Nga diasazu dikalanga mu lemvokela mase maku e ntangwa zawonso?— Ezak’e ntangwa diampasi dikalanga. Nga ozeye wo vo Yesu walemvokelanga Yave ye mase mandi?— E mbandu andi ilenda kusadisa mu lemvokela mase maku kana nkutu vava dikalanga diampasi. Yambula twalongoka diaka mayingi mu kuma kia lusansu lwalu.

Una kayizidi ko ova ntoto, Yesu kuna zulu kakala yo Yave wa Se diandi. Kansi Yesu mase mpe kakala mau ova ntoto. Nkumbu zau Yosefe yo Maria. Nga ozeye una bakitukila mase mandi?—

Yave wabonga moyo a Yesu kuna zulu yo sia wo muna vuma kia Maria kimana kawutuka yo zingila ova ntoto. Diambu diasivi diakala! Yesu wayantika nungunuka muna vuma kia Maria nze una nsedia minungunukinanga muna vuma ya ngudi zau. Vioka ngonde vwa, Yesu wawutuka. Muna mpila yayi, Maria yo nkaz’andi Yosefe bakituka mase ma Yesu ova ntoto.

Vava Yesu kakala ye kimbuta kia mvu 12, wavanga diambu dimosi diasonga vo watoma zolanga Yave wa Se diandi. Ediadi diavangama vava Yesu ye yitu yandi bayenda mu nkangalu wandá kuna Yerusaleme. Ku nkinzi a Nduta bayenda. Vava bavutukanga kuna mbanza bazingilanga, Yosefe yo Maria bamona vo Yesu kakala ko muna buka. Nga ozeye kuna kakala?—

Vana vau, Yosefe yo Maria bavutuka kuna Yerusaleme yo vava Yesu muna mbanza yawonso. Batokana kikilu kadi ke bansololanga ko. Una vavioka lumbu tatu, bansolola muna tempelo. Nga ozeye ekuma Yesu kakadila muna tempelo?— Kadi i muna kalenda longokela mu kuma kia Yave wa Se diandi. Wau vo watoma zolanga Yave, wakala y’etima dia longoka una kalenda kunyangidikila. Kana nkutu vava kakituka se mbuta, Yesu walemvokelanga Yave muna mambu mawonso. Yesu walemvokanga kana nkutu vava diakalanga diampasi. Nga Yesu walemvokelanga mpe Yosefe yo Maria?— Elo. Nkand’a Nzambi uvovanga vo wabalemvokelanga.

Adieyi olenda longoka muna mbandu a Yesu?— Ngeye mpe ofwete lemvokelanga mase maku, kana nkutu vava dikalanga diampasi. Nga ovanga wo?—