Vava Yesu kafwa, mvuama mosi wayikilwanga vo Yosefe, walomba o nswa kwa Pilato vo kakatula e nitu a Yesu vana nti. Yosefe wazinga e vimbu dia Yesu vana nlele a lino yo sia dio muna ziami kiampa. Wasia tadi diampwena vana mwelo. E nganga zambuta bavovesa Pilato vo: ‘Wonga tuna wau kadi mosi muna alongoki a Yesu olenda baka e nitu andi yo vova vo ofulukidi.’ Muna kuma kiaki, Pilato wabavovesa vo: ‘Nubindika e ziami yo yingila kio.’

Vioka lumbu tatu, muna mene-mene akento bayenda kuna ziami, bawana vo e tadi diakatwilu vana mwelo. Mbasi mosi wakala muna kati kwa ziami wavovesa akento vo: ‘Ke numoni wonga ko. Yesu ofulukidi. Nuenda zayisa alongoki andi vo benda wanana yandi kuna Ngalili.’

Maria Mandala wayenda ntinu mu wanana yo Petelo ye Yoane. Wabavovesa vo: ‘Muntu obakidi e nitu a Yesu.’ Petelo ye Yoane bayenda mu nzaki kuna ziami. Vava bamona vo ke muna muntu ko, bavutuka kwau kuna nzo zau.

Vava Maria kavutuka kuna ziami, wamona mbasi zole muna kati yo kubavovesa vo: ‘Kizeye ko kuna basidi o Mfumu ame.’ I bosi, wamona muntu mosi yo yindula vo mvati a nsengo. Wamvovesa vo: ‘E mfumu unzayisa kuna unsidi.’ Kansi, vava muntu ndioyo kavova vo: “E Maria!” wabakula vo i Yesu. Wakaza vo: “E Nlongi,” i bosi wambimbakana. Yesu wamvovesa vo: ‘Wenda zayisa kwa mpangi zame vo umbwene.’ Vana vau, Maria wayenda mu nzaki kuna kwakala alongoki yo kubavovesa vo omuene Yesu.

Muna lumbu kiakina kaka, alongoki wole bakala mu nkangalu, ku Yerusaleme batuka yo kwenda kuna Emau. Muntu mosi wabayikama muna nzila yo kubayuvula kana nkia diambu bamokenanga. Bavova vo: ‘Nga kwawidi diambu ko? Se vioka lumbu tatu, e nganga zambuta bavondese Yesu. Owau, akento  ankaka edi bevovanga vo ofulukidi.’ O muntu ndioyo wabayuvula vo: ‘Nga ke nukwikilanga mu ungunza ko? Bavutula vo Kristu osinga fwa, i bosi ofuluka.’ Wakwamanana kubasasila e sono ya Nkand’a Nzambi. Vava balwaka kuna Emau, alongoki bavovesa muntu ndioyo vo kenda yau entwadi. Vava muntu ndioyo kasamba mu kuma kia madia, babakula vo i Yesu. Vana vau, ovididi.

Alongoki wole awaya bayenda ntinu kuna Yerusaleme, muna nzo ina antumwa bakala yo kubavovesa dina diavangamene. Ekolo bakala muna kati kwa nzo, Yesu wamoneka kwa yau awonso. Kuna lubantiku, antumwa ke bakwikila ko vo muntu ndioyo i Yesu. I bosi, wabavovesa vo: ‘Nutala moko mame, nunsimba. Diasonama vo Kristu ofuluka muna mafwa.’