YINDULA vo mu kangala wina muna Seka dia Kintinu, kansi kuna dio zayidila diaka ko. Otoma yangalelanga e Seka diadi. Okalanga ye kiese vava osungamenanga lusadisu wavana vava diatungwanga muna mvu miavioka. Kansi, owau kiese una kiau wau vo e Seka dia Kintinu mu sadilwa dina mu fikolo mu sadisa awana babwidilu sumbula. Vava kimbongela kiatwasa kizalu yo fwasa e zunga kieno, Afidi a Vula vana vau bavanga mawonso kimana ampangi babwidilu sumbula batambula madia, mvwatu, maza mavelela ye lusadisu lwankaka. O tukau twatoma kubikwa. Ampangi zamakala ye zamakento bakotanga yo bonga ina bavwidi o mfunu, ndonga muna yau badilanga mu kuma kia kiese.

Yesu wavova vo o zola muna muntu yo nkw’andi i sinsu kiadi swaswanesa o nkangu andi. (Yoa. 13:34, 35) Mu kunku kiaki tubadika una Akristu besongelanga o zola kwau muna salu kia tunga ye kia sadisa ana babwidilu sumbula besalanga Mbangi za Yave. O zola kwa mpila yayi i ziku kisonganga vo ku nsi a wisa kia luyalu lwa Kintinu kia Yesu tuzingilanga.