Muna mbanza Kaisaria, mwazingilanga mfumu a makesa ma Roma, e nkumbu andi Koneleo. Kana una vo kakala Nyuda ko, wazitiswanga kwa Ayuda. Wasadisanga asukami ye awana bakala mu mpasi. Koneleo wakwikilanga muna Yave yo samba kwa yandi lumbu yawonso. Lumbu kimosi, mbasi wamoneka kwa Koneleo yo vova vo: ‘Nzambi owidi e sambu yaku. Owau, fila wantu kuna mbanza Yafo, kuna kena o Petelo, umvovesa vo keza ku nzo aku.’ Vana vau, Koneleo wafila wantu tatu kuna Yafo yakala tezo kia 30 ma kilometa yakuna sude.

Ekolo kakala kuna Yafo, Petelo wasongwa mona-meso. Wamona bulu ina yabadikilwanga kwa Ayuda vo yafunzuka yo wá ndinga yamvovesa vo kadia e bulu yayina. Petelo katambulwila ko. Wavova vo: ‘Kisidi dia bulu kiafunzuka ko mu zingu kiame.’ E ndinga yamvovesa vo: ‘Kuyikila e bulu yayi ko vo yafunzuka. Nzambi ovelelese yo.’ Petelo wavoveswa mpe vo: ‘Wantu tatu bena vana mwelo aku. Wenda yau entwadi.’ Petelo wayenda vana mwelo yo yuvula wantu awaya e kuma bezidi ku nzo andi. Bamvutula vo: ‘Koneleo wa mfumu a makesa ma Roma ututumini.  Ofwete kwenda kuna nzo andi kuna Kaisaria.’ Petelo wabokela wantu awaya baviokesela fuku muna nzo andi. Vava kuma kwakia, wayenda yau entwadi kuna Kaisaria kumosi ye mpangi zankaka za mbanza Yafo.

Vava Koneleo kamona Petelo, wamfukamena. Kansi, Petelo wamvovesa vo: ‘Telama! Mono mpe i muntu nze ngeye. Nzambi umpovese vo ngiza kwaku nzo aku, kana una vo Ayuda ke bekotanga mu nzo za Esi Zula ko. Owau unzayisa, ekuma untumisini.’

Koneleo wavovesa Petelo vo: ‘Se vioka lumbu yá, yasamba kwa Nzambi. I bosi, mbasi wampovesa vo yabokelesa ku nzo ame. Dodokolo utulonga mambu ma Yave.’ Petelo wavova vo: ‘Owau ndongokele vo Nzambi ke sianga mpambula ko. Otondanga konso ona ozolele kunsambila.’ Petelo wabalonga mambu mayingi mu kuma kia Yesu. I bosi, mwand’avelela wakulumuka muna Koneleo ye awana bakala yandi. Yau awonso bavubwa.