansi vangilanga wo kuna ngemba yo zola. Kuna kulanda, okala wafwana mu samuna e nsangu zambote kumosi ye nkutakani. Vava omona vo wafwana mu vanga wo, zayisa kwa Mbangi a Yave olongokanga yaku e Bibila vo ozolele yantika samuna e nsangu zambote kumosi ye nkutakani. Avo nteleki omwene vo wafwana ye osadilanga nkanikinu mina muna Bibila, yeno awole numokena ye akuluntu wole a nkutakani.

¹⁰ Nkia diambu numokena ye akuluntu? Akuluntu bevava zaya kana vo obakulanga yo kwikila muna malongi mantete ma Bibila yo sadila mo muna zingu kiaku kia lumbu ke lumbu. Bevava zaya mpe kana vo ozolele kikilu kituka Mbangi a Yave. Sungamena dio vo akuluntu betokanenanga e wete dia wantu awonso muna nkutakani kumosi ye wete diaku. Ozevo, kumoni wonga ko wa mokena yau. (Mavangu 20:28; 1 Petelo 5:2, 3) Kuna mfoko a moko, akuluntu bekuzayisa kana vo olenda yantika samuna e nsangu zambote ye nkutakani.

11. Ekuma ofwete vangila e nsobani vitila wayantika sila umbangi kumosi ye nkutakani?

¹¹ Akuluntu balenda kuzayisa e nsobani ofwete  vanga vitila wayantika samuna e nsangu zambote kumosi ye nkutakani. Ekuma ofwete vangila e nsobani zazi? Kadi vava tusamunanga Diambu dia Nzambi kwa wantu ankaka, Nzambi tusunzulanga. Muna kuma kiaki, tufwete zingila mu mpila ivananga nkembo kwa yandi.—1 Korinto 6:9, 10; Ngalatia 5:19-21.

12. Ekuma wantu awonso bafwete vilukila e ntima?

¹² Vena ye diambu diankaka ofwete vanga vitila wavubwa. Petelo wa ntumwa wavova vo: “Nuvilukwa e ntima, nuvutuka kwa Nzambi, o masumu meno mavunzunua.” (Mavangu 3:19) O viluka o ntima, aweyi disongele? Disongele vo kendalala yovo yambula konso diambu diambi tuvanganga. Kasikil’owu, avo mu mavangu ma zumba okuyivananga, ofwete mo yambula. Kana nkutu vo osianga ngolo mu vanga mambu mambote muna zingu kiaku, ofwete kwamanana songa luviluku lwa ntima kadi yeto awonso tu asumuki, tufwete lombanga ndoloki kwa Nzambi.—Roma 3:23; 5:12.

13. O ‘vutuka kwa Nzambi,’ aweyi disongele?

¹³ Nga luviluku lwa ntima i diau kaka ofwete vanga? Ve. Petelo wavova mpe vo ofwete ‘vutuka kwa Nzambi.’ Ediadi disongele vo ofwete yambula mavangu mawonso mambi yo vanga mambu mambote. Muna bonga e nona, yindula vo ku fulu kimosi okwendanga mu nkumbu antete. I bosi, obakwidi vo e nzila olandanga ke yau ko. Adieyi ovanga? Ka lukatikisu ko vo oningama fioti yo vutuka manima yo landa e  nzila yambote. Diau dimosi mpe, ekolo olongokanga Bibila obakula vo vena ye fu yovo mambu ofwete soba muna zingu kiaku. Kala ye luzolo lwa ‘viluka’ yo singika konso diambu divavua. I bosi, yantika vanga mambu mambote.

14. Aweyi olenda kukiyekolwela kwa Nzambi?

¹⁴ E diambu diankaka diamfunu ofwete vanga vitila wavubwa, i kukiyekola kwa Yave. Muna kukiyekola kwa Yave, ofwete samba yo sia nsilu wa sambila kaka yandi yo kitula luzolo lwandi se diambu disundidi o mfunu muna zingu kiaku.—Nsiku 6:15.

15, 16. Nki kifilanga muntu mu kukiyekola kwa Nzambi?

¹⁵ O sia o nsilu wa sadila kaka Yave dina nze ngeye osidi nsilu wa viokesa e zingu kiaku kiawonso yo muntu ndiona ozolanga. Yindula vo toko ye ndumba babandidi kimakangu. Ekolo toko ketoma zaya ndumba, otoma kunzola yo vava kazala yandi. Kana una vo obaka nzengo zazi ke diambu diakete ko, o toko otambulwila e mbebe yayi kadi zola ketoma kunzolanga.

¹⁶ Ekolo olongokanga mambu ma Yave, otoma kunzola yo vanga mawonso muna kunsadila. Ediadi dikufila mu samba kwa yandi yo sia nsilu wa kunsadila. Bibila kivovanga vo konso muntu ozolele landa Yesu, kafwete ‘kuyivanina o nkalu.’ (Maku 8:34) Ediadi aweyi disongele? Disongele vo sia luzolo lwa Yave va fulu kiantete muna zingu kiaku. Mana Yave kazolele masundidi o mfunu ke mu zolela ye makani maku ko.—Tanga 1 Petelo 4:2.

