VIOKA 500 za mvu vitila ngutuk’a Yesu, Daniele wa ngunza wakala ova nza. Kansi, o Yave muna Daniele wasengomona  dina disadisanga mu zaya ntangwa in’o Yesu kakusua yo mwand’avelela nze Masia yovo Kristu. Daniele wavoveswa vo: “Zay’aka yo bakula vo tuka mpaik’a nkanikinu a vutulwisa yo tunga Yerusaleme yakuna Masia wa ntu, i tumingu nsambwadi; yo tumingu makumasambanu ye zole.”—Daniele 9:25.

Muna bakula ntangwa ya ngiz’a Masia, tufwete zaya mvu wavewa nkanikinu wau ye kolo kiavioka yamuna ngiz’a Masia. Ungunza uyikanga vo wavewa “tuka mpaik’a nkanikinu a vutulwisa yo tunga Yerusaleme.” Nkia mvu wavaik’o “nkanikinu” wau? Muna Nekemiya wa nsoneki a Nkand’a Nzambi, tutanganga vo o nswa wa tungulula e yaka ya Yerusaleme wavewa  muna “mvu una wamakumole wa Antakesate wa ntinu.” (Nekemiya 2:1, 5-8) Asoneki a lusansu bevovanga vo Antakesate wayantik’o yala muna mvu a 474 vitila tandu kia Kristu. Muna mvu 455 vitila tandu kia Kristu, walungisa 20 ma mvu muna luyalu lwandi. Owau tumwene vo o mvu wa 455 vitila tandu kia Kiristu, i lubantiku muna bakula ungunza wa Daniele mu kuma kia Masia.

Daniele wasonga kolo kivioka yamuna ngiz’a “Masia wa Ntu.” Wavova vo: “Tumingu nsambwadi; yo tumingu makumasambanu ye zole” i sia vo tumingu 69. Kolo kwa tuzingila? Nsekola zayingi za Nkand’a Nzambi ziyikanga vo twatu ke tumingu twa lumbu ko, kansi tumingu twa mvu. Konso lumingu mvu nsambwadi luyikanga. Ayuda kuna nkulu i wau babadikilanga tumingu twatu. Kadi konso mvu wansambwadi bakembelelanga mvu a Vundu. (Luvaiku 23:10, 11) Muna kuma kiaki, ungunza wa tumingu 69, mvu 483 usonganga. Kadi konso lumingu mvu 7 luna.

Avo tutangidi mvu 483 tuka muna mvu a 455 vitila Kristu, tulwaka muna mvu 29 wa tandu kia Kristu. Wau i mvu kavubwa Yesu yo kituka se Masia. * (Luka 3:1, 2, 21, 22) E ndungana ungunza wau y’esivi kikilu.