Vakala yo muntu mosi kalendanga diata ko, wavuandanga vana mwelo a tempelo lumbu yawonso mu lomba e nzimbu. Lumbu kimosi muna nkokela, wamona Petelo yo Yoane bakotanga muna tempelo. Wabavovesa vo: ‘Dodokolo numpana finzimbu.’ Petelo wavova vo: ‘Ngina ye lekwa kisundidi e nzimbu ndenda kuvana. Muna nkumbu a Yesu, telama yo diata.’ I bosi, Petelo wansadisa katelama, o muntu ndioyo wayantika diata. O nkangu wamona e kiese mu kuma kia sivi diadi. Ayingi muna yau bakituka minkwikizi.

Kansi, anganga ye Asaduki bafunga makasi. Bakanga antumwa yo kubanata kuna mbazi a nkanu. Babayuvula vo: ‘Nani unuvene nkuma wa wuka muntu ndioyo?’ Petelo wavutula vo: ‘Yesu Kristu ona nuavonda utuvene o nkuma wau.’ Afidi a mabundu bavova vo: ‘Nuyambula vovela e nkumbu a Yesu.’ Kansi, antumwa bavova vo: ‘Tufwete vovela e nkumbu andi. Ke tulendi yambula wo vanga ko.’

Vava Petelo ye Yoane bavaikiswa muna pelezo, vana vau bayenda kuna kwakala alongoki ankaka yo kubazayisa dina diavangama. Basamba entwadi yo lomba kwa Yave vo: ‘Dodokolo utusadisa twakala ye unkabu kimana twakwamanana sala e salu kiaku.’ Yave wabavana mwand’andi avelela. Muna kuma kiaki, bakwamanana sila umbangi yo wuka e mbevo. Wantu ayingi bakituka minkwikizi. Asaduki bamona kimpala, bakanga antumwa yo kubasia muna pelezo. Kansi muna fuku, mbasi a Yave waziula e yelo ya pelezo yo vovesa antumwa vo: ‘Nuvutuka muna tempelo yo kwamanana sila umbangi.’

Vava kuma kwakia, afundisi a mbazi a nkanu bawá e nsangu vo: ‘E pelezo yabindama, kansi o wantu nuasidi muna pelezo ke bena mo diaka ko. Kuna tempelo bena, belongelanga wantu.’ Antumwa bakangwa diaka yo natwa kuna mbazi a  nkanu. O ngang’ambuta wavova vo: ‘Twakunukanikina vo ke nuvovela diaka nkumbu a Yesu ko.’ Kansi, Petelo wavutula vo: “Tufwete lemvokela Nzambi nze mfumu ke mu wantu ko.”

E mfumu za mabundu bafunga kikilu makasi, bazola nkutu vonda antumwa. Kansi Mfarisi mosi, nkumbu andi Ngamaliele watelema yo vova vo: ‘Nukeba! Nzambi una ye wantu awaya. Nga nuzolele kikilu nuana yo Nzambi?’ Batambulwila luludiku lwandi. Vava bawanda antumwa, babakanikina diaka vo bayambula sila umbangi. I bosi, babayambula. Kansi antumwa ke bamona wonga ko. Bakwamanana samuna e nsangu zambote kuna unkabu wawonso, kiakala muna tempelo yovo muna nzo ye nzo.