17. Ekuma akaka bekadilanga yo lukatikisu mu kukiyekola kwa Yave?

¹⁷ Akaka bekatikisanga kukiyekola kwa Yave, kadi wonga bemonanga wa sia vo ke belenda lungisa nsilu wa kwamanana sadila Nzambi ko. Ke bazolele kendeleka Yave ko. Nanga beyindulanga vo, avo ke bakiyekwele ko, Yave kekubatumba ko muna mambu bevanganga.

18. Adieyi dilenda kusadisa mu sunda o wonga wa kendeleka Yave?

¹⁸ O zola kwaku muna Yave kukusadisa mu sunda o wonga wa kunkendeleka. Mu kuma kia zola kwaku muna yandi, ovanga mawonso mu tatidila o nsilu wasia kwa Nzambi. (Kimpovi 5:4; Kolosai 1:10) Ke dikala diampasi ko mu vanga luzolo lwa Yave. Yoane wa ntumwa wasoneka vo: “E nsas’a zola Nzambi i yau yayi: twalemvokelanga nkanikinu miandi; e nkanikinu miandi ke miampasi ko.”—1 Yoane 5:3.

19. Ekuma kufwete mwena wonga ko mu kukiyekola kwa Yave?

¹⁹ Muna kukiyekola kwa Yave, ke divavanga ko vo wakala walunga. Nzambi ke kutulombanga ko twavanga mana ke tulenda ko. (Nkunga 103:14) Okusadisa kimana wavanga mambu mambote. (Yesaya 41:10) Bunda Yave e vuvu yo ntim’aku wawonso, “yandi osingika e nzila zaku.”—Ngana 3:5, 6.

20. Avo ukiyekwele kwa Nzambi, nkia diambu diaka ofwete vanga?

²⁰ Adieyi obenze, nga wakubama wina mu kukiyekola kwa Yave? Avo ukiyekwele kwa Yave, okala wakubama mu vanga e diambu dilende, i sia vo, vubwa.

21, 22. Aweyi olenda songela lukwikilu lwaku “kw’awonso”?

²¹ Mokena yo mfidi a buka kia akuluntu a nkutakani  aku yo kunzayisa vo wakiyekwele kala kwa Yave ye ozolele vubwa. I bosi, yandi ovanga e nkubika ye akuluntu akaka kimana bafimpulula yaku maka malongi mantete ma Bibila. Avo bamwene vo wafwana wina, bekuzayiza vo olenda kubama mu vubwa muna lukutakanu lwa zunga yovo lwa mvivu lwa Mbangi za Yave. Muna lumbu ovubwa, vekala ye longi  disonga e nsas’a luvubu. O mpovi ofila e longi diadi, olomba kwa awana bevubwa mu vana e mvutu za yuvu yole. Muna vana e mvutu za yuvu yayi osonga lukwikilu lwaku “kw’awonso.”—Roma 10:10.

²² I bosi, ovubwa. Odimunua muna maza ngeye awonso. O luvubu lwaku lusonga kwa wantu awonso  vo wakiyekwele kwa Yave, owau okitukidi se Mbangi a Yave.

23. Ovubilwa “muna nkumbu a Se yo Mwana yo mwand’avelela,” aweyi disongele?

²³ Yesu wavova vo alongoki andi bafwete vubilwa “muna nkumbu a Se yo Mwana yo mwand’avelela.” (Tanga Matai 28:19.) Aweyi disongele? Disongele vo ofwete zaya e wisa kia Yave ye fulu kia Yesu muna kani dia Nzambi ye una Nzambi kesadilanga o mwand’andi avelela mu lungisa luzolo lwandi.—Nkunga 83:18; Matai 28:18; Ngalatia 5:22, 23; 2 Petelo 1:21.

24, 25. (a) O luvubu adieyi lusonganga? (b) Nkia diambu tubadika muna kapu kiansuka?

²⁴ O luvubu diambu diamfunu lusonganga. Vava o muntu kedimunuanga muna maza, disonganga vo ofwidi yovo oyambwidi e mpila zingu kiandi kiankulu. Vava kevaikanga muna maza, disonganga vo oyantikidi zingu kiampa mu vanga luzolo lwa Nzambi. Tuka muna ntangwa yoyo, osadila kaka Yave. Kafwete sungamena vo, kakiyekwele kwa muntu ko ngatu kwa nkubika yovo salu. Kansi, kwa Yave kayekwele zingu kiandi.

²⁵ O kukiyekola kwaku kukusadisa mu siamisa e ngwizani aku yo Nzambi. (Nkunga 25:14) Kansi, ediadi ke disongele ko vo muntu ovuluzwa wau vo ovubilu. Paulu wa ntumwa wasoneka vo: “Nusiamanana sala kuna vumi ye zakamu muna diambu dia luvuluzu lweno.” (Filipi 2:12) O luvubu i lubantiku kaka. Kansi, aweyi olenda toma finamena Yave? E kapu kiansuka kivana mvutu za kiuvu kiaki.