Yesu akundi tatu kakala yau bazingilanga kuna Betania. Akundi awaya i Lazaro ye nsanga zandi zole, Maria yo Mareta. Lumbu kimosi, vava Yesu kakala ku sambu diankaka dia Yodani, Maria yo Mareta bantwikila nsangu za nzaki vo: ‘Lazaro kimbevo kiangolo kena kiau. Dodokolo wiza mu nzaki!’ Kansi, Yesu kayenda vana vau ko. Wavingila diaka lumbu yole. I bosi, wavovesa alongoki andi vo: ‘Twenda kuna Betania. Lazaro olele tulu, nzolele kwenda kunsikamesa.’ Antumwa bamvovesa vo: ‘Avo Lazaro leka kalele, dikunsadisa mu sasuka.’ Muna kuma kiaki, Yesu wabavovesa ludi vo: ‘Lazaro ofwidi.’

Vava Yesu kalwaka kuna Betania, Lazaro wazikwa kala se vioka lumbu yá. Ulolo wa wantu bayiza fiaulwisa Mareta yo Maria. Vava Mareta kawá vo Yesu olweke, watikuna mu kwenda kunkika. Wavova vo: “E Mfumu, kele vo wakala vava, o mpangi ame nga kafwidi ko.” Yesu wamvovesa vo: ‘O mpangi aku zinga diaka kezinga. E Mareta, nga okwikidi dio?’ Mareta wavova vo: ‘Ikwikilanga vo ofuluka muna lufuluku.’ Yesu wamvovesa vo: “Mono i lufuluku yo moyo.”

I bosi, Mareta wayenda kwa Maria yo kumvovesa vo: ‘Yesu wizidi.’ Maria wayenda ntinu kuna kwa Yesu. Ulolo wa wantu banlanda. Wafukama vana malu ma Yesu yo yantika dila. Wavova vo: ‘E mfumu, kele vo wakala vava, mpangi eto nga wakinu moyo.’ Yesu wabakula e mpasi kamonanga. Muna kuma kaki, yandi mpe wayantika dila. Vava wantu bamona mansanga mandi, bavova vo: ‘Nutala, Yesu zola kikilu kazolanga Lazaro.’ Kansi, akaka bakiyuvulanga vo: ‘Ekuma kavuluzidi nkundi andi ko?’ Adieyi Yesu kavanga?

Yesu wayenda kuna ziami kiasiwa tadi diampwena vana mwelo. Wavova vo: “Nukatula e tadi.” Mareta wavova vo: ‘Se lumbu yá iviokele kala. E nitu andi itele kala nsudi.’ Kana una vo i wau, bakatula e tadi. Yesu wasamba vo: ‘E Tata, ntondele wau ungwidi. Nzeye wo vo e lumbu yawonso okungwanga; kansi  mpovele mu nding’angolo kimana wantu awaya bakwikila vo ngeye wantuma.’ I bosi, waboka mu nding’angolo, oku vo: “E Lazaro, vaika!” Diambu dimosi diasivi diavangama. Lazaro wavaika muna ziami, wazingwa nlele mia lino. Yesu wavova vo: “Nunkutulula, nunyambula kenda.”

Ayingi bamona diambu diadi bakwikila muna Yesu. Kansi akaka bayenda vovesa diambu diadi kwa Afarisi. Tuka muna lumbu kiakina, Afarisi bavavanga vonda Lazaro yo Yesu. Mosi muna antumwa, Yuda wa mwisi Kereote, wayenda kwa Afarisi kuna kinsweki yo kubayuvula vo: ‘Ntalu kwa nukumfuta avo inusadisi mu solola Yesu?’ Bawizana vo 30 ma palata bekumfuta. Yuda wayantika vava lau dia yekola Yesu kwa Afarisi.