Lumbu kimosi, Eva yandi mosi kakala. I bosi, nioka yayiza mokena yandi. Yavova vo: ‘Nga dialudi vo Nzambi wanuvovesa vo ke nudie nti miawonso ko?’ Eva wavutula vo: ‘Tulenda kweto dia bundu ya nti miawonso, katula kaka nti mosi.’ Avo tudidi e bundu kia nti wau, fwa tufwa.’ Nioka wavova vo: ‘Ke nufwa kweno ko. Avo nudidi e bundu kia nti wau, nukituka nze Nzambi.’ Nga dialudi kavova? Ve, luvunu kavova. Kansi, Eva wakwikila muna luvunu lwa nioka. Vava Eva kayantika tungununa e bundu, wabakama kwa ngindu za dia kio. Eva wadia e bundu kia nti wau yo vana kio mpe kwa Adami kimana kadia. Adami wazaya wo vo fwa befwa avo bakolamene Nzambi. Kana una vo i wau, Adami wadia e bundu kiakina.

Kuna masika, Yave wayuvula Adami yo Eva e kuma badidi e bundu kia nti wauna. Eva wavana e ngielele kwa nioka, o Adami wavana e ngielele kwa Eva. Wau vo Adami yo Eva ke balemvoka ko, Yave wabayinga muna mpatu a Edene. Wasia ambasi yo nsosolo wavaikanga nlaku a tiya vana mwelo kimana balembi kota diaka muna mpatu.

Yave wavova vo ndiona wavuna Eva tumbu mpe kevewa. Ke nioka kikilu ko yavovana yo Eva. Yave kavanga nioka ko kimana zavovanga. Mbasi ambi yasadila e nioka kimana yavova. Wavanga wo muna vuna Eva. E nkumbu a mbasi yayi i Satana wa Nkadi ampemba. Kuna sentu, Yave ofwasa Satana kimana kalembi vukumuna diaka wantu mu vanga mambu mambi.