LONGI DIA 7
Nki i Kintinu kia Nzambi?
1. Nki i Kintinu kia Nzambi?
Ekuma Yesu kafwanukini kala se Ntinu?—MAKU 1:40-42.
E Kintinu kia Nzambi i luyalu lw’ezulu. Luvinga vana fulu kia tuyalu twawonso. Nzambi osadila luyalu lwalu mu lungisa luzolo lwandi kun’ezulu ye ova ntoto. E nsangu za Kintinu kia Nzambi zambote kikilu. Ke kolo ko, Kintinu kia Nzambi kilungisa e nsatu za wantu za luyalu lwambote. Luyikakesa wantu awonso bezingila ova ntoto.—Tanga Daniele 2:44; Matai 6:9, 10; 24:14.
Kintinu kifwete yalwa kwa ntinu. Yave wasola Mwan’andi, Yesu Kristu, mu kala Ntinu a Kintinu Kiandi.—Tanga Lusengomono 11:15.
Tala e video Nki i Kintinu kia Nzambi?
2. Ekuma Yesu kafwanukini kala se Ntinu?
Mwan’a Nzambi wafwana kala Ntinu kadi nkwa nkenda, ona ozolanga unsongi. (Matai 11:28-30) Una mpe yo nkuma wa sadisa wantu kadi oyala e nza tuka kun’ezulu. Vava kafulwa, watomboka kun’ezulu yo vwanda kuna koko kwalunene kwa Yave. (Ayibere 10:12, 13) I bosi, Nzambi wamvana wisa kia yantika yala.—Tanga Daniele 7:13, 14.
3. Aki nani beyala entwadi yo Yesu?
E buka ki’awana beyikilwanga vo “avauki” beyala entwadi yo Yesu kun’ezulu. (Daniele 7:27) Avauki antete basolwa i ntumwa za Yesu. Yamu wau, Yave okwamanananga sola akala ye akento akwikizi nze avauki. Nze Yesu, befulwanga ye nitu a kimwanda.—Tanga Yoane 14:1-3; 1 Korinto 15:42-44.
Wantu akwa bekwenda kun’ezulu? Yesu wabayikila vo “finkambi-kambi.” (Luka 12:32) O lutangu lwau 144.000. Beyala entwadi yo Yesu e nza yawonso.—Tanga Lusengomono 14:1.
4. Adieyi diabwa vava Yesu kayantika yala?
Kintinu kia Nzambi kiayantika yala muna mvu wa 1914. * E diambu diantete Yesu kavanga vava kayadikwa se Ntinu i veta Satana ye nkwiya miandi ova ntoto. Satana wafunga kikilu makasi yo yantika twasa e mpasi ova nza yawonso. (Lusengomono 12:7-10, 12) Tuka wauna, e mpasi ova nza mu wokela kaka zina. Vita, mvengele, vuku, ye nzakama za ntoto i “sinsu” kisonganga vo ke kolo ko e Kintinu kia Nzambi kiyala ova ntoto.—Tanga Luka 21:7, 10, 11, 31.
5. Kintinu kia Nzambi adieyi kisinga lungisa?
Muna salu kia umbangi kisalwanga mu nza yawonso, Kintinu kia Nzambi kiyikakesanga e ndong’ayingi ya wantu a zula yawonso. Mazunda ye mazunda m’alembami bekitukanga se nkangu uyalwa kwa Yesu. Kintinu kia Nzambi kikubatanina vava kifwasa nza yayi yambi. Muna kuma kiaki, awonso ana bazolele bak’e nluta mia Kintinu kia Nzambi bafwete longoka sakalela Yesu.—Tanga Lusengomono 7:9, 14, 16, 17.
Muna kolo kia 1000 dia mvu, Kintinu kilungisa ekani dia Nzambi mu kuma kia wantu. Nza yawonso ikituka se paradiso. I bosi, Yesu ovutula Kintinu vana moko ma S’andi. (1 Korinto 15:24-26) Nga ozeye muntu ona lenda zayisa e nsangu za Kintinu kia Nzambi?—Tanga Nkunga 37:10, 11, 29.
^ tini. 6 Muna zaya ungunza wa Nkand’a Nzambi mu kuma kia mvu wa 1914, tala Adieyi Nkand’a Nzambi Ulenda Kutulonga? muna lukaya lwa 217-220.
