NKINZI miayingi mia mabundu ye mia tuyalu mikembelwanga omu nza yawonso ke mina ngwizani ko ye Nkand’a Nzambi. Akweyi miatuka? Avo ofimpidi muna malundilu ma nkanda miankulu, osivika kikilu mu mona nkanda misonganga etuku dia nkinzi miayingi mikembelwanga muna zunga kiaku. Tala nona yakaka.

 Nduta. E Encyclopædia Britannica isonganga vo: “Muna luwawanu lwampa ke muna fulu ko kisonganga vo e nduta ifwete kembelwa.” Nkinzi wau aweyi wayantikila? Mu nsambila za esi zula wayintikila. Awana bekembelanga nkinzi wau bevovanga vo bevanganga wo mu sungamena lufuluku lwa Yesu, kansi mana mevangamanga mu nkinzi wau ke ma Kikristu ko. Kasikil’owu, mu kuma kia “Nduta ya Nlumba,” The Catholic Encyclopedia yivovanga vo: “Nlumba i sinsu kia esi zula, sinsu kia wuta.”

Nkinzi a Mvu Ampa. E lumbu ye mpila yikembelelwanga nkinzi a mvu ampa yaswaswana muna konso nsi. O nkanda The World Book Encyclopedia usonganga etuku dia nkinzi wau oku vo: “Muna mvu 46 wa tandu kieto, Júlio César wa Nyadi a nsi a Roma wasikidisa lumbu kia 1 kia ngonde a Yanuali se lumbu kia nkinzi a mvu ampa. Muna lumbu kiaki esi Roma Jano wa nzambi a mavitu, ye lubantiku bakembelanga. E ngonde a Yanuali mu nkumbu a Jano yatuka. E teke kia Jano ndose zole kiakala, yimosi yatala kunima e yakaka yatala kuntwala.” Muna kuma kiaki, nkinzi a mvu ampa mu lusansu lwa esi zula watuka.

Lumbu kia Mafwa. Encyclopedia Americana yisonganga vo: “E lumbu kia mafwa mu lusansu lwa esi Celta kiatuka vitila tandu kia Kristu. Muna lumbu kiakina esi Celta nzambi zole zampwena bakembelanga—nzambi a ntangwa ye nzambi amafwa . . . , bakembelanga nkinzi wau kina kia 1 kia ngonde ya Novemba kiayantikanga Mvu ampa. I bosi mu malembe malembe nkinzi wau wakoteswa muna Kikristu.”

Nkinzi Miakaka. Ke dilendakana ko mu yika nkinzi miawonso mikembelwanga ova nza. Ozevo, o Yave ke tondanga nkinzi miawonso misanisinanga wantu yovo nkubika za wantu ko. (Yeremiya 17:5-7; Mavangu 10:25, 26) Sungamena vo, etuku dia nkinzi mikembelwanga muna mabundu dilenda songa kana vo o Nzambi otondanga mio yovo ve. (Yesaya 52:11; Lusengomono 18:4) Nsiku mia Nkand’a Nzambi miyikilu muna Kapu kia 16 kia nkanda wau mikusadisa mu zaya una Nzambi kebadikilanga e vangu dia kembelela nkinzi mia nza.