Mawonso Afarisi bavanganga i mu sivikisa wantu. Avo bavangidi diambu diambote, bavanganga wo kimana bamoneka kwa wantu. Basambanga muna fulu ya ndonga kimana awonso babamona. Afarisi bakotesanga sambu yandá muna ntu yo vutukila yo muna masambilu ye muna mpambu za nzila muna balenda monekena kw’akaka. Muna kuma kiaki, wantu basivika kikilu vava Yesu kabavovesa vo: ‘Ke nusambinge nze Afarisi ko. Bebanzanga vo Nzambi osivika wau bevovanga mvovo miayingi, kansi Nzambi ke sivikanga sambu yau ko. E sambu i diambu dia ngeye kibeni yo Yave. Kufwete vutukilanga mvovo miau mimosi ko ntangwa ke ntangwa. Yave ozolele vo wanzayisa una omonanga muna ntima.’

 ‘I wau wuwu nufwete sambila: “E Se dieto koko zulu, yambula nkumbu aku yazitiswa. E Kintinu kiaku kiza. O luzolo lwaku lwavangama ova ntoto nze koko zulu.”’ Yesu wabavovesa mpe vo basambanga mu kuma kia madia ma lumbu ke lumbu, lomba ndoloki a masumu mau yo samba mu kuma kia mambu mankaka ma yau kibeni.

Yesu wavova vo: ‘Ke nuyambula samba ko. Nukwamanana lomba eyi yambote kwa Yave wa Se dieno. Konso se ozolanga vana lekwa yambote kwa mwan’andi. Avo mwan’eno unulombele mbolo, nga nukumvana e tadi? Avo olombele mbizi, nga nioka nukumvana?’

I bosi, Yesu wayika dina tulenda longoka. Wavova vo: ‘Avo yeno nuzeye una nulenda vanina lekwa yambote kwa wan’eno, o Yave wa Se dieno nkia nduta keluta kunuvana mwand’avelela? Oyeno nulomba kaka.’ Nga olandanga luludiku lwa Yesu? Nkia mambu olombanga muna sambu yaku?